25 de Mayu de 2024
Continuamos trabayando pela Covarriella, faciendo delles visites p'adecuar un pocu'l pie de vía de L'Aviru'l Campón, asina como visitando l'Aguya Madalena, repitiendo dalguna vía col envís, de da-y una nueva vida a estos dos seutorinos, metiéndonos a trabayar nel evidente bombu que sal a la mandrecha de la clásica Roberto Madalena de tres llargos.
Dellos collacios, centráronse más en trabayar na aguya mientres que personalmente, prestóme muncho'l seutorín anterior, nomáu L'Aviru'l Campón, como confirmóme dalgún ganaderu de la zona. Ellí, llueu de facer el 7a de la manzorga que comentáremos nel anovamientu anterior, pasámonos a la siguiente vía, que salió a vista, paeciéndonos a los collacios que tuviéramos esi día dándo-y un pegue, que rondaría'l 6c+.
Brutal la vía, cincu estrelles totalmente d'escalar en tou momentu, al igual que la so collacia de la esquierda y bien ceo, metíme al día siguiente a la de la mandrecha, tando pelín moyáu un xarru al final d'una chorrerina, pero pudiéndose probar, paeciéndome aquel día, incluso más dura que'l 7a de la esquierda, pero llueu de sacar los pasos y da-y pegues colos compañeros, tamién paeciónos 7a, más cenciellu que l'otru, pero pa min, muncho más guapa y continua d'esguilar, siendo tamién un rutón.
Quedándome namái que les víes de dambos llaos y sabiendo que la de la esquierda pudiera rondar el 6c, pero necesitando una bona maceada, por mor, d'una parte baxa pelín rota o más bien hueca, tireme a la de la mandrecha, siendo la más dura de momentu, ensin dubia, paeciéndome más o menos 7b, super plaqueru y ñaperu concentráu nes tres primeres chapes.
Llueu de sacar pasos y mirar los chapaxes que tan un pelín estremos, con mal vuelu cerca'l suelu, pude encadenar les tres primeres chapes, pringando en dos ocasiones nel caberu movimientu duru, pero ye que tien tal intesidá que nin garrar magnesiu dexa jeje. Asina que cuando quise volver al día siguiente a dar un pegues d'encadene, alcontrámonos cola visita del guarda de mediuambiente, que traía de noticia, el cierre de los seutores sur del Monsacru.
Viéramos a la zapiquera volando pela zona, pero nun sabíemos per onde añeraba, asina que paeznos lóxica la regulación, viendo que tienlo mui cerquina d'ambos seutores, asina que'l cierre hasta Setiembre ye una consecuencia normal, teniendo qu'esperar unos mesinos hasta poder trabayar tanto nes víes esistentes como nes nueves que dambos seutores pudieren ufrecernos a los escaladores.
Asina que ya sabéis, Aguya Madalena y L'Aviru Campón, queden cerraos hasta'l 31 d'Agostu, quedando'l restu seutores abiertos ensin regulación. Ya sabéis, respetái les regulaciones y volveremos a trepar per esti llugar al final del branu, ensin problemes.
------------------------------------------------------------------------------
23 d'Abril de 2024
Pali pali, como siempre, fuimos llimpiando'l seutor d'Entepicos na Covarriella, entamando por toles víes que tenía ya feches d'antaño y como non, siguiendo poles más modernes equipaes nos últimos años, siendo éstes les más dures, teniendo que trabayar dalgunes más y otres menos, pero como siempre, metiéndonos en tolos fregaos ensin mayores miramientos.
La última vía que me quedaba per encadenar llueu del Trono de Hierro, que paecióme un 7b duro, yera Gallumaster, otru 7b más de mi estilu plaqueru y de preses males, un pocu metía a calzador, pa llevala per un pañu de rocona caliza, que da les preses xustes pa poder movese, con una salida rara del diedro hacia la placa.
Dempués de descifrar, nun par de pegues, los movimientos con Suco,
xubiera otru par de díes con Orlando que quería da-y al Trono de Hierro, quedándome'l primer día ensin probala siquiera por mor del fríu, pudiendo facer una combinación evidente qu'entra per Sálvame del Crux y sal pol Trono de Hierro, evitando lo más duro dambes rutes, quedando pa min de 6c, fisiquín y guapu.
Ya'l segundu día, si que calenté montando la vía y pude facela al segundu pegue del día, con cierta facilidá a dicir
verdá, lo que volvió a creame duldes sol grau de la vía, si llega a 7b o
non, o si ye Trono de Hierro la que tien de tar más alta, pero na realidá
son víes dafechu distintes, asina que buenu, quedó de 7b suave.
Llueu de piesllar el seutor d'Entepicos, teníemos visto un aviru cerca l'Aguya Madalena, onde había 5 víes equipaes qu'enxamás probáramos, asina que pasamos per ellí a da-y a la más evidente y que meyor pinta tenía, faciéndola al tercer pegue por patán y paeciéndonos que rondaba'l 7a, mui guapa eso sí.
Pa siguir, trabayando'l seutor, habrá que continuar prebando vía tres vía, anque la de más a la esquierda, nun-y venía mal un maceáu, pa quitar dalgún tramu con pinta rotu, al igual que na que ficimos, que tien una banda de roca marrón dalgo descompuesta y qu'habría que revisar un pelín tamién.
Dani tuviera tiempu a prebar la de la drecha del 7a, paeciéndo-y más cenciella, rondando 6c/+, pero nun lo tenía mui claro tampoco, asi qu'esperaremos a probala más xente pa intentar dir cotando esti seutorín, ya incluso, puede ser que metámonos a equipar dalguna más, ya que tovía tien dalgún pañu roca aprovechable.
------------------------------------------------------------------------------
21 de Febreru de 2024
Con esti iviernu de mentira que tamos teniendo, la oportunidá d'escalar al solete n'altura, ta siendo una de les meyores opciones, asina que la Covarriella ta dándonos munchísimu xuegu, tanto pa les tardes de vienres, viendo el nulu accesu al seutor dende l'aparcaderu como pa dir a pasar el día enteru nel fin de selmana.
Un par de findes tuviemos esguilando pela Covarriella con díes bien soleyeros, asina que fuimos hasta un seutorín pembaxo la peña La Covarriella, baxo la Sienda Cimera, del que tengo que buscar el nome, falando colos ganaderos de la zona, pero que llámolu la Visera de momentu y en dalguna páxina de facebook llegó a nomase como Marco Polo.
Ye un seutorín equipáu per Berni, va dellos años ya y nun llegó a espublizase na, comentándome'l mesmu que yera ideáu pa iniciación y pa trepar los guah.es, coles chapes mui cerquines. Nel mió puntu de vista, les víes son buenísimes y pa que nun se pierdan, espublizo esta pequeña reseña, colos graos que nos paecieron más menos, ente los que les probamos.
La idega ye llimpiar un pocu más y podríen entrar unes cuantes víes más y andái sollerte que les reuniones tienen los gatillos de los mosquetones tocaos y meyor facer reunión de l'argoya. Avisar tamién, que ye un seutorín, onde tenemos que tener cuidáu de nun tener cabres o caballos penriba ya que la sienda pasa penriba pudiendo tirar piedres y que de dalguna manera abellúgase del aire que suel correr pela Covarriella y si pega'l sol la palmada ye clara, asina que madrugar pa calecer deos nes sos víes y llueu ya podemos movemos a la Covarriella o Entrepicos.
Aparte de dar a conocer esti minseutor dafechu recomendable, esta
última temporada andamos llimpiando'l seutor d'Entrepicos y dempués de los encadenes de Sálvame del Crux (6c+/7a), Jinete Pálido (7a) y el Saltachapas (7a+) , quedábame l'ayalga de la cuevina, como ye'l Trono de Hierro, que ya probara va dellos años, casi recién reequipada.
Col Saltachapas encadenáu en tres pegues, que pudo salir al segundu, tenía munches duldes so'l grau y con tan sólo, tocar les preses del Trono de Hierro, sacar los movimientos y ver lo físico del bloque, tenía claro que nun podien tar nel mesmu grau, asina que pa mi idega, el Saltachapas taría bien de 7a+, cincu estrelles dafechu y el Trono de Hierro, que tuvimos proyeutando Suco y yo, dellos díes y tamién dempués Dani, paezme que queda de 7b sólido y mui fisico.
Tuvi la suerte de tener a Andrea colgada nel quintín de la so manzorga y sacar tola secuencia del bloque nuno de los pegues d'encadene, que por gañán nun fice esi mesmu día y tuve que dir corriendo una tarde con Suco, antes de la llegada del temporal pa encadenala quedándome muncho más tranquilu pa la llegada del tardíu iviernu.
Covarriella (Seutores visitaos)
Croquis modificaos por mi de la escuela d'escalada de Covarriella, por mor del grupu del facebook d'Escuela d'Escalada del Monsacru. Gracies y col so permisu.
24, 29 d'Avientu 2023 y 1 Xineru de 2024
Finales d'añu y toca escoyer llugares onde se tea agradable al solín y de pasu echémos un gabitu a los collacios padres, pa poder esguilar toos xuntos con un accesu curtiu y onde meyor que na Covarriella, onde llueu de la construcción de la pista formigonada hasta la propia Covarriella, el patéu ye de 5 minutos al seutor d'Entepicos.
Eso, sí, tenemos que tar sollertes cola posibilidá de vientu pa dir a esti seutor, ya que malpenes pegue cierta brisa y el sol seya seliquín, vamos a palmar de fríu como pasónos un vienres de tarde, que dimos dos pegues apriesa y escapamos corriendo ya que nun había quien parase, asina que controlái mui bien la meteo y el vientu, ya que corre per tola collada y fai difícil tar a gustu esguilando.
Casualmente, los meyores díes fueron los de nuechebona y nuechevieya, que pudimos trepar al solete, centrándonos el primer día en facer Jinete Pálido, una vía bien guapa, con roca de gran calidá, que rondará'l 7a al nuesu xuiciu, anque ponga 7a+ en dalgunos croquis que rulen perende. Sicasí, la vía ye mui buena, con un bloque ñaperu marcáu pa salir d'una barriguina.
El día de la muerte de fríu, pude encadenar Alpinistas de Morcín, un 6c+ pa mi gustu, anque tengo que dicir que nun ye una vía mui apetecible, con bloque de presa pequeña pente la primer y segunda chapa, encomendádovos a salir cola segunda chapada ya que piques suelu. Ye dicir, nun paga demasiáu la pena esta vía, siendo pa coleccionistes, con bloque apretón, tramu rotu intermediu y ya xuntándose a un 6b clásicu de les víes más antigües del seutor.
L'últimu día del añu, metime a probar a vista Sálvame del Crux, que percorre tola covacha del seutor, cayéndome nel pasu xustámente, por mor de nun atopar el furacu salvador. La verdá ye que la vía ye mui guapa, con tola escalada de desplome por presa buenísima y salida del techu fina y placa picante final a cadena, paeciéndonos 7a sele, como grau pa la vía, eso sí, superdivertida.
En resume, díes guapos que pasamos pel seutorín d'Entepicos, quedando con ganes de siguir probando más víes, asina que tornaremos de xuru polo curtiu del accesu, víes curties pa dir turnándonos y siendo un sitiu cómodu pa tar con neños y con increyibles vistes.
--------------------------------------------------------------------------------------
25 de Marzu 2023
Finde de collacios colos que facía tiempu nun escalaba, axuntándome'l vienres na Cualladrona con Pepa y Jose, pa enseñá-yos esti seutorín, del qu'actualizaremos info esta selmana, asina como pa quedar con ellos de nuevu y xubir el sábadu hasta la Covarriella, onde facía xustu un añu, pel que nun pasaba a trepar, anque si pasara corriendo delles vegaes nos entrenos pel Monsacru.
Como siempre, el patéu previu dende que dexes la furgo hasta'l seutor, ye una maraviya con vistes a tola redolada montes, col Monsacru enfrente, tol cordal de L'Aramo a la nuesa manzorga y si das la vuelta, tolos montes de L.lena, Ayer, la crestería de Peña Manteca col Llusuriu detrás y hasta Picos al fondu, lo qu'amuesa la guapura d'esti llugar.
Cuando aporté'l sábadu pela mañana, ya taben nel seutor Pepa y Jose, con Edu y Tito, escalador l.lenizu que nun tenía'l pacer de conocer. Cola calma, entamo por asegurar a Pepa nun quintín que nun me gusta muncho polo roto y ye qu'a dicir verdá, les víes cencielles de Covarriella nun son mui guapes nin agradecíes.
Tocaba mi turnu y metíme a probar un 6c+, con entrada a bloque, como casi toes les víes d'esta parte, ya que tien un zócalu d'entrada pelín gafu, saliendo per romos pa una escalada muncho más seliquina. Como non, facela a vista yera complicáu, asina que tuve que facela al segundu pegue serio, pegando l'apretada inicial y saliendo hasta cadena ensin problemes.
Llueu d'un peguín de Pepa a otra vía pa calecer, pasamos a lo meyores momentos del día, metiéndome a vista en SomosFempa un 7a, mui guapu, con muncha conti de presa pequeña y por supuestu, ensin una entrada tan bloquera, pudiendo lluchala y sacándola a vista, lo que prestóme pola vida, porque ya nun me queden munches víes d'esti grau nes que poder esguilar nesti sen.
Magar d'esti pegue tan prestosu, tuve la suerte d'asegurar a Pepa nun 6a+ (Que Guapada, creo) apretonina que tamién fue a encadenar como muncha solidez, completando dos díes d'esguilada mui potentes, encadenando varies víes d'esti grau, confirmando'l so regresu a la escalada de primera ensin mieos.
Col trabayu fechu, dediquéme a dar un paseín, comentándome Tito y Edu, qu'había víes nun muru con una visera brutal na parte alta, a la qué-y echara un vistazu va tiempu, averándome hasta ellí, comprobando la esistencia de cuatru víes de grau baxu, no qu'informeme que sería'l seutor Marco Polo, quedándome con ganes de probales y facer croquis, ya que pudiera completar perfeutamente con Covarriella.
18, 19 de Marzu 2022
Otru finde más, que viendo'l nivel de restricciones per Morcín, terminamos por xubir hasta Covarriella, pa esguilar un puquiñín. Esta vegada, aportamos a Covarriella dempués de pasar per Laboratoriu y ver que taba pingando tol seutor, asina que fue una decisión a la desesperada a la gueta d'un llugar seco onde trepar.
Plantábamos Suco y yo más bien tarde nel aparcaderu y pa sorpresa
atopamos un montonera xente pel seutor cimeru, asina que decidimos dar
un paséu hasta l'aguya Madalena onde quedábame un 7a por encadenar dende
va más de cincu años.
De camín, paréme n'otru seutorín al llau onde habrá unes 7 u 8 víes metíes qu'a simple vista ya paecen tener un grau más eleváu, asina qu'habrá que probales y descifrar a que tamos enfrentándonos. Col tiempu xustu pa un par de pegues plantámanos baxo la vía, Rayos y Truenos y caliento nella poniendo cintes resolviendo con cuidáu, pol antebrazu, casi tola vía hasta'l pasu.
Al día siguiente, axuntámonos tol grupu de collacios en Santolaya y decidimos xubir de nuevu a Covarriella, viendo que'l día ta estable de sol y que nun tira l'aire, premisa perimportante pa nun pasar fríu nun seutor, onde cuerre l'aire y tamos a más de 800 metros d'altor.
Aún así, lo meyor ye'l sitiu, ya que dende qu'aparques la furgo, el paséu per tola collada ye un espeutáculu de montes, con vistes pa tolos montes del oriente dende Picos, Sueve, Peñamayor, Torres ensin contar con tol cordal de L'Aramu enfrente nuesa.
No que correspuende a la esguilada propia, dempués de facer el 6b+ (El Undécimo...) lluchando cola petada ya que ye una vía 5 estrelles pero esixente, pasamos a da-y a un 6c (Guarriors), que pringué nel bloque d'entamu y ya fice al siguiente intentu, casi ensin descansar dende'l primeru.
El restu'l dia, aparte de xintar empanada y tar de rises colos collacios, dimos un peguín a 26 Pulgadas, un 7a, que resolvimos tola parte plaquera, esguilando fino y fallamos nel bloque del techu, el cual ye duru enforma pa la mió recuperación del antebrazu, matizando'l pasu, pero nun quise da-y más pegues por si les mosques.
Covarriella (Seutores visitaos)
Croquis modificaos por mi de la escuela d'escalada de Covarriella, por mor del grupu del facebook d'Escuela d'Escalada del Monsacru. Gracies y col so permisu.
24 d'Avientu de 2021 y 11 de Marzu 2022
Pues si falábemos de crisis pa esguilar per Morcín, por mor de la temporada d'añeramientos paxareros y la mala xestión de la FEMPA y la Conseyería, esti añu 2022 siguimos nel mesmu plan, col cierre total de casi toes les escueles morciniegues.
Si a esto sumámos-y que lo que tengo por encadenar en casi tolos llaos ta nel másimu nivel míu, cuesta muncho tener díes tranquilos d'esguilada, poro'l trabayu de Astuvertical nel nuevu seutor de Covarriella ye una ayalga pa tolos aficionaos a esti deporte.
L'únicu problema pa esti seutor ye atopar unes condiciones afayaices pa poder trepar, ya que siempre tira airón y tamos altos, poro quedar tiesu esguilando ye lo más normal. La primer visita, fuéramos el día de Nuechebona con un día mediu soleyeru y aún así tuvimos que colar, ya que nun había quien parase de cutu.
Esi día malpenes probamos un V dalgo rotucu na parte baxa y el 6b d'al llau con un bloquín na parte baxa y roca tamién duldosa na parte superior, poro munchu procuru esguilando nestes primeres víes de la mandrecha'l seutor onde la roca vese dalgo frañada.
Na segunda visita, ficimos dos víes a la mandrecha'l seutor de 6a y 6a+, nun pequeñu espolón, na que tenemos que tener cuidáu tamién nel 6a, onde pasamos al llau d'unos bloques que nun suenen mui bien, asína que lo mesmu, güeyu y cascu obligatoriu.
Dempués de facer estes dos, pasamos a Que Chulada!, otru 6a+, onde ya la roca ye perfuerte y la vía en cuestión ye una pasada. Cuando tábemos engorilándonos pa probar más víes, entró una ñube per L'Aramo y tuvimos que desmontar un 6b+, mui guapu, según Iso, que llegó a cadena ensin sentir les manes y colamos ya que venía una cortina d'agua.
Covarriella (Seutores visitaos)
Croquis modificaos por mi de la escuela d'escalada de Covarriella, por mor del grupu del facebook d'Escuela d'Escalada del Monsacru. Gracies y col so permisu.
30 de Mayu de 2021
Nin m'alcordaba, los años que nun pasaba per Covarriella con intención de trepar y gracies a les nueves restricciones a la esguilada espublizaes reciéntemente pela Conseyería de Miedu Ambiente, col sofitu impagable de la nuesa Fempa, la de tolos federaos, alcontrámonos cola dudosa oportunidá de trepar en Covarriella, cuando siempre tuvo reguláu.
Eso sí, a los dos minutos de llegar ya pasó'l páxaru penriba'l seutor, pero que sabremos nós los escaladores de los páxaros, si dalgún putu aficionáu a la paxaroloxía, dende'l so coche ta colos prismáticos contando los güevos que se pierden por mor de los putos hippies qu'anden perende colgaos de los parés asturianos.
Pues na, como en Figares nun podemos trepar, pues tiramos pa onde supuéstamente sí podemos, pesie a que'l páxaru pasó más cerca qu'enxamás lo viera en Figares. El casu ye que los únicos que faen bien el trabayu son los clubs d'escaladores pero llueu los que deberían currar de verdá tou son torgues y refalfiu.
A lo que vamos, va años, tuviera per Covarriella ya fuera en Alimoches o na Aguya Madalena y quedábame por encadenar Poker de Estrellas, un 6c apretón, así que metímonos ensin más miramientos llevando un fesoriazu a vista, teniendo que dar un segundu pegue por mor de la vía bloquera qu'alcontrámonos.
Demientres, los collacios, Andrea y Xurde, diben llimpiando seutor vía a vía, Anna y yo, metíamonos a probar una vía equipada va pocu, por otru collaciu, Rubén. Según dellos titanes, la vía podría ser 7a+/b, así que metémonos con xeitu apretador y na cuarta chapa colgamos, magar meter un bloquéu infernal pa chapar esa cuarta.
Aportamos a reunión, pero nin idega de como enllazar los pasos pente la 4 y la 6, ya que tamos falando d'un desplome xabaz y unes preses que nun son buzones precísamente. Mi secuencia probada al baxar y nun segundu pegue, pocu tien que ver con un 7a+, ya que paezme que nun fice un bloque tan duru, nin cuando probé víes de 7b+ o 7c.
En resume, munchísimes ganes de tornar a la vía, con más collacios, ya que tanto Anna como Xurde coincidieron en que la vía ye muncho más dura de 7a+, teniendo la opinión de que fácil sedrá un 7b mui duro o 7b+... habrá que siguir trabayándola.
------------------------------------------------------------------
7 d'Ochobre de 2016
Pues ya llovió dende que tenía na tiesta facer esta vía del Monsacru y tampoco ye que fuera l'únicu ya que Dani tamién taba emperráu. Asína qu'un vienres tarde, quiciás pelín pillaos de tiempu, quedamos pa facela xuniéndose a nós Marie, que nun pierde oportunidá d'esguilar tolos díes que pueda.
Aportamos a Viapará primeru Marie y yo, ya que Dani y Vero
diben a por una furgo y diben tardar un pocu más y no que vienen y non,
vamos caleciendo un pocu faciendo un 6a+, pa llueu convidar a Marie a
probar un proyeutín de 7a que tenía nesti seutor, Rayos y Truenos.
Ya la tenía a puntu pa encadenar pero nel 6a+, duelme'l pié y paso olímpicamente de probala ya que sé como se les gasta col trabayu de pies, colo que va doleme un montón pa sacar los pasos, dexándola pa prau y animando a Marie, que ye una máquina, a da-y caña.
Lo que nun sabía yera que diba fallar nel chapaxe anterior al pasu clave y con dos metros de cuerda na man, llevándonos un sustu de tres pares de coyones. Dempués d'entruga-y si taba bien y baxar les pulsaciones tiró p'alantre como una campeona y chapó pa metése nel xardín de plenu y tar un bon ratín pegándose col pasu.
Por muncho, que-y indicaba como yo lo facía, nun yerar a amañase na mió forma y xubió más menos como pudo pa salir hasta la siguiente chapa y a posteriori a la reunión. Pa cuando la descolgué hasta'l suelu, ya teníemos toos los nervios más tranquilos pero'l deu de Dani nun dexó d'apretar el botón de la cámara nel vuelu sacando esta increyible semeya en plenu vuelu.
Una vegada que tamos toos preparaos, presentaos y relaxaos, ponémonos a facer lo que teníemos pente les manes: la vía Roberto Madalena a la Aguya del mesmu nome. Ye una vía de 4 llargos anque l'últimu per terrenu más podre y de baxa cotación casi nun paga la pena facelu rapelando meyor de la tercer reunión.
Entama Dani col primer llargu de V+ aprox, que ya ficiera yo va tiempu, hasta la primer reunión con cuerda de deportiva, ya que la vía ta equipada entera en deportiva y si somos dos pues nun tenemos qu'andar con dos cuerdes d'alpina como ye'l nuesu casu.
Nun tien na d'especial pero a Dani tovía atragántese-y tovía los temes de cabeza y ye que na escalada, el mayor músculu y el más entrenáu qu'hai que tener ye'l cerebru. Nun somos na, si nun vamos bien de cabeza pero al final aporta a reunión y danos pasu a xubir como tiros hasta ellí.
El segundu llargu cotáu de 6a, faígolo yo y entres pasos mal contaos ya toi colgáu de la reunión, ensin mayores problemes. Ye quiciás el llargu más cortu y la verdá ye que nun da pié a erros, la vía va por onde va, así qu'apretar en dos pasinos y a la saca.
El tercer llargu tóca-y a Marie, así que trabayu de cuerdes y tira p'alantre col llargu de más metros y nel que más hai que navegar pasando a un llau y otru d'un diedro, pero que resuélvese ensin mayores contratiempos.
Llueu, tiramos Dani primeru y yo dempués que voi metiéndo-y priesa al home y por pocu, nun me mete una patada pa que vaya más sele jeje. Xuntámonos na última reunión, montamos el que creíamos primer rapel y según va baxando Dani ve que llega bien hasta'l suelu con dos cuerdes de 60 m, así que ye una bona opción pa facer la vía en menos de dos hores y baxar rapidín con un rapel bien plantáu.
Cola tarde atapeciendo y bastante fría, vamos recoyendo y de camín hacia Covarriella, onde tenemos los coches, flipamos coles semeyes que nos fizo Vero y les de Dani, cuando andábemos nes víes de deportiva.
Ensin tiempu nin pa una cerveza, despedímonos hasta la próxima, quedándonos con más ganes de facer víes de varios llargos y dir meyorando n'alpina... más info y les semeyes a mayor tamañu nel blogue del collaciu Dani Asturwaterman.
Ellí anduvimos apretando un pocu, faciendo Richar el V+ y 6a a vista, con meyores sensaciones nel Lobo Sigilos y llueu metí-y un peque a vista al Guía del Meicín, la cual salió apretando con un pasu cabrón, pero quedéme na última chapa mirando pa onde coño tirar al nun ver continuidá a la vía.
Cosa rara, qu'una vía bien equipada, quédese asina, ensin saber pa onde tirar, la última chapa con un maillón dizlo too. Les opciones pa descolgase xugándosela un pelín, ye facer una travesía ascendente a la última chapa del 7a (Rayos y Truenos), pero saber qu'anque nun seya complexu, nun permite fallu pol vuelu llateral y llarguísimu.
---------------------------------------------------------------
Güei, metimos nel bolsiellu, 6 víes pente'l V y el 6a, qu'ensín sentir los deos, paeciéronmos muncho más difíciles de lo que serán na rialidá.
No hay comentarios:
Publicar un comentario