Recuerda (Tierras del Burgo) - Quintanas - Lodares - Burgo - La Rasa - Navapalos - Vildé

7 d'Agostu de 2025

Track: Recuerda (Tierras del Burgo) - Quintanas - Lodares - Burgo - La Rasa - Navapalos - Vildé

Vacaciones per Soria y como siempre, toca facer monte o bici, o lo que se pueda, que nos alloñe de tar nel chigre hidratándonos, asina que madrugamos en condiciones y escapamos lo más ceo posible dar una vueltina en bici, conociendo un pelín meyor día a día, les milenta pistes, caminos y carreteres tranquiles pa facer bici de monte.

Siempre digo que ye un paraisu pa la bici de monte y siempre que salgo atopo percorríos afayaizos pa meter unos kilómetros moderaos en 3 o 4 hores, enantes de qu'entre la calufa infumable. Como ye vezu, intento tachar un vértice xeodésicu, por ruta, ya seya caleyando o en bici, asina que preparé una vueltina, na redolada del nuesu pueblu, Recuerda, que diba llevanos en parte a conocer un cachín del GR86 y de pasu tachar un vértice nel pueblu de la Rasa. 

 

Partimos de Recuerda col castillu de Gormaz al fondu

Saldremos pela carretera dende Recuerda, hacia l'antiguu puente sol rigu Duero, siempre baxo l'atenta mirada del castillu de Gormaz, cruciaremos el Duero y pasamos a rodar pela carretera cortada, col envís de garrar el camín que va facenos pasar peles Fuentes de Quintanas, onde tantes hores de fríos baños nos dimos tola vida .

Aportaremos al pueblu de Quintanas onde garramos el GR86, que pasa pel camín al Burgo de Osma, percorrriendo a la solombra de los pinares un llargu tramu de caminos con dalguna xubidina hacia la fastera de los Cuatro Mojones, pa posteriori descender hacia'l pueblu de Lodares.

Aportamos a Quintanas pelas Fuentes pa siguir pel GR86 hacia Lodares

En Lodares, perdemos ensin danos cuenta y siguiremos per carretera dellos kilómetros, hasta la puente col ríu Abión onde garraremos un guapu camín a la vera'l ríu con vistes al castillu d'Osma, anque podríemos dir pol GR86 pelos altos del Lomero, que ya ficiera va un par d'años dando un pateín col mió cadril desfechu reciéntemente.

 

Enllazamos de Lodares hacia la foz del ríu Abión continuando pel Ucero

Al terminar la foz del riu Abión, tendremos que parar xusto col entronque cola senda verde del ríu Ucero, ya que minutos antes, Miguel pinchara, asina que dempués de cambiar la cámara, siguiremos pela fresca senda del Ucero, pa continuar dempués dellos metros por carretera, antes de metenos pel parque industrial de la Güera, onde garraremos al final una guapa pista de tierra que va llevanos hacia la Rasa.

 

Empobinámonos hacia La Rasa dende l'Ucero pa cruciar el Duero

Na Rasa, tenía l'envís de conocer el vértice xeodésicu del Macrosillo (929 m), pero namás qu'averámonos a la Rasa, pente les millones de caxes de fruta, pude ver que'l vértice taba enriba del depósito d'agua del pueblu, poro imposible diba ser aportar hasta él, asína que dimos media vuelta pente les enormes plantaciones de mazana y averámonos hacia la puente sol rigu Duero, que travesamos y empobinámonos hacia'l desaniciáu pueblu de Navapalos.

 

Pasaremos per Navapalos p'ascender un puertín hacia Vildé

Fai munchos años, yera recurrente de guah.es, dir hasta Navapalos en bici, ya que daquella había xente recuperando parte del pueblu, en llabores de voluntariáu y pa nós, yera una aventura dir a ver jipis, recuperando un pueblu fantasma, ensin habitantes dende va unos años. Col pasu del tiempu, los pueblos de tola redolada, fueron tamién perdiendo xente, pero daquella Navapalos quiciás yera'l primeru del que teníemos conscienca de que taba abandonáu dafechu.

 

 

Siguiremos per carretera col castillu de Gormaz siempre penriba nuesa hacia Recuerda

Abandonamos Navapalos y subiremos el puertu homónimu, con vistes a les enormes plantaciones, non sin esfuerzu pa llueu descender hacia Vildé, pueblu ya visitáu en delles rutes corriendo y en bici, pa continuar dempués en descensu hacia'l rigu Duero, que ya nun perderemos del nuesu llau hasta la puente pembaxo del castillu Gormaz, onde recuperamos camín de nuevu hacia'l pueblu de Recuerda de nuevu.

En resume, siguimos conociendo caminos y carreteres sorianes en bici, pa componer una ruta de 45,5 km en 3 hores y 40 min, faciendo un desnivel acumuláu de +/- 445 m, tachando otru vértice y ganando dalgunes idegues más pa siguir dándo-y al pedal.

 

Camudando'l Camín sacando la bici a pasear per tierres del Duero