26 d'Ochobre de 2023
Casi nun sé dicir, cuando, nin cómo entamé a probar Esclavos del Grado (7c/+) na Cualladrona, eso sí, entamé a da-y pegues cuando nun tenía ganes d'afrontar na nuevu yo sólo. Asina que los pegues fueron, a sabiendes que quedábame pergrande.
Sicasí, fue fulminando al mió ritmu, ye dicir, ensin priesa, ruta tres ruta, hasta que n'Abril, llueu de facer Aker y Soul y Roca Norte, metíme con xeitu a por esta vía, dándo munchos pegues serios ya, algamando'l bloque en dalgunes ocasiones, abandonándola en Mayu, cuando vinieron unes selmanes de meteo fresca y tornamos a la Carba, al encadene de Distopia Primaveral.
Daquella tuviera dando pegues buenos con Rubén y esti final de branu y seronda, tornáremos a Esclavos tanto Rubén primeru, como Dani y Tolo dempués, quedándome sólo pa encadenar, ya qu'ellos fueron más rápidos nel encadene. Pela mió parte, tenía mui bien tola parte alta, pero anque ficiese'l pasu duru d'abaxu, había dalgo na parte alta, que me podría tirar hasta que camudé a salir pela placa con un métodu de Dani.
Ehí, ya camudó'l chip y tan sólo tenía que ser capaz de facer el bloque, ya que tol restu la vía yera casi capaz de facelo casi ensin reposar dempués del bloque. Los díes fueron pasando y los pegues tamién y ya na última selmana, enantes del cambeu d'hora, quedándome ensin lluz pa salir de currar de tarde y tirar a dar pegues, hubo que facer les últimes apuestes.
Nesa última selmana, fuera de martes a dar unos pegues alcontrándome cola meyor condición y ye que pola mió estatura, pa quedame d'esa regleta, necesito'l meyor tactu ya que llego de milagru n'estensión y necesito ser capaz mover pies dempués, sacar la manzorga a un invertíu y ya poder zarrar la presa clave, pa llevantar pies y siguir esguilando'l restu de la secuencia dura.
Nin con bon tactu fuí a facela y llueu de falar con Dani, qu'averose'l xueves hasta la Cualladrona por acompañame, volví con un día de calufa y sudor, que nada bono paecía que diba traer, pero por suerte o más bien insistencia estrema, fui a facer el pasu y llegando al reposu matándome, pa llueu centrar y nun fallar col encadene.
Enxamás, na mió vida, diera tantos pegues a una vía y nun tengo vergoña en dicilo (55 infames pegues) y ye que los que somos unos mataos, tenemos namái que la insistencia, el trabayu y ser testerón, pa facer víes qu'a lo meyor nin mos va bien, nin deberíemos perder el tiempu nelles, pero de momentu lo que prebo, lo encadeno, váyame bien o non... ya veremos si toca dalgún día abandonar proyeutu, alcontrando esa Rambla particular.
Con esto dicimos alón, a la Cualladrona esta la temporada siguiente, onde de xuru tendremos más víes a prebar, ya seya nel seutor de la Cualladrona, nel Texu u onde esos incansables equipadores, Fer y Poch, sigan creando tanto víes naturales, como retocaes en muries ensin cantu y enllenes de polvu blancu de cara norte.
Mil gracies pol trabayu collacios... ya nun soi Esclavu del Grau
2 d'Agostu y 13, 25 Setiembre de 2023
Va pasando'l branu y vamos centrando oxetivos, siendo un nuevu seutor que presentaremos en breve, el llugar onde más trabayaremos y escalaremos. Eso fizo, escaecer otros seutores de tardes de branu, como'l Callexón n'Otura o la cueva de Figares, pero por mor del cierre durante tantos meses, nin tan siquiera la so apertura en Setiembre, fai que nos piquemos en dir a prebar víes.
Poro, la Cualladrona, siguiera siendo otru requexu onde nun pasar calores escesivos y centrando proyeutu en Esclavos del Grado, na que continuamos nel intre dando pegues d'encadene llueu d'un trabayu fuerte pa dominar el bloque, ya que la rotura de la presa clave, fizo un pelín más duru quedase de la regleta n'estensión y sobretou pola mió altura.
De toes formes, tuviemos la suerte de que Fer y Poch, continuaron equipando no que yera'l seutor Texu, completando un seutorín, con sestos y sétimos con víes mayormente llargues y mui buenes en xeneral. Nesti sen, pude prebar y encadenar Too Cuchu, un 7a mui bloqueru y pelín suciete na parte baxa, que llevóme hasta un par de díes, demientres facía tamién dalgún sestu más del seutor.
Seutor Texu
--------
Too Cuchu (7a)
El Cuélebre (6c)
Cova Estramonio (6c)
El Texu (6c+)
La Papis (6a+ L1 - 6b L2)
Puristas de Galería (7a+)
El Hormiguero (6a)
Brunico Nort (7a)
El Examen L1 (6a+ ) / L2 (7a+)
A mi mou de ver, tuve la suerte d'encadenar y probar otros sétimos baxos como Puristas de Galería y el segundu llargu de El Examen, ambes rutes fines de pisar, con presa pequeña y güeveres que tanto me presten y peles que disfruto munchísimu.
Nuna dómina de baxa forma, costóme tres díes sueltos facer Puristas de Galería, esfrutándola muncho'l día del encadene, cuando taba proyeutando Esclavos y poro taba fuerte de nuevu y más guapa incluso, paecíóme El Examen L2 (7b nos croquis), que personalmente paezme 7a+ tamién, faciéndola al segundu pegue, dempués de pringar a falta d'una chapa por equivocame un pelín nos últimos movimientos.
--------------------------------------------------------------------------
4 de Xunetu de 2023
Continuamos faciendo lo que la patina va dexándonos y nun ye otra que dir a trepar día tres día. Anque llueu toque baxar mediu coxeando, durante'l tiempu que toi esguilando, con movimientos más controlaos, al menos pueu esfrutar de lo que más préstame na vida, tar nel monte y tar con collacios echando unes rises.
Ún de los llugares clásicos pal branu, sigue siendo y sedrá la Cualladrona, onde gracies al trabayu de Fer y Poch, amplíense pali pali, el númberu de víes nos dixebraos parés d'esta escuelina. Dexáramos va un par de meses Esclavos del Grado, a puntu caramelu, pero llegara'l tiempu frescu de nuevu y tuviera la oportunidá de tornar a la Carba, al otru llau de Peña Manteca, onde me pudiera llevar Distopia Primaveral.
El casu ye que cuando volvimos a intentar motivanos en Esclavos del
Grado, nun mos moviéramos mui allá pela vía, tanto pol nivel de
motivación, como pola humedá reinante, asina que viendo que taben
xurdiendo nueves víes nel paré del Texu, dexamos el seutor Cualladrona pa dir esguilar víes más "a vista" y más seliquines nel grau, como les qu'equiparon Fer y Poch.
Nun par de díes, pudi tastiar dalgún segundu llargu que metióse na Papis, que rondará'l 6b/+, quedando un llargazu bien guapu. Esi mesmu día, tamién pudimos probar El Texu, cotada de 6c+/7a, que más bien paeciónos 6c+ a los tres que ficímosla a vista.
A la escontra, probamos tamién Brunico Nort, que ya la probara ensin querer otru día sueltu, pensando que yera 6a+, viendo que mínimu yera 6c+ y mui desencamináu nun andaba ya que Dani al baxar, pensó claramente que merecía'l 7a y yo al segundu pegue tampoco fuera a llevámela por mor del bloque marcáu que tien na parte media.
Al segundu día, tuve la suerte de traer a Blas a la vuelta a la roca, compañeru d'entrenos nel One Move y viendo que taba'l día soleyeru, fuimos a siguir probando los regalinos que nos dexen los compis equipadores. Llueu de calecer nel Hormiguero, un guapu 6a, pasamos a probar El Cuélebre, vía de marcáu pasu con ciertu pire a la manzorga, que rondará'l 6c a mi paecer.
Finalmente, tocó metese de nuevu en Brunico Nort, onde pringamos el primer pegue nel pasu, acabando de montala y probando más curiosu. como facer el pasín. Cola vía montada, Blas, completó una tarde perfeuta, llevándose al primer pegue esti 7a, faciéndola al fin yo nel segundu pegue, desmontando la vía y yéndonos a esfrutar d'una birra bien merecía.
--------------------------------------------------------------------------
5 de Mayu de 2023
Continuamos esfrutando de la escuelina de la Cualladrona, onde pocu a pocu vamos cumpliendo oxetivos pa esta temporada. Digo temporada, pero como n'Asturies agora esguilamos tol añu, ya nun sé mui bien, cuando ye temporada de primavera-branu o seronda-iviernu, el casu ye que tenía na tiesta facer tres víes: Aker y Soul, Roca Norte y Esclavos del Grado.
Esti últimu mes, llueu d'encadenar Aker y Soul, centréme en Roca Norte (7b+/c), a la que malpenes l'añu anterior diera un pegue a mou de preba. Esta vegada, los pegues fueron pasando, garrando mis métodos, mis pies y sobretou dominando los llargos pasos que tien esta vía pa la mió altura.
Sicasí, los que somos unos putos mataos nesto d'esguilar, pues toca ser testerón enforma, sinon acabes dexando les víes ensin encadenar. Pero si dalgo dáseme bien, ye ser costante, garrar el puxu na propia vía y dir moviéndome cada día meyor, anque esta vía supuso un retu mental cayéndome nel últimu pasu duru hasta 12 vegaes.
A la fín, nun pegue de los míos, pegue pantera, ensin calecer, ya que taba montada por collacios como Poch y Fer, equipadores del seutor, algamé l'encadene, ensin fallu, ensin sufrir, un pegue d'esos que sal too bien y paez que vas hasta fácil pela vía... pero, esto ye, polos milenta pegues anteriores que-y tuve que dar... si yes malu, escala muncho.
--------------------------------------------------------------------------
1 d'Abril de 2023
Siguíemos coles visites semanales hasta la Cualladrona, probando dalguna vía nueva como Yo flipando y la Lola decotando, un 7a mui completu, que pudimos encadenar Ruben y yo, con un primer tramu físicu de diedru y col típicu regalín en forma de bloque p'aportar a cadena, eso sí, el currazo de protexer y sikar esta vía, nun quiero nin sabelo, así que podéis esguilala pero siempre faciendo'l diedru pela mandrecha.
Polo demás, quería facer nesta anovación del seutor, un llistáu de graos nes víes altes de la parte alta, que tengo probaes, anque ya sabéis que ye tan sólo, la mió apreciación, ya que toes fueron encadenaes a vista y pueden variar un pelín, anque lo más importante ye que la xente les escale y les llimpie, ya que tienen munchu furacu y poro, munchu matu por quitar ente toos.
Llistáu de víes:
Seutor Fayona
Costa Rica (V+)
Con tu mirada (6a)
Que así sea (6b)
Directa a la fayona (6a+)
Tras la lluvia (6a+)
El Diedro (6a)
El Escudo de Morcín (6a)
La Otra (6a+)
Pequeñas pero Matonas (6b)
Cinco Picotazos (6c)
Seutor Texu
--------
El Cuélebre (6c)
--------
El Texu (6c+)
-------
La Papis (6a+ L1 - 6b L2)
El Hormiguero (6a)
Brunico Nort (7a)
El Examen (6a+ )
Seutor Cualladrona
Beleño (6b)
Belladona (6b)
Amanita (6a)
Cicuta (6b+)
Como siempre dar les gracies a los equipadores y animáivos a probales y llimpiar les víes, ya son llargues y de muncha calidá toes elles, asi que vien mui bien pa rodar y escalar dalgo distinto a los avezáu n'Asturies, con pasos de bona presa de furacu a furacu.
27 de Marzu de 2023
Teníemos pendientes varios temes pela Cualladrona, llueu de la presentación d'esti seutor, nel que casi doi por seguru volverá a tener munchísimu ésitu esti branu. Como la meteo, sigue adelantándose y tamos en marzu con temperatures braniegues, pues tornamos enantes de lo esperáu a esti paré cara norte, que tantos díes nos llibró de la penuria en forma de calor que soportamos l'añu pasáu.
Nun contáremos grandes encadenes de collacios como Santos, que ficiera Esclavos del Grado (7c/+), llueu de munchos díes llucha, probándola con él y asegurándolo, hasta que finalmente llevárasela. Personalmente, ví que quedábame un pelín grande y decidime a escalar sin más, probando ésta, Roca Norte o Aker y Soul, según me diera más pereza una u otra.
Llueu de la temporada ivernal pela Canal, la vuelta per Cualladrona fue tou un bofetón a la dura realidá, en cuanto a la resis corta d'estes víes, prebando Aker y Soul de nuevu, colando'l primer día con un tastu bien amargu, viendo que nin Santos nin yo, yéramos a movemos pela vía como'l final del branu.
Los díes fueron pasando y fuimos ganando esi puntu más positivu algamando a cayer nel movimientu clave na parte alta, pudiendo garrar tola resistencia necesaria, asina como la xestualidá nos reposos y matizar les mínimes tonteríes, siendo capaz d'encadenala finalmente, nel segundu pegue del día, anque los díes anteriores ya yera a cayeme hasta tres vegaes nel mesmu puntu.
Magar d'esti encadene, continuaremos esta temporada con otros dos proyeutos que prestaríame retomar, como ye Roca Norte y Esclavos del Grado, pero tamién hai que dar importancia a los parés superiores d'esta escuelina, teniendo un muru más altu con unes 10 víes y dalguna más por terminar d'equipar, que pel momentu nun me paeció que pasase denguna del 6b, de les que fice, pero toes elles con metros de llargura y mui divertíes d'esguilar, poro merez y munchu la pena pa díes más tranquis.
Asina mesmu, enmediu, tenemos otra muria con 4 víes, más cercana al seutor principal, con dos víes a la manzorga que saldrán como 6a, guapes y llargues tamién y otra vía a la mandrecha más curtia que sedrá como 6a+, teniendo en mediu una vía que paezme pudiera rozar el 7a, con dos chapes mui marcaes, con mui mala presa y un vuelu poco recomendable... habrá que volver a probala.
Branu 2022
Tengo que remontame a dellos años atrás, na dómina na que la Puente taba casi completa y por mor del ésitu, con xente a esgaya tolos díes, el principal equipador necesitaba esparcer y buscar nueves fronteres, asina qu'acompañelu de paséu a mirar un paré na faza norte de Peña Manteca, viendo munches posibilidaes pal branu y munchísimu trabayu per delantre.
El tiempu pasó y perdimos contactu, suponiendo por mi parte que quedara nel escaezu esti posible seutor, viendo'l trabayu que ficiera nel Ramilleru, xustu na faza contraria, al llau d'otru seutor increyible como ye L'Argayu na mesma Peña Manteca.
Fai 3 años a la gueta d'un accesu a la crestería de Peña Manteca, alcordéme d'esti llugar y que la entrada al cresteríu per Cualladrona pudiera quedar bien guapu, viendo qu'a la fín, sí que metíeranse dalgunes víes, escaeciéndolo dafechu hasta esti branu del 2022, onde por pura casualidá, nun día gafu d'orbayu, alcordéme que lo mesmu podíemos facer una visita y ver si podíase trepar o al menos llimpiar dalguna vía.
La sorpresa ye alcontrame colos otros equipadores ellí, teniendo una charra amable, na que nos indicaron graos aprosimaos de les víes equipaes n'aquel momentu y los proyeutos que diben probando, asina que nesi primer día llimpiamos un pocu y ficimos les víes más cencielles del seutor principal, que yeren del anterior equipador, menos Via Claudia, un 6c perguapu, difícil de facer a vista.
Les visites diben siendo más frecuentes, les nueses y les de munchísimos escaladores asturianos, que como siempre pasa, diben enterándose de la esistencia d'un seutor a la solombra dende'l mediudía y con grau mediu con víes de desplome, de placa, más a bloque, de resistencia... es decir, un pequeñu xuguete pa los escaladores y pa los equipadores, qu'enfrentábense a una paré sucia, lisa y pocu agradecida, intentando crear dalgo curioso, no que pudiéramos gastar el nuesu tiempu los mediocres escaladores, que nun aportamos a esi maraviyosu e inalcanzable númberu 8.
Como yera d'esperar, pa los mataos como yo, que lleva más de 12 años ancláu nel 7a, llegó'l momentu d'apretar duru, buscando colos collacios otru retu más, como yera Ananay, una vía a bloque, na que los primeros díes, nun yeremos nin a movenos, buscando métodos, faciendo más kilómetros de bicicletes que los del Tour de Francia, hasta que'l magu Pulga, sacó un métodu que pali pali, fué convenciéndonos a toos y que terminó por ser el métodu final hasta qu'encadené Ananay nun pegue pantera, magar de muchos díes de montar y probar la vía, afinando pasu a pasu.
Hasta equí, toles víes yeren naturales y tocó siguir probando más víes, ya manufacturaes, ya que la paré según la visión de los equipadores nun daba pa más y a dicir verdá, a simple vista, nin ye una paré atrautiva nin da sensación de dar presa, enllena de polvu blancu, mugor y erma hasta de yerba.
Asina ficimos la Mona Chita, al segundu pegue, que rondará'l 7a+/b,
siendo quiciás esta vía, la más fea de les que probé y metímonos en
Esclavos del Grado (7c/+) que ye l'actual proyeutu, nel que tendremos
trabayu y munchu, ya que'l bloque de placa ye finu y caltién munchísima
resistencia na parte superior.
Nos últimos tiempos, púnxose mui de moda la escuela, visitando munchos escaladores esta escuelina, criticándose los tallaos con furia y modos poco correutos nel mió puntu de vista, ya que nos tiempos que vivimos, paez que gusta más escribir tola vida nuesa nes redes y dar opiniones gratuites, ensin falar primeru colos implicaos dende'l respetu al trabayu fechu, que fue munchísimu, lloñe ya de si en dalgunes víes fueron más o menos acertaes eses modificaciones non naturales.
Tallaos, refuerzos, rascaos y sicaos, húbolos tola vida, con más o menos
gustu, en grandes escueles y en pequeñes escueles, si vamos ser
puristes, si metemos una chapa ya tamos modificando'l paré y claro que
sí, a un equipador de xuru que-y presta pola vida movése peles sos víes y
puestos a criticar, prestaríame que nun s'equipasen y tallasen víes pa
xente de 1,90 que llueu tengo que dir volando pies per toles víes jeje.
Personalmente, tien munchu más delitu agrandar o modificar una vía equipada per otra persona p'adaptala a les tos condiciones escaladores, que tamién pasa y muncho, a que faigas con más o menos gustu una equipación o unos tallaos, porque como se diz por ahí, el que tien broca s'equivoca.
Por últimu... l'alderique tien que dase y facese dende'l respetu, pero non nes redes sociales, les coses fálense y pa eso hai clubs d'escalada que lo mesmu tienen que reunise y tratar el tema, pero siendo sinceros, si Cualladrona diba ser la referencia de la alta dificultá asturiana, pues que queréis que vos diga, menuda puta mierda, porque debe ser el muru más feu y desagradecíu de too Morcín y ya nin digo n'Asturies.
Vémonos na roca xente... y en Cualladrona tamién, anque seya roca norte y polvorienta.
No hay comentarios:
Publicar un comentario