martes, 12 de septiembre de 2023

Buyera (Santu Adrianu)

20, 26, 27 d'Agostu de 2023

Como presta dir trepar dellos díes per seutores nuevos, onde forzar los pegues a vista y sobretou si ye nel to estilu favoritu como ye la placa. Pa ello, les plaques de Buyera baxo la Cua'l Mar, son una maraviya, tando de moda enforma esti branu dende la so apertura va dellos meses.

Nun ye la primer vegada que tamos de visita, yendo pocu a pocu faciendo víes, dexando sestos siempre nel camín, pa tener víes pa calecer, anque haya qu'apretar en dalgunos, pa llueu intentar facer a vista dalgún sétimu, que quiciabes en dalgún casu tan pelín seles nel grau, pero son rutes cincu estrelles.

 
Dani progresando per Foz y Fesoria... llínea cincu estrelles

El 20 d'Agostu, averámonos Dani y yo hasta Buyera, col envís de facer víes a vista, ya que veníemos reventaos d'apretar per Morcín el día anterior. Entamó Dani, caleciendo músculos na clásica Maio, avisáu col bloquéu en cadena y yo pasé direutamente a prebar Foz y Fesoria, ya qu'unos collacios gallegos metiérense nel 6b de la manzorga, dando un espeutáculu d'encadene brutal.

Presta muncho ver apretar a muerte a la xente, caún nel so grau jaja. Llueu de ver matase al rapaz, metime na vía cola calma, saliendo del techín con un apretonín y negociando la placa fina ensin fallu pa siguir pol festival de cazos hasta cadena, saliendo a vista esti pepinazu de vía.

 
Kíla a lo suyu nel pié de vía

Col tastu perbono del encadene pa calecer, metióse Dani detrás faciéndola tamién al flash, paeciéndonos a los dos 7a sele, pero un rutón a repetir. Namái baxar, fui direutu pal Esculibiertu Danzarín (7a+/b) dando un pegue perbono a vista, pringando nun pasu finu llueu d'un reposu nun cacete nel que nun fuí a camudar manes curiosu pa reposar.

A la selmana siguiente, llueu de calecer nel guapu 6b de la manzorga'l seutor, púnxe-y les cintes a Sandra que llevóse al flash Foz y Fesoria, pasándoles a Esculibiertu Danzarín, pudiendo encadenala nel primer pegue, tando Dani como yo, quedándonos claro que 7a+ ye un grau correutu, nun llegando quiciás a esi 7b.

Sandra esfrutando cada día más de les plaques asturianes

Tanto al final d'esti día 26 como al siguiente, la lluvia fizo actu de presencia, teniendo que quedame namái, que cola preba d'un par de 6as, faciendo'l primeru col collaciu Serantinos, que pasóse per ellí a trepar antes de la lluvia y el domingu 27 con un día tarrecible, xubimos Sandra y yo, nun intentu de positivismu pente chaparrón y chaparrón, pudiendo facer namái que la vía D-Ruta na placa de la mandrecha y colando ya desesperaos d'andar dando vueltes tol día ensin poder trepar.

Quedamos con ganes de más, asína que tocará volver a Buyera y siguir probando estes prestoses rutes.

-----------------------------------------------------------------------------

19 de Xunetu de 2023

Llueu de munchos meses de trabayu, pegues y dalgunos encadenes per Morcín, tamién necesitamos alendar aire frescu y a la gueta d'esi sentir, averámonos un par de vegaes nestos meses, hasta Santu Adrianu onde recuperóse y amplióse la escuela de Cua'l Mar, equipando dos seutores de placa, que complementen a la perfeición la propia cueva.

A primeros d'añu ya ficiéramos Andrea y yo un primer intentu, nel que namái pudiéramos facer un par de víes na placa de la mandrecha, calteniéndose entá la placa de la esquierda ensin terminar d'equipar. Col pasu los meses, terminóse'l trabayu y darréu contamos con dos seutorinos perféutamente equipaos, quedando de referente pola llargura de les víes y la calidá d'éstes, la placona de la esquierda. 


Andrea fluyendo per Maio un 6c referente de Cua'l Mar

N'otra visita "desastre" con Santos y Silvia, malpenes tuviemos tiempu a facer dos víes a la esquierda de la Placa Drecha enantes de que metíerase la ñube aportando una vegada más orbayu de continu, teniendo qu'escapar del seutor, pasándolo pelín mal pa baxar peles cuerdes y destrepando colos perros, ya que l'accesu ye pelín abegosu en moyao.
 
Por suerte, el gran Xuacu Amieva, nun gran trabayu de desbroce, alcontró otru accesu más cómodu con un trazáu cómodu que déxanos direutamente na placa de la esquierda, poro na cabera visita con Andrea, aportamos a esti seutor y quedámonos na so parte central, pa esguilar esta vegada sí, con una meteoroloxía afayaiza.
 
Esfrutando de la guapísima Penitente Ascendente (6c+/7a)

Entamamos por Maio (nome del perrín de César, principal equipador del seutor) alcontrándonos con una vía preciosa de 6c, siguiendo una placa con fisura y metíendonos na cueva per un tramín de chorrera, con un pasu de bloquéu, quiciás un pocu llargu pa chapar cadena, lo que llevóme a tener que dar dos pegues a la vía pa encadenala.

Llueu continuamos con Como vaya yo encuentro, nunos croquis de 7a+ y n'otros de 7a, dando un pasu más na escalada de placa, con un par de pasos finos bien guapos, onde hai que pisar con decisión y poner a preba tamién les nueses yemes de les manes pero tamién el dolor de les dees de los pies cola presión de los gatos.

 
Día complexu no metereolóxicu echándonos la lluvia finalmente

Dempués d'esta vía, que paeciónos 7a, pasamos a Penitente Ascendente, que ya dende baxo, marcaba una línea 5 estrelles, dando tamién un par de pegues superdivertidos tanto Andrea como yo, terminando la xornada d'escalada con otra vía al primer pegue, que comparándola cola so compañera de la mandrecha, paeciónos sensiblemente más cenciella, con mui bona presa y por eso paeciónos más bien 6c+.

Por últimu, alcordáivos de tomar dalgo nel chigrín de la Buyera, ya que como siempre, tenemos que visibilizar que los escaladores somos un coleutivu qu'aporta a los conceyos y pueblos d'esti país y falar cola xente los pueblos, facer comunidá, amosar el nuesu respetu pola contorna y el nuesu aporte económicu a la zona, pueden abrinos puertes pal espoxigue del nuesu deporte.

Camudando'l Camín buscando condiciones en Cua'l Mar

-----------------------------------------------------------------------------


21 de Febreru de 2023

Martes d'antroxu, con una meteo pelín repunante, na que les previsiones pudieren ser de lluvia pal mediudía, tiramos Andrea y yo, hasta Villanueva, con munches ganes de conocer la Cua'l Mar, antigua escuela d'escalada que ta reequipándose y ampliando con dos muros triangulares a la manzorga de la cueva.

Aparcaremos nel area recreativa de la Buyera, onde tenemos vista de los muros y la Cua'l Mar, asina qu'ensin muncha perda, cruciamos la senda L'Osu y aína saldremos per un senderín xubiendo per una pedrera hasta unos pasamanos, onde tenemos qu'upar a los perros, pa ya continuar con menos problemes hasta'l primer muru de la mandrecha.

Vista de la Cua'l Mar coles sos plaques delantre
 
El día amenacia con llover, asina que nun perdemos más tiempu y entramos a les víes de la mandrecha, "Cosas de Familia" y "Amarillo Caliza", dos víes de corte alpinu, onde meyor nun cayer hasta la parte alta de la vía, ya que les numeroses terraces faen peligrosu un vuelu, asina qu'andái sollerte ya intentar asegurar tolos pasos, pa nun volar na parte más cenciella d'ambes víes, que rondarán los 37 m asina que tamién al loro cola llargura la cuerda.

Víes pelín alpines nos sestos de la mandrecha

Pa cuando terminamos de facer la segunda (6b), quiciás más guapa y continua que la primera (6a+) el día ya torciérase, amagando con un orbayu continuu, que fizo que diéramos un paséu hasta'l muru de la manzorga, onde César y el so fíu Oscar, continúen trabayando y equipando nueves víes, que teníen perbona pinta.

Peguinos na parte más dura del muru y visitina al muru la manzorga

Paez que paró un pocu y tornamos hasta'l primer murín onde Kíla y Rico buscaben abellugu de la lluvia, decidiéndonos en tres intentos a probar un posible 7a (Las Fesorias de Rubén...), pel que xubimos cola vía complétamente moyada, dándonos sensación de más cenciella que 7a, quiciás 6c incluso, pero tendremos qu'esperar tornar otru día, porque quedamos con ganes de más, pero la lluvía echónos dafechu.

Camudando'l Camín per Villanueva de nuevu

No hay comentarios:

Publicar un comentario