Caín (Valdión) - Dobresengros - H.orcadas d'Arenizas - H.ou Cerredu - H.ou Los Cabrones (Cabrales)

13 de Xunetu de 2025

Track: Caín (Valdión) - Dobresengros - H.orcadas d'Arenizas - H.ou Cerredu - H.ou Los Cabrones (Cabrales)

Alborecemos nel tercer día de Travesera Picos 2024 - 2025 en Caín y nel día de güei tenemos per delantre l'ascensión de la canal de Dobresengros, quiciábes una de les canales más mítiques y grandes de los Picos d'Europa, que por mi parte, tuve la suerte o la desgracia de percorrer en varies ocasiones.

La primer vegada que conociera esta canal remóntase a quince años atrás nuna travesía pente Caín y el refuxu de la Vega Urriellu, mientres que nel nuesu caso, l'oxetivu de la nuesa travesía ye'l H.ou Los Cabrones, onde asítiase'l refuxu más altu de Picos, rexentáu pelos collacios Jorge y Naiara.

Cares de cansanciu na partida del grupu en Caín (460 m)

Saldremos a les 9 la mañana cola mochila más cargada que nos díes anteriores, ya que vamos vivaquiar nes tiendes de campaña qu'ufrécenmos nel refuxu y los primeros pasos resiéntense de la ruta del día anterior a la Peñeblanca.

Despedímonos de los miembros qu'abandonen l'aventura per Picos, na nueche anterior, menos Pepa que llevántase a desayunar con nós, sacándonos la semeya de partida y los que continuamos avanzaremos hasta la Puente Grande sol Cares, onde podremos empobinanos hacia'l senderu que llévanos al sedu Mabru.

Partimos de Caín hacia'l Sedu Mabro prestándonos pola vida esti pasín tan vistosu

Fai quince años equivocáremos de sedu y acabamos nel entamu de la canal de Dobresengros, pero esta vegada vemos el desvíu correctamente y esfrutamos d'esti pasín vertical, usáu pelos traveseros pa tomar la canal de Dobresengros ensin pasar pela sienda del Cares. La verdá ye que prestónos muncho, teniendo guapes vistes del Cares, pesie al borrín mediu que paez que díbemos tener durante tol día.

Salimos del Sedu Mabro hacia la canal de Dobresengros

Metíos na canal de Dobresengros, nun damos tregua y damos zapatu ensin miramientos, anque a dicir verdá los ritmos nun son mui altos y ye d'entender ya que'l día anterior les 11 hores de ruta pesen enforma. Aportaremos al sedu de Dobresengros que sube pel Canalón p'ascender a la parte alta de la canal, empobinándonos con ciertu cansanciu hacia'l H.ou Grande.

Ascendemos Dobresengros pente la borrina pa salir al H.ou Grande

Saldremos a la fin del borrín que fue moyándonos y faciéndonos sudar munchísimo por mor de la humedá y agradecemos tanto les vistes como que'l sol nos caleza un pelín, ya que nun ta siendo un día de calor nin muncho menos, teniendo incluso que poner el chubasqueru a les mochiles ya que-y da por orpinar. 

Perguapu ambiente nel H.ou Grande que como siempre ye un llugar qu'impresiona

Tamos en domingu y cruciamos a varios grupos que van en sentíu contrariu durante'l nuesu paséu pel H.ou Grande, llugar que personálmente encántame y eso que tuve munches vegaes, sicasí al restu de los collacios-yos fascina, poro paramos un pocu a picar dalgo y a comentar tolos cumales que vemos dende l'auténticu coral del macizu de los Urrieles.

Penosa ascensión dende'l H.ou Grande hasta Arenizas Baxas

Llueu del descansu tendremos per delantre lo más cansino del día, l'ascensión dende'l H.ou Grande hasta la h.orcada d'Arenizas Baxas y ye qu'esta pedrera lloñe de meyor colos años, dalgunos argayos fízola más inestable y el sol nel intre nun mos ayuda n'ascensión, poro aportaremos a los 2341 de la h.orcada con un pesar nes pates perimportante, lo que tamién anímanos a nun facer dengún escesu de más con ascensión a cumales.

Increyibles vistes dende les h.orcaes d'Arenizas

Comentar, que díbemos pelín llentos de ritmu, siendo les 4 la tarde na h.orcada, 7 hores dende que saliéramos de Caín, poro decidimos esfrutar del tramu que nos queda y nun aventuranos en más hestories. Comentar qu'esta travesía puede completase con dalgún de los cumales del H.ou Cerredu (Boada, Tiru L'Osu, Coello), si vémonos con fuercia ya incluso, ascender al puntu más altu de los Picos, La Torre Cerredu, que teníemos en mente, pero l'estáu físicu del grupu nun yera'l más afayaizu.

Travesamos el H.ou Cerredu hacia Cabrones

Así que continuamos pasando dende la H.orcada d'Arenizas Baxa o Caín y la d'Arenizas Alta, asitiada a 2418 m, casi dosmil metros penriba de Caín, lo que tamién amuesa'l desnivel bestial que llevamos nes pates. Esta cabera h.orcada, sedrá la única dificultá del día, ya qu'alcontramos un pocu estalláu tol tarrén de descensu, así que tenemos munchu curiáu de nun tiranos piedres, faciéndose pelín abegosa la baxada al H.ou Cerredu y dalgo cansina la travesía pela so baxera hasta entamar ascensu hacia'l colláu col H.ou Negru.

Percorremos el H.ou Los Cabrones hasta'l refuxu

Lloñe de ser peligrosa, sí que tenemos que ser conscientes del tarrén onde nos movemos, poro con tar sollerte nun tendremos problemes pa baxar. Nós pasamos esti tragu y continuamos al colláu que danos accesu penriba del h.ou Negru a la entrada hacia'l H.ou Los Cabrones.

Enriba salúdanos gayoleramente'l Picu Los Cabrones coles sos aguyes pente'l borrín y embaxo nuesa ya vemos el refuxu, al que baxaremos ya per senderu munchu más transitáu, metiéndonos na borrina p'aportar a esti guapu llugar, que nun mos quier brindar una tarde seliquina de birres y grandes vistes, teniendo que tar incluso col plumas puesto, p'aguantar un ambiente fresco y húmedo.

En resume, travesía clásica pelos Urrieles, dura pol desnivel, pero necesaria de conocer por tolos montañeros que quieran llamar "piquistes". Los 13,5 km de percorríu nun dicen la realidá de los 2115 m de desnivel positivu nes 9 hores y 40 minutos de ruta. 

Camudando'l Camín una vegada más nel coral de los Urrieles