Caín (Valdión) - La H.errera - Oliseda - Peñeblanca - H.ou Miguel - Mesones

12 de Xunetu de 2025

Track: Caín (Valdión) - La H.errera - Oliseda - Peñeblanca - H.ou Miguel - Mesones

Segundu día de Travesera Picos 2024 - 2025 alboreciendo en Caín, llueu de la ruta a la Peña Vallines en Tierra la Reina, asina que coles pates ya calentines del día anterior, tenemos per delantre enfrentanos a un día potente de monte, queriendo ascender pela canal de la H.errera a la Peñeblanca, pa descender dempués pela canal de Mesones, completando unos dosmil metros de desnivel positivu y otros tantos de baxada.

Con esti plan, nun quedaba otra que madrugar asina que pa les 8 la mañana ya tábemos preparaos, cargando agua na fonte del Cainejo y sacando la semeya de rigor cola mesmísima Peñeblanca enriba nuesa, casi dosmil metros na nuesa vertical.

Grupu preparáu pa un día potente de monte en Caín (465 m)

Salimos camín alantre, siempre en continua xubida, aportando a Caín de Riba pela mandrecha, dempués de varies envueltes de camín empedráu y bien ceo ya tendremos la riega la H.errera delantre nuesa, metiéndonos pela so mandrecha, atopando'l senderu pelín tomáu, viendo a posteriori, que ye meyor garrala pela manzorga la riega, cruciándola xusto embaxo'l tabayón míticu d'esta guapa riega.

Tamos cola mosca tres de la oreya, ya qu'a dalgunos compañeros que dormíen nel albergue, nun-yos encomendaron a facela, ya que decíen que taba mui tomada, pero bueno, nun sabe bien la xente, a lo que-yos tengo avezáu pel monte astur, asina que somos testerones y el plan diba siguir alantre si o si. 

Vamos faciendo los primeros pasos entrándo-y con ganes a la canal de la H.errera

Dempués d'esta pequeña equivocación, ya vamos por senderu bastante bien pisáu, esfrutando munchísimu de caún de los pasos colgaos penriba la riega la H.errera, demientres el día va desperezando y les ñubes borrinoses baxes, van dando pasu a un cielu azul, que somos acolumbralu cuando miramos al llonxanu final de la canal, allá penriba nel H.oon d'Oliseda.

Esfrutamos munchísimu de los pasinos llaterales pela canal de la H.errera

El grupu va animáu, charrando gayoleru, ensin tener mui claro, como de duro va ser el día, demientres yo voi pensando en tolo que nos queda y mirando con lupa pero onde va llevándonos el senderu. Pali pali, vamos ganando desnivel y llegamos a una primer viesca d'ablanos, con bien d'años, que ta perfeutamente desbrozáu, faciendo camín pente ellos, hasta aportar a la primer dificultá de la canal, los sedos d'Oliseda.

 

Facemos el primer sedu d'Oliseda ensin mayores problemes a pesar de dalgún pasin espuestu

Tenía alcordanza que la última vegada que pasara pel sedu d'Oliseda, había una cuerda pero nel intre, veo les argoyes, pero nun tenemos cordino, asina que paso'l primeru y voi indicando a tol mundiu un pocu los agarres pa que nun-yos eche pal vacíu el pasu en cuestión.

Magar del primer pasín espuestu, que fízo-yos pasar tensión a dalgún del grupu, ya vamos sacando'l restu del sedu ensin mayores problemes, anque perdemos un pocu la traza y vamos salir demasiáu altos, a una h.orcadina superior, qu'aposteriori fízonos perder desnivel en travesía hacia'l senderu, con dellos pasos un pocu espuestos en tarrén amestáu de yerba y roca. 

 

Echamos bones rises nel tramu d'ablanos hacia la mayada d'Oliseda

Solucionáu la pérdida a la salida del sedu, ya toca ascender hacia la mayada d'Oliseda, teniendo un tramu tomáu d'ablanos, nes qu'echamos unes rises, viendo a la xente bregar pente los ablanos, pero la traza del senderu síguese bien y na realidá son dos pasos de bregar y ya se sale penriba los ablanos hacia agora sí, la parte alta de la canal de la H.errera.

Entamamos l'esfrute total de xubir pela parte alta de la canal de la H.errera

Pararemos unos minutinos a esfrutar del macizu de los Urrieles enfrente nueso y calmar un pocu la tensión y agora sí, enfrente nuesa, tenemos la segunda parte de la H.errera, que nun tien denguna dificultá, pero y ye un pero grande, la parte física entra n'acción y toca tirar de pierna y cabeza. 

Personalmente, lliberáu como me siento, dempués de quitanos les dificultaes d'enriba, entamos a meter ritmu, hasta que veo que per detrás, nun va'l tema físicu como debiera, asina qu'entramos nun ritmu de camina-para, camina-para, pelín llentu, ya que tenemos delles ñubes de formación tormentosa, que nun me presten res.

Tramu final perguapu de la H.errera pa entrar nel H.oon d'Oliseda con vistes brutales 

Comento la xugada colos compañeros, viendo que lo mesmu toca abortar l'ascensión a la Peñeblanca viendo les ñubes que tenemos pel H.oon d'Oliseda pa la fastera asturiana y descuélgome a falar cola xente d'atrás, ya que munches vegaes, cuando nun se va bien físicamente, bastante tienes con dar un pasu tres d'otru como pa esmolecete, si vamos tener marrón tormentosu o non.

La nueche anterior, demientres cenábemos en Caín, cayó una esbastiada brutal, con xarazos como pa meter nel chacharru, poro, falo cola xente d'atrás y coménto-yos que vamos xustinos de tiempu cola meteo, siendo conscientes y decidiendo non ascender a la Peñeblanca y dir ganando tarrén a la meteo, continuando la travesía.

Facemos ascensión esprés a la Peñeblanca demientres el restu los compañeros van hacia Llombreras

Pa cuando aporto a la cabeza del grupu de nuevu, tan dando-y vueltes tamién a la xugada, comentándo-yos que vamos dexar les mochiles na bas de la peña y que demientres van faciendo camín los demás, los que quieran xubir, vamos facer una ascensión esprés hasta'l cumal, xugando un pocu a la ruleta coles ñubes ya intentando ser un pelín positivos.

Cola ruta bien asitiada na memoria, dende aquella doble ascensión con Fernan a la Peñeblanca y la Robriza, dígo-yos al grupu que vamos metenos caña y tiramos a fueu p'arriba, tirando namás que con bastones, siempre faciendo una diagonal hacia la collada cola Robriza, con una peña con forma de cabeza de alien, como referencia clara a siguir.

Perguapa ascensión a la Peñeblanca siempre cola Robriza presente

Aportaremos al final de la diagonal hacia la collada y ya casi n'arista tan solo tenemos que facer un pequeñu trepe y ya ganar l'arista hasta'l cumal de la Peñeblanca, onde facemos tetris p'algamar una semeya de grupu, que nun tengo mui claro el por qué, desapareció del álbum, poro, póngome yo de solanes nel cumal, llueu de la soba que me toi pegando pa xestionar al grupu yendo p'arriba y p'abaxo de continu.

Semeya na Peñeblanca (2194 m)

Magar de les semeyes de rigor, de comentar lo guapo del cumal, les ñubes hacia Asturies, paez que dixébrense un pocu, pero nun me fío asina qu'entainamos la baxada lo másimu posible y aporto a la mochila, xintando mediu sandwich y decidiendo tirar hacia la collada Llombreras, onde toi en contactu por walkie col restu los compañeros, demientres los ascensionistes queden xintando con más calma.

Distintes partes del grupu en dellos momentos de descansu y baxando hacia'l H.ou Miguel

Pego una ascensión a fueu otra vegada hasta la collada Llombreras, ya que los compañeros nun vieron clara la baxada hacia'l H.ou Miguel, pesie a llevar el track y cuando llego arriba acompañáu de Marcos, vamos dir baxando per un tarrén, que siempre paecióme una pasada, descendiendo per una guapa cincha que terraceando baxo les Torres de los Cabrones, va dir faciéndonos descender al H.ou Miguel, col pasín míticu de llambries baxo l'atenta mirada del Tiru La Llera.

Increyible pasu pel H.ou Miguel bordiando Piedralluenga hacia Mesones

Coles ñubes amenazando pero más tranquilos, ya bordiaremos los murallones de los cumales de Piedralluenga metiéndonos xusto na base d'esta na borrina, poro, falamos polos walkies y vamos facer reunificación de grupu ya que veo, que los compañeros que tuvieron en Llombreras esperándonos, recuperaron estupéndamente y taben baxando a un ritmu estupendo.

Entramos na guapa canal de Mesones, verde como poques vegaes

Asina que tol grupu xunto, vamos esfrutar del verdor de los praos de Mesones, ya qu'esta primavera fuera bien lluviosa, poro tamos nun paisaxe perguapu, abriéndose a ratos les ñubes, pa dexanos ver los puertos de Cuba y les sos torres de los Cabritos y descender cola vista puesta na mayada Mesones, con tol macizu central enfrente nueso y cola canal de Dobresengros enfrente, oxetivu del siguiente día.

Pasamos pel guapu sedu de Mesones pa encarar la parte final

El grupu va dixebrándose pali pali, colos ritmos de baxada adecuaos al estáu de forma de caún, yendo alantre guiando hasta'l sedu Mesones, puntu pelín espuestu de la baxada na que voi al tanto del grupu y ya al altor del tabayón de la riega la Pasada, comento que voi tirar corriendo hasta Caín, que tengo ganes d'entrenar y despeyar la cabeza que guiyar a un grupu grande, tamién merma mentalmente, al ver a la xente pasar tensión.

Tramu final de la canal de Mesones a Caín

Nel intre, tiréme corriendo desesmolecíu pol grupu, que ya nun tien perda nenguna baxando, anque caltengo contactu por walkie y esfruto d'una baxada rápida, plantádome en venti minutos en Caín, non ensin echar un vistazu a la H.errera de la que paso al so llau, despistándome y baxando de nuevu pel camín pel que xubiéramos, anque pudiera baxase pel Sedu dende Caín de Riba a Caín de Baxo.

 

Sentáu nel prau, onde tenemos les furgonetes, espero ún a ún a los compañeros, con una cervecina y patatines, que van llegando pente media hora y una hora a Caín, dándonos una abrazu al aportar, ya que la ruta fue de les que queden n'alcordanza.

 

En resume, circular increyible, cola H.errera como puntu fuerte, pero sin desmerecer tol tramu per Oliseda, l'ascensión a la Peñeblanca y pal que nun lo conoza, l'enllaz pel H.ou Miguel a Mesones ye una fastera perguapa. Los datos pues, 15 km, +/- 1915 m de desnivel acumuláu y un total de 10 hores nel mió caso y 11 nos últimos compañeros qu'aportaron a Caín.

Camudando'l Camín nel H.oon d'Oliseda