Visitina esprés hasta Carbes, nun finde de munchos recaos que nun mos dexó escapar en furgo, asina qu'aprovechando que daben ñubláu, averámonos hasta Carbes pa tener una esguilada tranquila, contando con qu'anduviese mediu mundiu nel alcuentru d'escaladores de Teberga y asina fue, que tuvimos solinos estupéndamente.
Calecemos tiesta y músculos nes víes cencielles de la manzorga, repitiendo Shei, Misógino y metiéndome yo, nuna nueva qu'hai a la esquierda de la que nun alcontré información, ye una vía llarga, del altor de Madame Butterfly, con un tastu alpín que nun fuera nin a saber grau, dixéndome Shei, a última hora del día que pa ella sería V+, faciéndola pa finalizar el día.
Pa terminar de calecer, ensin quitar nin los gatos, tiro a Madame Butterfly, que camudaron el percorríu de cuando ficiérala yo, asina que tiro p'arriba, paeciéndome cláramente que llega al 6a, ya que nos metros añadíos, tien un retechín nel que toca saber per onde salir y apretar un pocu, poro V+, quédase pelín curtia.
Llueu de calecimientu, póngome a mirar nel móvil a ver si tengo los croquis "actualizaos" pero nun somos a alcontralos y toi un ratín intentado descifrar lo que tengo fecho y lo que non, metiéndome a lo que yo creía que yera un 7a nuevu (Super Jose en Vertical Life), pero ensin sabelo metime en Castiellu Simpáticu (7b) sacando a vista'l primer pasu, quedándome un ratu llargu nun reposu de desplome, intentando pescanciar pero onde se supone que salía'l 7a porque veíalo duro tirar a la mandrecha hacia una chapa solitaria.
Al final, dempués d'una lluchada brutal, salgo a la manzorga nun se bien como, saliendo a posteriori pola reunión d'Abrocanomacho. Lo dicho, mirando a posteriori, fice una variante raruna, que bien le daba 7a, pero buenu, lo que faltaba, onde ya nun me presten les rotondes y variantes, escaezo esta ascensión claramente.
Turno de Sheila, que métese a La sombra del Vespino y la enchufa nuna lluchada épica poniendo cintes y pasando un mieu atroz, pero buenu, vese que va garrando puxu pocu a pocu y la llucha mental va siendo igual d'intensa, pero con resultaos positivos, así que toca siguir avanzando.
24, 25 de Mayu de 2025
Finde d'escapada escaladora col envís de facer retomar un pocu a la compañera nesto de la escalada y como Shei, tenía munchu apreciu a Carbes, p'allá que tirámonos a ver que podíemos facer xugando col sol, asína que la idega siempre fue madrugar dientro de les posibilidaes y trepar hasta que nun s'aguantase, pero la verdá ye qu'entra la solana antes de lo camentáu y los pegues tienen que ser esprés.
Sicasí, el sábadu tiramos hasta'l seutor Principal, onde tuviemos solos tola mañana, al igual que durmiendo na Collada d'Amieva, asína que perfeutu, pudiendo repetir Misógeno (V+) pa calecer, Diente de Tiburón (6b+) que ye buenísima, Abrocanomacho (6c), brutal tamién y faciendo a vista un 6c+ nuevo (Gracias Pingüi) qu'entra a mi entender por Abrocanomacho y que ye buenísima y durina pal grau, vamos, qu'apreté como un cabrón pa facela.
Al día siguiente, llueu de pasar una tarde estupenda de merenderos y ríos y de parar en San Román, que taben de fiestes, a la xubida a la Collada pa dormir, averámonos de nuevu hasta'l Principal pero había muncha xente y más perros, asina que tiramos hasta'l Gardaleyu a ver que podíemos facer per ellí.
Entrámos-y a el Rey Gardaleyu (6a+) flipando cola llínea, lo completa que ye con un diedru preciosu con tramu finu y tramu físicu na parte alta, una pasada de ruta que Shei lluchó pa encadenala quedando ya satisfecha pa tol día. Al baxar púnxome les cintes a un 7a (Deslizdelet) del que nin había referencies en denguna páxina, asina que metime a vista total, porque nun había res de magnesiu per dengún llau, pegándome una de les mayores lluchaes nos últimos tiempos pa poder facela, paeciéndome totalmente brutal la vía y superfina d'escalar.
---------------------------------------------------------------------------------------
24 d'Agostu 2020Siguimos trepando per Asturies y ún de los díes, apetecióme tornar hasta Carbes a ver si rematábemos dalguna viuca que quedaba nel tinteru, pero faciendo tal calor, preferimos dar un paseín a un llugar escondíu que conociera de delles rutes pa pegar un bañín coles perrones.
Magar del bañu, el que pudo, que l'agua tan frío nun la soporto muncho, pasamos a tomar el vermú pel desfiladeru Los Beyos y cuando a la fín, baxó'l calor ya incluso ñubose, fuimos hasta Carbes a trepar un ratín, faciendo Nus dellos sestinos guapos a la manzorga'l seutor principal.
A mí, tocóme probar Little Big Wall (7a) que tenía pendiente, faciéndolo al segundu pegue, con un pasu cabrón de placa na parte baxa y un esfrute total na parte cimera onde la caliza camuda esi sen gris pel colloráu, con unes preses pinchudes nun desplome dafechu increyible.
Una vía bien guapa, al igual que'l restu de sestos altos del seutor que ya tenía, quedándome pa otra visita el 7b col que piesllaríemos toles víes d'esti seutor, teniendo que pasar a visitar un seutor dalgo escaecíu como ye'l del Gardaleyu.
Finales d'añu y dómina de primeres ñeves y lluvies n'Asturies, poro tocaba restolar pente les munches escueles asturianes, una cara sur onde los parés tean más menos sequinos. Pudiéramos dicir que'l seutor principal de Carbes pola so caliza porosa ye perfeutu pa la esguilada n'iviernu.
Un par de díes, averámonos per ellí y magar de ventilar toles víes de los seutores de les Pedroses, tocaba metese más en serio nesti seutor Principal. Tampoco ye que tocase les víes más dures, pero sí que me sorprendió la calidá de les víes y de la roca.
Asína que nestos dos díes, pude probar les víes d'Erosión, La Sombra del Vespino, Diente de Tiburón y Abrocanomacho y son d'estes víes que nunca me cansaría de repetir y amás nesti orde porque van dende'l 6a+ y el 6c y a cada cual meyor que l'anterior.
Con esto, ya namái que queda averame otru día más tranquilamente ya intentar facer les dos viuques de sétimu grau que me queden nesti seutor. Eso y ver a quien convenzo pa volver al Gardaleyu, onde tuviemos dalgún sustín colos morrillos sueltos y la equipación vieya, jeje.
Tornamos una vegada más hasta Carbes y ye que tan sólo poles vistes esta escuelina ya me val pa pasar el día, ensin tan siquiera averame a los parés. Por suerte, tolos díes que pasamos per ellí nos caberos meses, alcontrámonos con díes espeyaos enforma y nun se podía tar más a gustu anque teamos en plenu iviernu.
De les tres vegaes, dos delles venía dempués de carreres pela redolada, colo que mui bien físicamente nun m'alcontraba, pero'l día que fuimos a costafecha, arrancamos con toles víes del seutor de Pedroses 2, que yera más menos tolo que quedábame por probar.
Son díes d'esos, que vienes con ganes, tas motiváu y entamos d'un llau pal otru colo que te queda y vas sacando a vista, ya incluso con cierta facilidá toles víes. Sicasí, lo más importante ye qu'averáronse hasta'l seutor dellos collacios de la fastera oriental colos que más tarde compartimos unes cerveces en Cangues d'Onís y eso failo muncho más prestoso si cabe.
Más menos, quedábenme toles víes pente'l 6a+ y el 6b+ nel seutor y pesie a ser finales d'Avientu, toles víes teníen un tautu brutal y tando sequines nun había fallo. Hai que dicir que tamién ye'l seutor más esguilao y poro nun hai dulda coles preses, tan sólo toca apretar y encadenar.
A la escontra, tenemos los primeros seutores equipaos, el Principal y Gardaleyu, qu'en visites posteriores y quiciás con dalgo de pior tiempu, sobretou pol vientu molestu, nun mos dexó esfrutar del día tolo que mos diba prestar.
Per últimu, ficimos otra visitina pa conocer el seutor del Gardaleyu, que mirando los croquis pinta estupendo, pero que cuando aportes, atopes un seutor dalgo abandonáu y lo más estraño, pocu saneáu, ya que durante los dixebraos pegues siempre tiramos dalguna peña, unes vegaes queriendo y otres col sustu arreyáu.
Pente los bloques sueltos y los fallos nos croquis, nos que ponen que con cuerda de 70 pueden xunise los dos llargos de munches víes y nin siquiera la de 80 llegaba afayaizamente, colamos d'ellí pelín desilusionaos ya que pintaba muncho meyor.
El tema ye que debiéremos tener munchu curiáu colos metros de cuerda y fianos de los croquis. Personalmente, metíme a facer un 6a de 25 m con segundu llargu de V+ de 10m según tolos croquis y cuando llevaba 4 chapes con allargue del segundu llargu ya entamé a avisar que tuvieren al tantu de la cuerda pel descensu.
Namás aportar al suelu, gracies al chicléu, namás soltar la cuerda esta coló esta la segunda chapa que taría penriba los 6 metros, asína que la vía rondaría más bien los 42 o 43 m y non los 35 de toles guíes.
Lo dicho... nun vos fiéis nin de les guíes, un ñudu al final de la cuerda y sollertes a les llonxitues de les víes y a la de nuesa cuerda, sobretou si andamos pegando campanazos y cortando cabos y nun controlamos los metros reales de la nuesa cuerda.
Hai díes nos que val más aceptar la situación y puntu. Llevántome un sábadu contentu, polo bien que lo pasé'l día anterior na espicha bloquera del Indorwall, pero cansadísimu ya que fueron hores blocando y blocando ensin parar y tamién tomando cerveza.
Al día siguiente, quedara col grupu d'escalada pa pasar otru gran finde y p'allá que nos vamos Kíla, Haritz y yo, pa llueu xuntanos con Zori y Richar en Cangues d'Onís onde durmieren el día anterior, col envís d'almorzar y ver si garramos un pelín de puxu pa pasar el día.
Organizámonos, mercamos xinta pal día y tiramos pa Carbes n'Amieva onde teníemos ganes de facer otru día d'escalada dempués del bon tastu de l'anterior visita. Allá aportamos y vamos hasta'l segundu seutorín de Les Pedroses magar de ventilar toles víes n'Abril.
Zori y Richar per un llau y Haritz y yo pel otru, entamando como non pelo más cenciello, encadenando un par de quintucos pa calecer, dándome cuenta que la pelleya los deos ta na llende, ye más soi a ver como téngola a puntín d'abrise.
Nun m'alcuerdo, si pente pitos y flautes fáisenos tarde y decidimos picar daqué pa trepar dempués con más ganes o si fuí a probar siquiera'l 6a+ de la mandrecha d'estos dos quintos, pero llueu de la xinta entróme tal baxona que nun fuí a facer muncho más.
Arrastréme como pude per tres quintucos más de tarde y casi durmíame asegurando. El mió cuerpu ya nun daba pa más y taba pidiendo un respiru, poro encadené un últimu 6a, pa qu'Haritz pudiera entrá-y con ganes y les cintes puestes y lu dexé.
Al día siguiente tenía carrera en Sayambre y como non, superaba alégremente la media maratón y sólo pensaba que diba durmir nuna tienda campaña y que diba pasales más putes que Caín. Sin más, dexé de trepar, aseguré lo que pude a Haritz y nos fuimos a montar el tenderete nes altures d'Amieva pa poder cenar a la lluz del frontal.
Delles cerveces y sidra dempués, rendíme na tienda con Kíla, qu'apegóse a mí pa dar calorín y fuímos a descansar pente vaques cencerriando y caballos castrones averándose a la tienda. Al día siguiente en Sayambre y sorprendéntemente, entamaría un nuevu xeitu de correr nes carreres, yendo en seriu y tirando fuerte.
3 d'Abril de 2016
Un domingu cualquiera con unes previsiones cualquieres p'Asturies, ye dicir, lluvia, vamos intentar facer dalgo pela roca y nun tiramos como casi siempre hacia l'Oriente, col envís de ver si pa la Playa Cuevas en Llanes aguanta'l día.
Nun tenemos tanta suerte y una vegada que tamos en Nueva, nun para d'orbayar nin de casualidá, así qu'almorzamos con tranquilidá y decidimos probar suerte un pocu más hacia'l sur pel valle'l ríu Seya, averándonos hasta Amieva.
Esisten delles escueles n'Amieva y nunca tuvi la suerte d'averame a conocer denguna, asína que la cosa promete, decidiéndonos por Carbes, a la que cuéstanos un pelín aportar, pero quedamos alloriaos al comprobar qu'apárcase'l coche embaxo de los seutores, ensin aproximación dala.
En concretu centrámonos nos seutores de Les Pedroses, onde tenemos graos cenciellos pa esfrutar d'una mañana hasta que les ñubes decidan que ya tengamos abondo. Dividímonos en dos cordaes y vamos intercambiando víes según les vamos sacando alantre.
Dicir que ye una escalada sensacional, que dióme personalmente munches idegues pa entrenar n'alpina ya que les posibilidaes de autoprotección son enormes, pudiendo aprovechar una segunda visita pa trastear.
Anque nun soi mui de tornar a seutores nos que ya tenga toles víes encadenaos, nun m'importaría da-y n'alpina a dalgunes de les 6 víes que formen esti pequeñu seutor de Les Pedroses 1, con graos pente'l IV+ y V+, siendo toes mui recomendables.
Poro tornaremos de xuru... les Pedroses 2 con 16 víes más, ta esperándonos... tiempu tendremos d'apretar nes sos víes y tamién de trastear nes Pedroses 1, que menudu xuegu puen dar anque seya repitiéndoles.
No hay comentarios:
Publicar un comentario