martes, 14 de marzo de 2023

Kangas Mountain (Cangues d'Onís)

4 de Marzu de 2023

Track: Cangues Montain (Cangues d'Onís)


Web del Trail: Cangues Montain (Cangues d'Onís)

Clasificaciones: Clasificaciones 2023 

Tornábemos a correr en Cangues d'Onís, cincu años dempués, quedándome ensin dorsal pa la Original de 33 km, nun sabiendo mui bien que facer, decidiéndome al final, por intentar superame un pocu y correr la Maxi Trail de Cangues de 58 km, másima distancia y de mayor desnivel a la que diba enfrentame, llueu del Desafiu Somiedu del branu anterior.

Nesti sen, sabíemos que la carrera con terminala, abríanos la puerta a dir apuntándonos a la mítica Travesera, pero bono, tampoco ye que fuera un aspeutu definitivu, sinon qu'apetecíame probar más distancia y ver si yera capaz de regulame curiosu y facer una carrera mediu intelixente.

 
Ascensión al Picu L'Arbolín... pelín afogáu que díbemos

Como nos grandes eventos, fuimos pa Cangues d'Onís, a durmir na furgo, topándonos con munchos collacios del GM Xuan de la Borrina, pasando una tarde-nueche estupenda, cenando y tomando unes cerveces enantes de dir a sobar, descansando bastante mal, pa ser sinceros, espertándome a les 3 de la mañana, dando vueltes el restu la nueche hasta les 6 de la mañana que sonó l'alarma.

Vestise na furgo, echar una güeyada nel bar de la Estación, con poca pinta d'abrir, yéndome hasta la gasolinera, onde pude tomar un cafetín, mercar dalgún donuts, una isotónica y agua pa salir bien hidratáu, escaecíendoseme coles prises el frontal, necesariu a dicir verdá pa les primeros venti minutos, que pude facer tranquilamente gracies a la montonera corredores que xuntámonos a les 7 la mañana pa facer esta Maxi Trail de 58 km y 3500 positivos.

 
Los dos alloriaos que participamos na Maxi Kangas

Na salida xúntome con Alberto y Natalia, que sácanos una semeya de salida, arrancando peles cais adormecíes de Cangues, con dalgún qu'otru vecín, aplaudiendo dende les ventanes al nuesu pasu. Los primeros kms sedrán más rápidos de lo que diba prestame hacia'l picu Arbolín, aportando en pocu menos d'una hora, decidiendo dexar qu'Alberto tire a sos ritmos y ver si soi capaz d'alcontrar la mió carrera, ya que taba faciéndoseme pelín abegosu siguilo.

Ya más tranquilu, garré un grupín col que fuí alternando posiciones, charrando dempués de Les Roces, con un corredor de Madrí, con muncha esperiencia en ultres, asina que tomelu como referencia, faciéndoseme un poco más amable tol tramu de carrera pel Cantu La Cerica, anque a la baxada final hacia Cangues, tuve que baxar ritmu, porque ví que nun me sentía mui bien.

 
Cruciando dos pontes claves na Kangas Mountain

En Cangues tuve un bon ratu, esperando a ver si alcontrábame con más compañeros que facíen la Original, pero nun tuve la suerte, asina que xinté lo que consideré, recoloqué les zapatilles con calma y salimos pel Puente Romano, hacia'l picu La Cogolla, compartiendo un tramu colos de la original, lo qu'agobia un pelín al xuntanos tantos corredores, con tiempos y oxetivos mui distintos.

Separámonos al fin y entramos nun tramu de carrera llarguísimu, nel que vémonos mui pocos corredores en tola xubida, faciéndose per llarga l'ascensión, teniendo na crestería final un par d'amagos de calambres, dalgo normal dempués de 5 hores de carrera.

Nel avituallamientu, el cuerpu pide enerxía, asina que metemos barrines enerxétiques, charramos calmao colos voluntarios y salimos caleyando sele, pa ver si les pates vuelven a furrular, controlando los calambres con sales y bebiendo muncha agua, algamandos una baxada hacia Avalle, más que positiva, compartiendo tramu con corredores del Horizonte.

Xubida hacia Següencu puntu clave de la carrera
 
Nesti puntu, ya conocemos bien el restu la carrera, cola xubida hasta'l colláu Andrín, la cual faigo percómodu, sintiéndome bien, anque la baxada hacia Tornín, dizme que tengo que regular, que queda muncho por delantre, aportando al avituallamientu con un compañeru del Horizonte y col corredor madrilanu, entamando la temida xubida a Següencu, pela nomada pedrera.

Como siempre, la pedrera nun ye lo pior, sinon que la pindia xubida pela viesca hasta l'últimu avituallamientu del día, faise perduro pol calor, polos kms que llevamos enriba y les hores (8 hores y 36 min). Una vegada más, toca tirar de cabeza, tomalo con calma, beber, xintar un bombón de chocolate qu'ufreciéronme y facemos la cabera xubida hasta L'Altu Següencu y entamábemos la baxada final hacia Cangues sabiendo que ya taba casi fecha.

 
Aportábemos a meta dempués de 9 hores y media de carrera

 Paez mentira qu'una baxada tan correndera y prestosa, si vas con pates, atragántese tanto, adelantando delles posiciones na primer parte, alcontrándome colos últimos de la Original (munchísimu méritu, que diben sofriendo lo suyo) hasta Ñeda, onde véome bien apretando na xubida y pagándolo nos últimos kilómetros de baxada, tocando controlar munchísimu pa nun terminar la carrera con calambres.

Finalmente, corríemos peles cais de Cangues d'Onís, entrando na meta, con collacios y tolos compañeros del GM Xuan de la Borrina animando, faciendo un total de 9 hores y media clavaes, no más baxo del intervalo que tenía en mente entre 9 y media y 10 hores.

En resume, carrera intelixente per primer vegada, sin cebame, con dalgún tramín de sufrir por cansanciu, pero regulando munchísimu los calambres, sabiendo soportar llevar el frenu manu echáu, terminando na posición 114 d'entre 222 parcipantes lo que nun ta mal del too, pa ser una carrera tan llarga y dura.

3 de Marzu de 2018

Track: Cangues Montain (Cangues d'Onís)


Web del Trail: Cangues Montain (Cangues d'Onís)

Clasificaciones: Clasificaciones 2018 


Un añu más, volvíemos a querer correr en Cangues d'Onís y queríemos facelo bien, motiváu y entrenáu, pero otra vegada más, tocó venir a sufrir problemes físicos. La verdá ye que taba entrenando bien, ensin molesties nel piramidal, pero la temporada de carreres curties de primeros d'añu, tornaron a pasar factura y rematóme la ruta raquetera de la Carba Valsecu.

Magar de pasar tiempu ensin notar sobrecargues na pata drecha, durante la selmana anterior a la carrera, ya veía que díba cargándose'l ximielgu nos entrenos. Así qu'apaecimos per Cangues, con sensaciones non mui positives que digamos.

Saliemos de Cangues con cierta ilusión

Xuntámonos un bon garrapiellu de collacios na carrera y ye que la Cangues Montain ye una carrera especial, la primera llarga del añu y con tramos mui correnderos y otros más teúnicos, poro un disfrute total si llegamos nunes condiciones físiques bones.

Como siempre, salimos ensin cebanos na xubida al picu L'Arbolín y vamos ganando posiciones rápidamente demientres voi charrando con un conocíu ya de varies carreres. Aportamos al cumal y facemos un descensu tranquilu pa soltar patuques.

Nun díbemos mal del tou na xubida a Següencu

Magar de pasar per Cangues d'Onís pela ponte, entama'l tramu que quiciábes más duro se me fizo y onde'l piramidal entamó a dar problemes. Ye un tramu correnderu hasta'l colláu Andrín y equí nun pude caltener el ritmu, teniendo que tomámelo con más calma.

Dende Andrín, paez que recuperé na baxada téunica y otra vegada la pista hacia la Olla San Vicenti, fízoseme dura, nun podía correr fuerte y ye un coñazu dir cargáu de la cadera y nun poder dir sueltu corriendo.

La baxada convirtióse nun infiernu dempués del saltu

Aún así, siguimos con xeitu y garramos con bon humor tola xubida hacia Següencu, llevando bon ritmu y adelantando abondes posiciones, tando claro que diba más cómodu nos tramos téunicos que nos correnderos.

Llego al últimu avituallamientu y siéntome bastante bien, poro tiramos fuerte la cabera xubida hasta'l cumal y entamo la baxada cola sensación de qu'agora podía soltar pates y esfrutar d'una baxada rápida, pero fue tolo contrariu y les pates fueron cargando más y más y tuve que baxar los ritmos nun tramu que tendría que dir a fueu totalmente.

Tocaba acabar lo meyor posible

La gota que colmó'l vasu, fue'l destrepe-saltín de la carretera a Següencu, onde xubiéronseme los cuadriceps y tuve que parar. Dende equí, mal rollu, mala hostia y cero recuperación muscular en tol restu del percorríu, llegando a meta en ritmos llamentables y mui desencantáu otra vegada.

Al final, pesie a baxar 5 minutinos el tiempu del añu pasáu, quedo con unes sensaciones mui males y replantéome tola temporada, na qu'esperaba volver a facer grandes distancies pero viendo que nun acabo de desfaceme de la lesión, prefiero dir carrera a carrera.

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Pedro Pablo Heres, MV Foto...) 

------------------------------------------------------------------------


4 de Marzu de 2017

Track: Cangues Montain (Cangues d'Onís)


Web del Trail: Cangues Montain (Cangues d'Onís)

Clasificaciones: Clasificaciones 2017  


Primer carrera llarga de la temporada dempués de varies curties pa dir garrando puxu y pa diversión y allegría llego lesionáu. Paezme que ya diba cargando de más nes últimes carreres y nun pude recuperar de nenguna manera.

Primeros kilómetros xubiendo al picu L'Arbolín y veo claramente que nun pueu correr, nin caltener un ritmu curiosu en kilómetros llanos, nin xubiendo voi cómodu y muncho pior nes baxaes onde nun pueu llevar nin una zancada llarga.

Dende Cangues d'Onís per Andrín hacia Tornín

De la que paso per Cangues de nuevu, apetezme muncho abandonar y ye que dame muncha rabia, que con un día con unes condiciones brutales con bon tiempu y una temperatura agradable nun pueda dalo too.

Aún así, sigo porque Alberto ta ehí animándome ya intento camudar los malos camientos, intentando esfrutar a unos ritmos llamentables. Pa cuando aporto a Aballe magar d'un tramu llargu de carretera voi sufriendo munchísimu y con dolores perimportantes.

Perguapa la xubida dende la Olla San Vicenti

Menos mal, que ceo entama la xubida hacia'l colláu Andrín y caleyando pueu llevar hasta unos ritmos decentes y pueu esfrutar un pocu más, con un tramu más quebrapates de xubies y baxaes, poro con sensaciones dafechu diferentes aporto a Santianes onde tiramos hacia la Olla San Vicenti y ye Alberto quien entama a tener calambres.

Nun soi a creelu, vamos mui despaciu y tien problemes físicos, cuando ya-y dixe que tirara p'alantre mil vegaes. Nel intre, paramos dacuando y aportamos a la Olla onde entama la xubida final hacia Següencu, na que voi esfrutando polo guapu del percorríu pero Alberto nun recupera y vamos a pior entá.

De Següencu hacia Cangues d'Onís apretando un pocu más

Aportamos al caberu avituallamientu, con parada llarguísima y toca metese l'últimu repechu hasta'l Mirador de Següencu pa baxar cola calma hacia Cangues d'Onís, onde alcanzamos a Ruben y alcánzanos Fátima a la que xúnome a mou llebre pa facer los kilómetros finales hasta la meta.

A la fin... carrera llamentable que podría dárseme perbien pol tipu de percorríu, con tramos quebrapates, pero mui correndera, llegando a meta mui desilusionáu pola lesión y nun diben acabase equí los sufrimientos en carreres.

Camudando'l Camín per Cangues

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Lastra, Carmen Martinez Valdés, Trece Fotografías, Gilber,...) 

No hay comentarios:

Publicar un comentario