12 de Marzu de 2023
Track: Torrostigu (Babia) - Morrunegru
Nueva salida del GM Xuan de la Borrina, averándonos esta vegada a la comarca de Babia en Llión, una de les fasteres más guapes pa facer actividá montañera nel Cordal Cantábricu y como tenemos munches cosines pendientes por facer, siempre ye un placer dexanos cayer pelos pueblos babianos, siendo esta vegada Torrostigu, el nuesu puntu de salida y el Morrunegru el nuesu oxetivu.
Llueu del viaxe clásicu pagando la primada del Güerna, almorzaremos nel Moriscal en Güergas de Babia pa siguir viaxe hasta Torrustigu, onde aparcamos los coches, demientres aporta al pueblu tamién, el grupu Fariñentu de Pola L.lena, que diben siguir en travesía hacia la Farrapona.
Saldremos nuestru grupín, mui lloñe de les aglomeraciones de xente d'otros grupos, caleyando peles cais del pueblu, siempre con vistes al ablucante tabayón de la Foz, viéndose a les clares como de rápidu taba siendo'l desxelu nesta temporada, hasta dar col crucie hacia'l valle de Valverde, el cúal siguiremos, esfrutando d'una cómoda xubida per pista.
El día, emborrináu de primeres, va espertando, dexándonos ver los cumales de la redolada, destacando de primeres la peña Solarcu y la crestería dende la Colorá hasta la Peña Calabazosa, que tan bones alcordances traeme, demientres voi esfrutando del rápidu caleyar y de l'animada charra del grupín que ficimos güei.
Pasaremos pel refuxu Valverde, siguiendo pista alantre hacia'l Meroquil, onde abandonamos la pista per guapos senderos, siempre a la mandrecha del barrancu que fae'l rigu Valverde, hasta aportar al refuxu Vallera, onde pocu más alantre, arrimarémonos al barrancu, pasando per tarrén argayáu, pel barrancu Cualmarce, el cuál cruciaremos nel nuesu camín hacia'l colláu'l Queixeiru.
N'hora y media, tamos nel colláu y entamamos l'ascensión al Morrunegru, viendo lo que diba venir per delantre, ya que'l día volvió a ñublase y un fuerte vientu del suroeste va facenos l'ascensión bien dura. Sicasí, aportaríemos felizmente al colláu Pielda, onde entamará de verdá la xubida, per tarrén más pedregosu, teniendo que poner toles capes que llevamos na mochila, algamando una ascensión pelín épica.
Contentos pol cumal y por facer un monte tan guapu, pero tristes por nun tener vistes nun monte que domina tola redolada, nun podemos facer otra cosa qu'escapar, ya que nun podemos tar más tiempu nel cumal papando fríu a la espera de les vistes, asina que garramos l'arista sur hacia'l so cumal y entamamos crestéu hacia'l picu la Loma, anque con estes condiciones decidimos abandonar la idega inicial de siguir conociendo esta xerra de la Maserona.
Nel colláu enantes del picu la Loma, vamos buscar un pindiu descensu hacia'l valle la Maserona, teniendo que negociar dellos tramos, de piedra suelto, que faen les delicies de los culos con dalguna resbariada y les posteriores rises. Dicir que la xente, movióse estupendamente nun tarrén que nun fue cenciellu en dalgún tramu, enantes de que decidiésemos garrar ya los amplios ñeveros, faciendo la baxada más húmeda pero más cenciella tamién.
Como suele pasar, cuanto más baxos tamos nesti valle la Maserona, más va abriendo'l día, dándonos munchísima rabia quedar ensin les vistes del cumal, pero pocu podemos facer ya, asina que siguimos descendiendo esfrutando de la guapísima cara noreste del Morrunegru y ya vamos pensando na cervecina al sol que tomaremos nel chigre de Torrostigu.
Continuaremos el descensu, afinando senderos p'aportar al Prau la Valluga, onde ganamos vistes dende la Calabazosa, pasando pela Ferreirúa, Los Bígaros, hasta'l macizu de Penubina cola fastera'l Güertu'l Diablu y los picos del Fontán asomando nos caberos metros de camín hacia Torrostigu.
Arribaremos de nuevu a Torrostigu, siempre pela mandrecha'l rigu Valverde, llueu de pocu más de 5 hores, zarrando una circular, que diba prestanos ampliar un pelín más, pero bono, el día nun acompañó del too y la ruta quedónos finalmente en casi 12 km y unos +/- 820 m de desnivel acumuláu.
Les sensaciones son de tener que volver, porque tanto los montes como los valles son una auténtica maraviya, que bien paga la pena conocer, asina que tol grupu quedamos con ganes de preparar más rutes nesta fastera pente Babia y Somiedu.
No hay comentarios:
Publicar un comentario