Trail de Deva (Xixón)

17,18,19 de Febreru de 2023

Track: Trail de Deva (Xixón)

Web del Trail: Trail de Deva (Xixón)
 
Clasificaciones: Clasificaciones 2023  

Última carrera que ficiera enantes de la pandemia, fae dos añinos, terminándola, nun sé mui bien cómo, col tobiellu fechu una llaceria. Dempués del trail per Deva, tuviera tiempu abondo pa recuperar y munchu más hasta que nel trail de Peñamayor de l'añu pasáu, decidiera tornar a esto de les carreres pel monte.

Esta vegada, aprovechando qu'andaba per casa en Xixón, decidí probar a correr tres díes siguíos, faciendo la nocturna de 5 km el vienres, una carrerina rápida y curtia de 11 km el sábadu y el domingu terminar cola llarga de 27 km, too ello combináu como non, con dir a esguilar nos tiempos muertos pente carrera y carrera.

Entamu del primer día na nocturna de 5 Km

Entamábemos cola noctura de viernes, a la qu'aportaba dempués de da-y unos peguinos a un proyeutu na Carba en Peña Manteca. D'esti xeitu, cansáu d'apretar venía con un apixote perimportante conduciendo, poro tocó tomar un cafetín nel Camping de Deva con una palmerina de chocolote y ya preparámonos calentando un pocu y saludando a tolos familiares y collacios que corríen esti finde.

Una vegada preparaos los distintos participantes, fuimos saliendo en pareyes con diferencia de 30 segundos, nuna modalidá de contrarreló prestosa abondo, al igual que correr de nueche col frontal, toda una esperiencia en cuanto a los sentidos, corriendo lo más apriesa posible sollerte de cada pasu que das, anque pelín agobiante.

Preparaos pa la curtia del sábadu de 11 Km

Al día siguiente, llueu de tomer ciertes birres con un collaciu, llevantámonos preparaos pa la segunda carrera, de 11 km pero mui correndera, poro tocaba intentar controlar nervios y nun dir a fueu, cosa que suel costame munchísimu. Nel día anterior, faciendo la posición 30 na xeneral, diba ser difícil regular, asina que salí con Gus y Miguel, pero aína perdí la tranquilidá adelantando a tola xente que diba alcontrándome.

 

A la fín, los primeros kilómetros de reláx, marcaron un pocu la clasificación perdiendo 5 puestos col día anterior na xeneral, quedándome con bones sensaciones por apretar controláu, anque con munchos temores pal últimu día, nel que llegaba la prueba llarga de 27 km y nun sabía como diben responder les pates.

Esfrutando muncho'l sábadu na correndera

 

Pa rematar, como non, una persona sensata diría pa casa a descansar, tumbase nel sofá, estirar un pocu, pero quedara con collacios pa trepar un pocu y el día taba mui guapu como pa quedar en casa. Asina que vermú, bocata y pasar la tarde na paré, sicasí, nun contaba con tener que subir hasta L'Argayu... teniendo un patéu finu cola mochilona d'esguilar.

 

L'últimu día, despiértome con poques ganes de correr, llueu de tomar dalgo con más collacios, pero bono, teníemos el retu d'intentar terminar l'envite corredor, asína que pa Xixón tiramos, volviendo a intentar salir con Gus y Miguel, pero como siempre, voi dexándome llevar y na primer cuesta fuerte, piérdolos de vista y ya continúo en solitariu.

Col frenu man echáu na llarga de 27 Km del Domingu

 

Dicir, que llevé'l frenu man echáu hasta'l kilómetru 15 nel avituallamientu de metá de carrera más menos y viendo que les pates furrulaben, intenté caltener un ritmu controláu, dando la vuelta a tol cordal de Riosecu y sabiendes de que tábemos ya volviendo hacia Deva, apreté un pocu más na penúltima xubida, garrando nel camín a Illán y Alberto que diben en pareya.

 

Dellos kilómetros xuntos, con dalgún percance d'Alberto y qu'Illán nun diba como debiera, siguí baxando fuerte dexándolos atrás, garrando la última xubida hacia l'observatoriu con bon ritmu y cola tiesta puesta na cabera baxada y sobretou nos kilómetros d'asfaltu hacia'l camping de Deva.

Aportamos a meta faciendo una bona carrera nos tres díes calteniendo posiciones

Por sorpresa, muscular y mentalmente pude terminar con ritmos decentes, non tan rápidu como'l sábadu pero sí con sensación de nun tener calambres, ganando dalguna posición más, terminando los tres díes, na posición 33 de la xeneral, lo que dexó un bon tastu de cara al restu la temporada.

Como siempre, ensin ser de les carreres más guapes d'Asturies, sí que correr por casa presta, con tola familia faciendo deporte o viniendo a animar, asina como'l puntu de retu de los tres díes de carrera, colos que camiento y espero, poder siguir faciendo y meyorando sensaciones y posición.

 
16 de Febreru de 2020

Track: Trail de Deva (Xixón)

Web del Trail: Trail de Deva (Xixón)
 
Clasificaciones: Clasificaciones 2020   

Siguimos intentando garrar ritmu y dempués de les carreres curties de final y entamu d'añu, quería facer más kilómetros correnderos y ver como díbemos respondiendo, pero, un mal vuelu esguilando nun proyeutu, fízome llevar un mes resintiéndome del tobillu.

Salida correndera como siempre en Deva

Como siempre, nun lo miré na, pensé que con reposu y dexando un pocu de correr diría curando pero dolióme un día yendo de monte y nun dexó de doler nel restu de la selmana anterior a la carrera. La semeya d'abaxo nel kilómetru 5 diz a les clares, que diba esmolecíu por tener qu'aguantar media maratón col tobillu hincháu y con dolores.

Tramu más duru de xubida y barru nel que díbemos sufriendo un pelín

La verdá ye que sólo xubiendo caminando, podía forzar y dir fuerte, pero per tarrén inestable y sobretou les baxaes, diba sufriendo un montón, anque bono, conociéndome se que tengo muncho aguante al dolor, asína que decidí siguir pesie a esfrutar res en munchos tramos.

Paez que somos a recuperar nos tramos casi últimos de xubida

Ya pasaren 4 años de la última vegada que corriera per Deva, anque suel ser llugar de munchos entrenos faciendo kilómetros per Xixón. Ensín más decidí continuar en carrera y los kilómetros fueron pasando, hasta'l 15 onde ya decidí que diba terminar sí o sí.

El tobillu nun me dexa dir esfrutando nos tramos más correnderos

El tema ye que diba bien per tarrenes más quebrapates onde pudiera cambiar la pisada pero cuando tocó tirar de baxada más contina, ya viera que nun yera a caltener nin mediu ritmu decente, pasándome muncha xente siendo dalgo que se me da bastante bien y eso te va minando poquín a pocu.

Muncho dolor nes baxaes tendíes

Ensín más, faigo la segunda pasada pel observatoriu y ya intento dar lo másimu col envís, d'aportar de bon humor y con sensación d'al menos facer un entrenu curiosu, pero la baxada más teúnica faíseme un infiernu con muncho dolor y quien diba decímelo a mí, cuando al fín aporto al asfaltu, soi a disfrutar de pisar firme aportando a la meta con sensaciones de facer lo que pude al menos, pero coxeando claramente a los 30 segundos de parar.

Feliz de pisar en llanu y finar el trail

Menos mal que tenía a mi compi de carreres Montse, pa echame un cable, una sorrisa y un pescozón diciéndome que toi chifláu por correr así. A la fín, terminamos un trail de 26 km col ligamentu deltoideo rotu, asina qu'a ver si somos a recuperar a tiempu pa la siguiente que tenía na tiesta... el trail de Peñamayor.

Como siempre, mil gracies a los fotógrafos pol so llabor y a voluntarios y organización que siempre dan ánimos anque te vean dir con mala cara

-------------------------------------------------------------------------

28 de Febreru de 2016

Track: Trail de Deva (Xixón)

Web del Trail: Team Sport Spirit
Clasificaciones: Clasificaciones 2016  

Otra vegada más y van cuatru, vamos correr un nuevu trail, carrera pel monte o como quiera que llámense estes coses modernes y tan de moda. Nun m'alcuerdu bien, si dixe que diba correr tres o cuatru pola cosa de probar y ya tengo'l calendariu preparáu hasta Xunu.

Eso sí, ehí ya dixe que nun corría más, que tolos miós esfuercios diben pa la esguilada y nun cuento con camudar res del plan. Ye más, nun me llamaba montunamente falando esti trail, pero emperráronse Alberto y Gus y cuando dime cuenta ya taba apuntáu.

Sal tol marabayu xente dende'l camping de Deva

N'anterior carrera nun anduve mui finu y sólo diez kilómetros con muncha xente con ganes de correr como alloriaos, nun me fizo sintir mui cómodu, asina qu'esta vegada pensé en veles venir y ver como diba pasín a pasu.

Tamién otra opción que vínome estupendamente fuera nun facer res de aeróbicu dende'l miércoles hasta'l fin de selmana... asína que tomo nota pa dellos retos correnderos, ya que sí, esta vegada alcontréme estupendamente.

Corretiando per Deva col orbayu de compaña

De la carrera, pues que dicir, nun tamos na faldera'l Monsacru nun día soleyeru y con unes vistes increyibles, pero tamos corriendo en casa en Xixón y hai que dicir que'l percorríu fué tolo atrautivu que pudiera facese pel Monte Deva.

Les previsiones yeren malísimes pela selmana, pero al final, aselaron y quedámonos con un finu orbayu de xemes en cuando, na primer parte de la carrera, pa dexar de llover, anque col fríu y dalgo d'airín na parte cimera, quitar el chubasqueru yera opcional dafechu.

Tremendu pasu... más que barrizal yera un llagu

Y con lluvia y tarrén d'ocalital y pista de tierra... quien ye'l protagonista del día... pues el barru. Tuviemos como Forrest Gump con barru pesáu, barru acuoso, barru resbariosu, llamargues, toboganes de patinaxe, llago que cubrien pel cadril si nun andabes sollerte... en fin, un auténticu descoyone pa correr.

Vamoooos.... a fueu p'abaxoooo

Y entre barru, pistes, senderinos, xubíes y baxaes fueron pasando los kilómetros... hasta casi 24 km, que pudimos facer en pocu más de 3 hores y eso qu'a Gus, que facía la so primer media pel monte, los kilómetros finales hasta la meta pela senda'l Peñafrancia ficiéronse-y un mundu.

Aportamos a la meta más que contentos... encantaos

Tanto fué así, que la cuesta final de carretera hasta'l camping tuvo que parar con calambres y ye qu'esto de correr ye así, entames y nun sabes onde vas tener la llende física... quien nos diba dicir qu'andaríemos ya con 4 carreres y dos d'elles de más de venti kilómetros.

La próxima... pues ver veremos... pero ya ta en mente...

Camudando'l Camín nel Trail de Deva en Xixón