Trail Villa de la Sidra (Nava)

22 de Marzu de 2023

Track: Trail de Peñamayor (Nava)

Web del Trail: Trail Villa la Sidra

Clasificaciones: Clasificaciones 2023

Un añu xustu fai que tornábemos a correr pel monte, o más bien, a "competir" dientru del nuesu nivel, que ye'l montañeru que fae de too. Daquella, ficiera la carrera curtia, sofriendo un pelín na parte final de les Foces del Pendón, como suel pasar nesta carrera, sicasí termináremos contentos y con ganes de más, faciendo otres tantes carreres na temporada.

Esta vegada, vengo mui rodáu, anque nos últimos meses ya entré en mou escalador y la compañera de carreres lesionóse, poro nun toi entrenando res, yendo namái, que de carrera en carrera que nun ye poco. Pero bono, pente los tres díes nel Trail de Deva y correr la Maxi Kangas, nun corretiar de quincena en quincena, nun me taba yendo mal.

 

Silvia que volvía a correr una carrera llueu d'un mes y mediu

Como plantegame esta carrera de 26 kms yera una entruga que tenía na tiesta, ya que sabía que podía apretar casi tol percorríu, asina que salimos un pocu atrás como siempre, garrando ritmu y corriendo sacante los atascos per Pra, tolos primeros kilómetros hasta l'entamu de la xubida hacia Fayacaba.

Durante la xubida, pesie a dir cargando un pocu pates, vi que'l ritmu que llevaba yera curiosu y enriba taba divirtiéndome, sufriendo pocu y charrando muncho cola xente que diba alcontrando, asina que siguimos fuerte hasta Peñón d'Orosu pa baxar a echar un tragu y entrar n'ascensión al Picu Peñamayor.

 

Travesando'l cresteríu per Peñamayor

Equí entamamos a regular ya que les posiciones nes que me movía, yeren de ritmos fuertes, a los que nun toi mui avezáu, asina que controlando calambres con sales, hidratando y demás, fuimos a caltener ritmu, hasta entamar la baxada hacia les Praeres, onde tamién nun quise apretar muncho, ya que la pista fízoseme pelín pesada.

Nes Praeres, piqué dalgo y continué a la espera de los problemes vinientes, pero xubimos la Varallonga con muncha facilidá, ganando posiciones y ya tireme abaxo hacia les Foces del Pendón, con otra visión, descendiendo apriesa y sofriendo un pelín, como siempre nel llanu de les foces, pero munchísimu menos qu'otres vegaes, anque sigue paeciéndome incomodísimu de correr esti tramu.

 

Les Foces del Pendón pasando factura como siempre

Aportamos al descensu final hacia H.uentesanta, colo meyores ritmos de carrera que soi a alcordame, faciendo una xubida hacia Piloñeta, corriendolo tou y ganando dalguna posición más, pa facer los últimos kilómetros a bonos ritmos y con sensaciones mui prestoses hasta aportar a la meta, onde alcontrábase Montse animando, a la que vamos ver si-y pica volver a correr.

Como siempre ambientazu per Nava, llavase un pocu, llimpiar una ferida d'un fostión que pegara na parte final y tomar unes cerveces esperando por Silvia, que tuviera qu'abandonar por mor de dolores nuna rodiella.

Aportando a meta mui contentu cola carrera

En resume, carrera guapísima, con nueva organización de diez, na qu'esfruté munchísimu con un tiempu de 3 hores y 10 minutos, quedando'l 56 na xeneral y el 15 na mio categoria y como siempre alloriando cola xente, lo munchu qu'entrena y lo fuerte que ta, ya que paezme que por muncho qu'entrenara baxar de les 3 hores, quédame fuera l'alcance y siendo sinceros, tampoco ye a aportame tanto.... pocos montañeros quedamos nesto de les carreres.

20 de Marzu de 2022

Track: Trail de Peñamayor (Nava)

Web del Trail: https://www.trailpenamayor.com/

Clasificaciones: Clasificaciones 2022

Dos años y picu dempués, tornábemos a les carreres esti fin de selmana pasáu, daquella corriera mancáu, el Trail de Deva en Xixón y de secute viniera una pandemia que tuviéranos un par d'años p'alantre y p'atrás ente fola y fola.

Nun me llamara muncho correr eventos pelín semiprofesionales, ensin muncha cultura nel panorama de les carreres, asina qu'hasta esti añu que veo una mayor normalidá y les carreres de siempre tornan al calendariu, punxérame a entrenar y baxo la turra de ciertes persones del GM Xuan de la Borrina, apuntéme de nuevu a dalguna carrera.

 

D'esti xeitu, con dellos entrenos curiosos por cerca de casa, sobretou nel Monsacru y nel Llusuriu, fuimos tornamos al Trail de Peñamayor con ganes d'esfrutar de la carrera y pocu más. Allá fuimos y como siempre, namás que ponse la cosa pindia engorílome y póngome a furrular cuesta riba, adelantando a bastante xente hasta la parte alta de la carrera.

Perguapa carrerina la de Peñamayor  

Esta vegada, corría la carrera curtia y al finalizar l'ascensión ya baxábemos hacia les Foces del Pendón, envede siguir hacia Peñamayor como na llarga. Como siempre la baxada, esti añu sequina fue una auténtica golosina, na que sentímonos bien y fuimos a fueu, hasta tol llanéu de les foces onde siempre los ritmos faénseme bola y noto dalgunes molesties nel xemelu esquierdu.

A falta de 4 kilometrinos toca cambiar pisada y baxar hasta H.uentesanta con cuidadín y paez que voi recuperando nel tramu quebrapates hasta Piloñeta, pa sufrir de nuevu nel caberu kilómetru hasta Nava, onde los ritmos asfalteros siempre me van fatal y pierdo dalguna posición, dándome bastante rabia les molesties finales hasta meta.

A la fín, aportamos a meta, el 58º de la xeneral (20º na categoría de vieyera tipu A) con sensaciones agridulces, ya que sobretou prestábame terminar ensin dolores, pero bono, al final caliéntome y forcé la maquinaria muscular como suel pasar nes carreres.

Como siempre, dar gracies a la organización, ye un placer tornar nesta carrera mítica y tamién a los voluntarios y fotógrafos por amosar la belleza d'esti deporte y el sofrimientu nes nueses cares y cuerpos.

-------------------------------------------------------------------------------- 

6 de Payares de 2016

Track: Trail de Peñamayor (Nava)

Web del Trail: http://www.serondatrailseries.es/

Clasificaciones: Clasificaciones 2016

Fai un añu entamábemos l'aventura de les carreres pel monte y queramos o non, fué enganchándonos adulces y agora acabes una y ya tas camentando pa onde tirar la próxima. Deciamos que preparábemos nel so momentu el trail de la Pisada'l Diantre nel Sueve y ficimos 8 carreres la temporada pasada.

Pinta que van cayer munches más esti añu y pel momentu col nuesu segundu Trail de Peñamayor acabé les tres carreres de la Seronda Trail y pocu tien que ver los xeitos de carrera d'esti añu col anterior ya que anque seya aneudóticu baxe 40 minutos el mio tiempu.

Nun tien mayor importancia, pero llevo tres carreres apretando fuerte y eso ta prestándome, anque tamién nesta carrera sentíme cola sensación de tener que cumplir bien pa quedáme a gustu y pasóme factura ya que los primeros kilómetros fueron una llocura d'adelantar xente, corriendo tol camín hasta'l primer avituallamientu a unos tiempos nos que nun toi avezáu a tar.

Dellos momentos de la carrera pel cordal de Peñamayor

Llueu, cuando entamó la xubida del Peranchu hacia Fayacaba, una ascensión tendida y perbona pa les mios condiciones, ya que camiento que dáseme perbien apretar xubiendo, pues nun podía, nun lo daba ya que taba fundíu de los primeros kilómetros y eso fízome tener un baxón mentar perimportante.

Aún así, tocó tirar de psicoloxía propia y dir animándome polo baxo, pa ver si yera a recuperar, porque aparte de nun ganar posiciones nesta xubida taba perdiéndoles y sentía que nun taba esfrutando de la carrera res.

Acabé la xubida como pude, aportando al avituallamientu de Fayacaba, onde garré dalgo de chocolate, isotónicu y a siguir corriendo... dábame igual ya sufrir tola carrera como un perru... al menos diba dalo too.

El Team Asgaya faldiando Peñamayor

Per suerte, hidratéme abando nel tramu llanu de Fayacaba y el faldéu a Peñamayor y xunto col chocolate paez que fuí recuperando y fice una xubida más que decente al picu Peñamayor, al cual aportamos pente una trapiada curiosa.

Encumé'l picu, magar de pasar a unos cuantos collacios y garré'l crestéu con xeitu, viendo que la xente tenía muncha prudencia nel crestéu y la baxada que taba enforma embarrada, pero yera factible si tas d'andar pel monte como ye'l mió casu.

Nel intre, víneme un pelín arriba y sin mayores problemes siguí ganando posiciones na baxada téunica de Peñamayor a les Praeres, onde garré frutos secos y tiré p'arriba hacia la Varallonga como un tiru ganando dalguna posición qu'otra.

Semeyes prestoses y alcuentros prestosos

Llueu tocaba, facer la baxada hacia les Foces del Pendón, menos téunica que la de Peñamayor, pero con más prau y con menos curiáu, dalguna resbariada cayó. Dende equí, hasta les foces esfrutando na baxada hasta les propies foces que taben increyible d'agua nes Meceures.

El tramu de les foces, con un llanéu estráu d'agua, fízoseme pelín duru, sin garrar un ritmu curiosu y sintiéndome pelín cansáu hasta Los Fornos, onde ye entamaba la baxada hacia H.uentesanta, que fícela a un ritmu curiosín.

Dende equí a la meta, dalgúna repechu hacia Piloñeta, nel que caltuve pates nun vaya ser que vinieran los calambres y aguantar ritmu fuerte pa baxar a Nava per carretera, garrándome Jorge, fisio que tuvo tratándome estes selmanes atrás, entrando xuntos a meta na 71 y 72 posición.

Aportando a meta nun día durísimu meteorolóxicu

Otra carrera con sensaciones agridulces y ye que tovía nun se regulame bien y tócame pasar dellos malos momentos, pero supongo qu'esto de les carreres pel monte ye así y sobretou cuando toes pasen d'una media maratón.

De los collacios, Gus y Alberto, ficieron la so carrera, pasándolo mal col fríu y ye que según fueron pasando'l día, el tiempu fue a pior y según pude enterame la ñevada nel cumal de Peñamayor fué espectacular dellos minutos más tarde de pasar yo.

Dende equí, tamién felicitar al Team Asgaya (Illán, Leticia y Rubén) que tamién acabaron como campeones les tres carreres de la Seronda Trail, llevándose la chaquetina Brooks que ye una auténtica golosina, jaja.

Una espeutadora de luxu nes Praeres

Como siempre, dar gracies a organizadores, voluntarios sobretou (menudu día) y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Jose Luis Lastra, Xixón Runners, Gilber, CapitánPola y Luis Ardura)

-------------------------------------------------------------------------------- 

25 d'Ochobre de 2015

Track: Trail de Peñamayor (Nava)

Web del Trail: http://www.serondatrailseries.es/

Clasificaciones: Clasificaciones 2015

Enxamás digas d'esti agua nun beberé, porque llueu cágate la perra en camín y pasa lo que pasa, qu'acabes corriendo pel monte cuando renegabes d'esti tipu d'eventos. Pero, como'l que nun quier dexéme enguedeyar y cuando entames paez ser que sólo les llesiones son a dexate paráu.  

La hestoria vien por participar na Pisada del Diantre, carrera qu'organiza l'hermanu d'una collacia del GM Xuan de la Borrina y claro como díbemos dir p'allá ensin correr na per delantre a mou preparatoriu.

Los participantes conocíos: Alberto, Pedro, David y yo

Pero como somos un pocu gallos pues metémonos como primer carrera nel Trail de Peñamayor de 25 km con dos coyones y acabámoslu y bien, sin mayores sufrimientos y cola sensación de poder apretar abondo más.

Díbemos dir los tres (Alberto, Gus y yo) pero'l mió hermanu púnxose a morrer unos díes enantes d'un virus estomacal llocu y nun taba nin pa correr pel pasiellu de casa. Asina qu'haya que fuimos Bertín y yo a la puta aventura.

Aportando a les praeres... puntu intermediu del trail

A dicir verdá ye que disfrutamos, prestónos l'ambiente de bon rollu, rises y ánimos pente los participantes y nós, como somos un pocu faltosos fuimos descoyonaos tol camín, ya fuera andando, xubiendo, baxando o corriendo.

Camiento qu'había xente que diba cagándose na madre que nos parió, porque nun parábemos de charrar. Tengo que dicir, que costóme aguantar tranquilu xubiendo, porque esto de dir de monte ensín mochila nin pesu, dan ganes de xubir esnalando y como ye una carrera pues fórmase tapón y sigues el ritmu del grupu nel que tas.

Corriendo seriu o despoyaos... asína díbemos tol día

Asína qu'en xeneral, la sensación ye que la mayor parte de los participantes corren muncho pel llanu, pero xubiendo y baxando téunicu nun te creas qu'anden tanto, ya que nós salimos bien atrás y fuimos garrando posiciones nes xubides dures y sobretou baxando como chiflaos de Peñamayor jeje.

El casu ye non mancase y disfrutar y mientres esto seya asína... de xuru que repetiré con dalguna carrerina más...

Camudando'l Camín tamién corriendo pel monte