2 d'Abril de 2023
Track: Resistencia Reino Astur Curtiu (Ayer)
Web del Trail: Resistencia Nembra
Clasificaciones: Clasificaciones 2023
Continuamos con esta temporada tan correndera, na que tornamos a sentinos bien y anque dexáremos d'entrenar pela semana, con tan sólo andar pel monte pa dir a esguilar y correr cada quince díes, siguimos ganando estáu de forma y vamos completando carreres tan positives como la pasada en Nava, nel primer Trail Villa de la Sidra.
Esta vegada díbemos pa Nembra, con menos kilómetros qu'en Nava, pero más desnivel y una carrera más típicamente asturiana, ye dicir, a pinchu p'arriba y a fueu p'abaxo, ensin medies tintes. Ya la corriera va cinco años, cuando facíase en Xunetu y gustárame muncho, teniendo la idega de facer la meyor carrera posible.
D'esti xeitu, salimos bastante alantre, viendo como'l nivel diba ser peralto, saliendo como tiros tolos participantes, hasta topanos con un tapón, al cruciar los primeros regatos. Llueu, fuese estirando pali pali la carrera, hasta aportar a la gran xubida hasta'l picu la L.lomba, un entepechu brutal que tuve que tragar con un personaxe llevando musiquina discotequera, hasta qu'a la fín pude adelantalo.
Son cosines que me fadien munchísimu y los organizadores deberíen tomar cartes nel asuntu, nin auriculares nin música qu'ofenda al restu participantes. Si corres pel monte, deberíes ser capaz d'esfrutar del monte, de los soníos, del alendar de los compañeros que corren al to llau, de la charra en comuna y del bon ambiente de les carreres, sinon, vete a dar vueltes a un parque con tu musiquina y dexar vivir el monte al restu los participantes.
Sacante d'esta falta d'empatía, llueu de la L.lomba, pude esfrutar de correr y aldericar con varios deportistes demientres avanzábemos hacia'l picu Pedru García, onde nos tocó ver l'horror de los incendios d'esta selmana, corriendo per tierra quemada, casi caliente y tragando un pelín de fumu, qu'entá salía d'esta tierra astur, que dalgunos empéñense n'estrozala.
Como siempre dempués d'encumar el puntu más alto, toca una llarguísima baxada, con tramos téunicos al entamu, otros más correnderos na parte media pa tornar a baxar per trialeres bien guapes, hasta'l ríu Negru, onde ya tendremos un llanéu hasta arribar a la meta en Nembra, onde Rubén, el nuesu animador preferíu y paisanu de Nembra, tenía a bien saludar participante, tres participante, nesta folixa del trail.
El nivel ye tal, que dempués de facer una bona carrera, aportamos a meta el 121 de 313 participantes y el 38 de la mió categoría de 105, siempre rondando tar nel primer terciu de los compañeros, pero como digo, ye una pasada ver el nivel notándose que los corredores entrenen y muncho... poro, los montañeros agora, quedamos cola sensación de facer lo que podemos ya intentar esfrutar d'esti deporte como un complementu estupendo al restu de les nueses actividaes.
Track: Resistencia Reino Astur Curtiu (Ayer)
Web del Trail: Resistencia Nembra
Clasificaciones: Clasificaciones 2018
Magar del pufu de carrera que fice nel Trail d'Ubiña, retirándome nel Meicín, por una falta total de motivación y ganes de sufrir, tenía qu'entainar y volver a facer una carrera que me dexase con bon tastu pa siguir entrenando y corriendo con ganes.
Daquella carrera, lo pior de tou, fue dexar tirada a mi compi, Ana, que facía su primer carrera de monte y sólo pude acompañala hasta'l refuxu onde por mor del calor, decidí retirame. La verdá ye que descansando y volviendo a hidratame bien pudiera acabala pero fue más bien una falta total de ganes de sofrir... dexándome mui males sensaciones.
Voi conociéndome y lo mesmu que fai un tiempu dexé de correr en grupu, por mor de llevar ritmos dixebraos unos d'otros, camiento que lo que realmente faime esfrutar de les carreres pel monte ye esa soledá qu'algames cuando ya van pasando los kilómetros y la carrera estírase.
Aparte, necesito dafechu sentir que voi en carrera, que voi dándolo too y si toca sofrir préstame sofrir individualmente. Soi un montañeru de grupu, llevo años llevando al mió grupu de monte y quiciás competir en carreres de monte, dame esi escape de llibertá pa dir a fueu pel monte, forciando tolo que pueda y esfrutando de correr, de la natura y sobretou de los mios camientos internos.
Sicasí, ún de les coses más prestoses de dir en carrera ye cuando a partir de la metá del percorríu, les distancies pente los participantes estírense y nin ves al de delantre nin al d'atrás y tas solu. Solu pa sentir cada pasu, solu pa sentir el to aliendu axitáu, solu pa escuchar los ruios nes viesques, solu pa sentir el to cuerpu.
Ya tenía ganes de correr en Nembra, quiciás ún de los pueblos d'Asturies y un conceyu, el d'Ayer, con mayor tradición en organizar carreres. L'oxetivu d'esti añu yera correr la carrera de 55 km de Resistencia Reino Astur, pero tuve que conformame cola media de 21 km, anque como pude comprobar el percorríu yera una pasada y nun eché de menos non poder correr la llarga.
Como siempre, salí atrás cola calma, intentado garrar ritmu nos primeros kilómetros más correnderos, p'avanzar posiciones pali pali. Según van pasando los kilómetos voi alcontrándome meyor y adelanto a muncha xente hasta aportar a la xubida al Picu Pedro García, onde tocó tirar de los entrenos pel monte y alcontréme perbien, aguantando unos ritmos altos y dando tolo que tenía dientro.
A partir del tramu más duru, pasábemos a otru más correnderu onde siempre xubiendo, diba ganando posiciones garrando a la primer clasificada nel cumal del Pedro García y baxando con ella durante munchos kilómetros a unos ritmos bien prestosos.
Munchísimu barru nel tramu final, fizo que se me cargaren les pates enforma, teniendo que baxar un pelín el pistón, ya que nun tenía ganes d'acabar con calambres, ya que lleva siendo'l mayor problema de tola temporada.
Pese al baxón, nun perdimos posiciones, algamando finalmente en meta, el puestu 30 na clasificación xeneral y el 14 de la mió categoría. Nun tuvo mal, pa como siempre, nun entrenar específicu pero notábase que venía de dellos díes pel monte y nun hai meyor entrenu que dir de monte colos collacios.
A gustu totalmente col resultáu, coles sensaciones d'acabar una carrera apretando dende l'entamu hasta'l final, tocaba relaxase nel avituallamientu, xintando un bon platu de pasta y tomando unes cervecines que supiéronme a gloria, en bona compañía.
Quédame un pocu la espinina esta temporada de completar una bona carrera de llarga distancia, pero ye que tovía, agora mesmu, nun soi tan diesel como pensaba y apetezme más correr hasta media maratón y apretar a tope dando el másimu posible.
No hay comentarios:
Publicar un comentario