La Pesanca (Piloña) - Moñacos - Peñe Crespa - Incós - Saoya - Agüeria - Pandemules - L'Argañal

22 de Mayu de 2025

Track: La Pesanca (Piloña) - Moñacos - Peña Crespa - Incós - Saoya - Agüeria - Pandemules - L'Argañal

Tornamos al monte col GM Xuan de la Borrina, llueu d'unos finde de descansu y vamos facelo con una ruta que teníemos na tiesta dende l'añu pasáu, pero nun alcontráremos el momentu. Tampoco ye qu'esta dómina l'añu fuera la meyor y lo sabíemos ya que la broza ya espoxigó nel monte y sabíemos que les dificultaes pa completala diben ser grandes.

Sicasí, yera'l día más llargu del añu, asina que tiempu teníemos pa completala y ganes tamién, poro averámonos hasta'l nuesu puntu favoritu de Piloña pa entamar les rutes, l'area recreativa de la Pesanca, onde al aportar alcontramos varies furgonetes que pasaren la nueche tranquilamente.

Puntu d'entamu na Pesanca (392 m)

 

Pocu más allá de les 9 la mañana, tamos preparaos pa entamar a caleyar, llueu d'un café pelín desesperante n'Infiestu, axuntándonos nel aparcaderu los cincu aventureros d'esta xornada, qu'aniciaba, como non, camín peles pistes que van a la vera'l rigu Infiernu, pasando pol cada día más guapu Muñizón y empobinándonos hacia la Foz del Infiernu primeru y dempués pel valle Pedrosa hacia'l monte Corbera.

Son munches les vegaes que pasamos per equí, asina que simplemente, vamos charrando animósamente, esfrutando de los distintos tabayones del rigu Infiernu y contándo-y a Rosa les mil batalles que tuvimos nestos años per esta fastera tan guapa.

Ascendemos peles pistes del rigu Infiernu hacia'l monte Corbera

Ensin más, esfrutamos de tola pista del monte Corbera y entramos pente la borrina na guapa foz de Moñacos, nun ambiente fantasmagóricu tremendu, lo que-y da un puntu preciosu al llugar, pero fainos dubiar per onde siguir la ruta, ya que lo más normal ye subir hacia Treslasenda pa crestiar hacia'l colláu la Boqueriza, pero nós queremos conocer la riega Moñacos.

 

Perpasamos la guapísima Foz de Moñacos y siguimos pela so riega

Miramos un pocu les opciones y nun lo duldamos, siguimos la riega Moñacos y alcontramos dalgún fitu y traza de senderu asina, que vamos pali pali avanzando ensin demasiaos problemes, alcontrándonos con llugares bien guapos, siempre siguiendo de cerca la riega, hasta la parte más alta, onde dixébrase en varies riegues, decidiendo tomar la panda interior pente les dos riegues p'ascender esti monte moñacos, hasta atopar un camín madereru qu'atraviesa la viesca hacia Entrepeñes.

Esfrutamos munchísimu pel Monte Moñacos siempre pegaos a la riega

Nel intre, decidimos siguir el camín, dexando la diversión de cruciar riegues y siguir rastros de sienda y al traviés de varies envueltes, diremos averándonos hacia'l colláu la Boqueriza, teniendo que bregar un pelín na parte alta, pa salir al propiu colláu, onde a la fin, salimos de la borrina y alcontrámonos con un mar de ñubes preciosu, que malpenes amuésanos los cumales más altos como la Llambria y Tiatordos, La Becerrera y al norte el Cuetón de les Travieses ye casi l'únicu que sal penriba'l borrín.

 

Na última parte garramos pista maderera n'envueltes hasta'l colláu Boqueriza (1428 m)

Pa cuando aportamos al colláu, ya llevamos delles compañeres nes pates, teniendo que quitar durante un ratu munches cabarres demientres picamos daqué pa recuperar fuercies, magar de les 3 hores de monte y mil metros de desnivel direutos, en dalgo menos de 10 km de camín. Como non, tando al so pié, decidimos xubir hasta la Peñe Crespa, ya que facía años que nun taba nella y Marcos y Rosa, tampoco la conocíen.

 

Ascendemos a la Peña Crespa dexando al fin el mar de ñubes embaxo

Tiramos pela ascensión mítica, faciendo los tornos y trepando un pocu pel canalizu y los bloques y upámonos tol grupu hasta los 1547 m de la Peñe Crespa, na que quitamos otres cuantes cabarres, sacamos delles semeyes del mar de ñubes y nomamos tolos cumales que somos a pescanciar y ye que'l día ta mui nidiu y nun mos dexa casi nin ver les Peñes Santes y el restu de Picos.

Peña Crespa o Tornos de Pandemules (1547 m)

A sabiendes de tolo que tenemos per delantre, descendemos entainando a la Boqueriza y averámonos a los collacos Cabreros pa continuar hasta'l guapu mayáu de Piedrafita onde vamos garrar senderu hacia la viesca de Purupintu. Nun fai falta dicir, lo guapísimu d'esti llugar, que ya conociéramos en delles rutes a la propia Peñe Crespa y a la Becerrera o Campigüeños dende Orllé.

Descendemos hacia Piedrafita pa siguir pel monte Purupintu

Vamos encantaos baxo les enormes fayes y el borrín vuelve a poner esi puntu místicu al descensu, nun teniendo mayores problemes hasta'l colláu Incós, onde como siempre, nos praos, los senderos piérdense un pocu y ensin querer damos la vuelta al Porrón y aportamos a una cabaña de madera un pocu turbia, nel colláu Incós.

 

Navegamos pente la ñebla pente viesques y mayaos como los d'Incós

Llegar a esta segunda cabaña, quiciás, fízonos perder el meyor senderu de descensu hacia la riega de Purumendi y ye qu'anque al entamu teniémos bon pasu pente los felechos y cotoyes, más sero, el camín zarrábase un pelín y tocó bregar, nesti casu Carlos, p'abrir camín, hasta entrar na riega Purumendi, onde entramos nun mundu de verdor y agua ablucantes.

Descendemos d'Incós per tarrén pelín tomáu hasta la riega Purumendi

 

Dende Purumendi, bordiaremos per camín tranquilu y guapísimu, hasta'l rigu Semeldón, onde a la fín, gracies a la insistencia de Mario, garramos la entrada a la foz de Saolla, auténticu oxetivu del día y ún de los llugares más lloñe de nengún pueblu habitáu, qu'hai n'Asturies y ye que si dalgo pasa nestos requexos, ye bien complexu llegar nun tiempu mediu rápidu a sacar a dalguien en casu d'emerxencia.

 

Como siempre, Carlos y yo vamos alcordándonos de la vueltona que-y meteríeramos a Llambria y de lo mal que lo pasara'l collaciu, ya que nun taba nel estáu de forma más afayaizu p'acometer tal ruta. Esta vegada, vamos ensin problemes y nun podemos facer más que maraviyanos d'esta foz de Saolla, pela que vamos dando pasu tres pasu y alloriando col verdor, les poces, los muros calizos que nos arrodien... una brutalidá de llugar. 

 

De Purumendi travesamos per camín a la riega Semeldón pa entamar la Foz de Saolla

Saldremos de Saolla, llueu de recuperanos d'una cagada na parte final, onde casi la liamos por destrepar dalgún saltu, siendo'l senderu bonu, saliéndose a la esquierda, ya que nin Carlos nin yo, teniemos alcordanza de facer nengún pasu de nengún tipu.

Cuando atopamos la salida correuta de Saolla, pararemos un ratín a xintar pa recuperar fuercies y continuamos hacia Agüeria, onde ya cuéstanos muncho pasar pente los felechos hasta la cabaña, qu'alcontrámosla fendía y tomada dafechu pela broza. Equí, ye onde entamó l'infiernu, ya que nós teníemos una idega del ascensu que queríemos facer, ya que va 3 años, descendiéremos dende Llagosciegos per Borondanes hasta Agüeria. 

 

Salimos de Saolla p'adientranos nun mundu d'interrogantes n'Agüeria

Daquella, alcontráramos el Pandón d'Agüeria, un prau que cruciaremos en traversal en descensu, dalgo tomáu, pero seguíase bien la sienda. Nel intre, magar de cruciar la riega Reigán que vien de la foz de Llagu, tuviemos varios intentos albidrando esi senderu, pero nun fuimos a alcontralo y viendo pasar el tiempu, nun tuviemos más, que tirar a pinchu, bregar, tumbar felechos de más de dos metros, travesar cotoyes y siguir tirando d'orientación d'árbol en árbol, como si fueren islles onde garrar aliendo.

Cuando'l nuesu sen, tendría de dir en trasversal hacia'l valle contiguu de Borondanes, nós nun atopamos otra manera, que xubir a pinchu, aprovechando una riega, pa llibrar felechos y cotoyes, aportando a la fín, a un cantu de cuarcita, onde la vexetación baxó d'altura y pudimos avanzar hasta pasanos ya a la viesca del valle de Borondanes. 

Bregamos como poques vegaes pa salir pel Pandoón d'Agüeria hacia Pandemules 

Como dato, comentar que facer 180 metros de desnivel nel Pandón d'Agüeria, echamos una 1 hora y 40 minutos, pente les vueltes iniciales y la bregada final, hasta llegar a la viesca, onde baxo les fayes, pudimos caleyar esfrutando d'un llugar llimpiu de broza, pero les cares de los collacios, yeren ya de cansanciu y esmolecimientu, tanto poles hores que llevábemos de ruta, como de nun alcontrar más torgues del mesmu xeitu na ruta.

Na parte alta de la viesca, volvimos a tener dalgún problema cola navegación, ya que pesie al gps, la borrina facíanos dudar y dimos dalguna vuelta innecesaria, hasta salir al colláu de Pandemules (1215 m), dempués de 10 hores y 20 minutos de ruta, completando un desnivel positivu acumuláu d'unos 1700 metros nesi puntu.

 

A la fín aportamos a Pandemules onde garramos pista hacia'l Monte L'Argañal

Casi ensin ver les cabañes de Pandemules, atopamos a la fín una pista de doble rodada que ya nun fuimos a perder en dengún momentu. Sabiémos perfeutamente, que tábemos metiéndonos nun monte priváu, pero pasaes les 7 y media de la tarde, ya nun teníemos opción, de dar la vuelta al Maoñu pa baxar per Treslafuente y a dicir verdá, nun entiendo de cotos privaos de señores nel monte y menos siendo un llugar de tanto interés paisaxístivu como puede ser l'accesu a Pandemules pel monte L'Argañal.

Llarguísima pista n'envueltes hasta garrar de nuevu la vera'l rigu Infiernu

Ensin más, descendimos les milenta vueltes de pista que los señoros usen pa xubir nel toutarrén y saltamos les sos valles, baxo la supuesta atenta mirada de cámares y ya salimos a coyer el camín a la vera'l rigu Infiernu, pa empatar nel Patin, cola pista pela que xubiéramos hasta Moñacos.

La verdá ye que les 2 hores de pista p'abaxo hasta la Pesanca ficiéronse pesaes, pesie a lo guapo del monte L'Argañal y les foces del Infiernu, aportando a los coches, llueu de pocu más de 12 hores de ruta, más de 28 km (restando dos de les pérdides, 26, 5) y unos +/- 1800 m de desnivel acumuláu.

En resume, ruta brutal, sólo apta pa montañeros esperimentaos nestes xeres pela terna Piloña, Casu, Ponga, na que debemos tener en cuenta la dómina l'añu na que la facemos, pola bayura de vexetación, pero tamién, pol tiempu de lluz necesariu pa poder facela, asina que quiciábes a finales de Marzu, primeros d'Abril, anque toca tener en cuenta la posibilidá de moyase nes riegues y sobretou, bona forma fisica y bon conocimientu d'onde metémonos porque nun hai salides cencielles.

Camudando'l Camín no más xabaz d'Asturies