15 de Mayu de 2025
Track: Tuiza Riba (L.lena) - Covarrubia - Cuetu Les Cabres - Merines - Penubina AE - Terreros - Meicín
Tornamos al monte col GM Xuan de la Borrina y vamos facelo, con una ruta divertida y mui entretenida, pela contorna del macizu de Penubina, al que nun visitábemos dende'l rutón a la Tesa pel monte Tixirúa, faciendo esta vegada una ascensión más clásica que nos pidiera'l compañeru Rubén y que nun conocía como ye la arista Este de Penubina.
Axuntámonos un bon garrapiellu pa lo que solemos tener por vezu nel grupu, averándose tres compañeros esternos, teniendo namás llegar al aparcaderu un percance col coche, rompiéndo-y l'embrague, teniendo que dexalu averáu a la carretera a la espera que dempués de la ruta viniese la ruta a recoyelo.
Entamando bien el día, preparámonos y salimos pasaes les diez de la mañana, pente'l borrín, en direición al Meicín, xubiendo nun alderique continuu, ensin mayores prieses, que calecer un pocu músculos y garrar un ritmín curiosu, dexando abaxo'l refuxu y saliéndonos hacia'l valle de Covarrubia metíos dafechu nel borrín.
Por suerte, al altor de la bas del Portil.lín Cimeru, la borrina entama a
escamplar, regalándonos perguapes vistes tanto hacia la cara nortiega
de la Penubina, como al valle del rigu Güerna tapecíu dafechu pel mantu
ñubosu.
Aprovecharemos al solín pa quitar delles capes y siguiremos camín, pelos Fuechos de la Cabra, baxo l'atenta mirada de les muries del Siete y los Castil.lines y pali pali, diremos averándonos hacia'l Cuetu Les Cabres, al que tamién apetecióme meter nel menú, pa que la xente punxésese un pocu al tema trepador.
Darémos-y la vuelta al cuetu y baxo la senda les Merines, vamos dexar les mochiles na llerona, pa siguir un pelín hacia la fastera noreste, onde alcordábame que yera más cómodu de garrar la vía d'ascensu al Cuetu Les Cabres. Llevamos per delantre otros dos montañeros, que nun conocen mui bien el tarrén, así qu'esperamos con cuidáu pembaxo delles mientres van faciendo travesía más alta.
Nun puntu, moviéndose penriba tiren los montañeros un morrillu y deciden con bona vista, esperanos pa xuntar tol grupu, ya que somos unos cuantos y ye pelín peligrosu. Tiro al so alcuentru y empobínolos per onde va la ruta, faciendo les distintes trepaes más xuntos y más seguros, esfrutando dientro de lo posible, con cada pasu que va ufreciéndonos la ruta d'ascensu.
Pa cuando aportamos al cumal del Cuetu Les Cabres (2118 m), los compañeros montañeros van entamando'l descensu, asina que sacamos semeyes con tranquilidá y comentamos la xugada de los trepes y lo que vien darréu, como ye la baxada, asina que vamos tirando con calma, pela mesma vía, teniendo qu'esperar a que los compañeros, salgan hacia la parte baxa, lloñe del canalizu más vertical, onde tirar piedres ye más que posible.
Destrepamos con seguridá un tres d'otru, aportando a les mochiles onde picamos dalgo y bebemos agua, enantes d'arrancar pela senda Les Merines hacia l'arista Este de la Penubina. La verdá ye que pa calecer la cabeza camiento que-y valió al grupu, asina que sin conocer l'arista albidro que nun sedrá muncho más complicada nin espuesta que la trepada al Cuetu Les Cabres.
Aportaremos al hombru Este de la Penubina y entamamos primero per prau y llueu per tarrén calizu l'arista Este, alcontrándonos con una ascensión preciosa con pasinos de trepe con una calidá brutal de la roca y otros tramos onde tan sólo caleyaremos per praos, poro va siendo una xubida de pasu, reposu, pasu reposu, que fai d'esta actividá, diría que pa tolos públicos, una auténtica pasada.
El grupu, anque cansáu polos continos trepes, va esfrutando munchísimu de l'actividá y más col mar de ñubes que pali pali, va disipándose. L'arista va xugando con tramos de trepe, casi siempre bien protexíos y pocu espuestos, salvo un pequeñu tramu d'arista más fina, que se puede bordiar a la mandrecha, con peor roca, más espuesta quiciás, pero'l restu nun tien mayor complexidá que siguir lo más evidente n'ascensión y los distintos fitos que diremos alcontrando.
Con 5 horines d'actividá salimos a la parte alta de l'arista y encumamos los 2420 m de la Penubina, onde atopámonos a un grupu de montañeros. Nós echámonos a un llau a xintar con calma y cuando déxenmos un pocu llibre'l cumal, fadremos semeya de rigor colos Picos del Fontán detrás, preparándonos pa entamar el descensu.
Tiro delantre na baxada y enseguida pillo a los montañeros anteriores, viendo que-yos va costar un triunfu movese pela baxada normal de Penubina y como veo que'l restu del grupu nuesu tamién va tomalo con calma, faime click la tiesta y apetezme probar el cadril, poro apreto un pocu les zapatilles y la mochila, pa decidir baxar corriendo hasta'l Meicín.
Nun ye lo más afayaizu, siendo l'encargáu de llevar al grupu, pero viendo que'l borrín ya colara y que casi tolos compañeros ya conocen bien la baxada pela normal de Penubina, tireme a fueu p'abaxo, esfrutando muncho del descensu, viendo que sí, que si vuelvo a entrenar fuerte cuadriceps, a lo meyor pudiera volver a correr dalguna carrerina téunica, ya que nun me sentí nada mal en cuanto a estabilidá del cadril y fuercia de les pates.
Ensin más, aporté al Meicín y tuve mi tiempu tranquilu de relax y silenciu (1 horina y media), tomando unes birres, hasta que fueron baxando tol restu del grupu. Llueu del impás nel refuxu, tocará baxar a Tuíza Riba, onde tuvimos que facer les xestiones de grúa y movimientu de coches pa solucionar el marrón de dexar a tiraos a la metá del grupu.
En resume, ruta mui divertida, sobretou pola más que necesaria ariste Este de Penubina, ya que'l Cuetu Les Cabres, ye un pelín de coleccionistes, faciendo'l percorríu de 11,3 km con un desnivel positivu acumuláu de 1280 m en 8 hores y 15 min, anque pudiéramos restar más menos 1 hora, si baxamos a un ritmu normal y tomamos la cervecina nel Meicín moderádamente.
No hay comentarios:
Publicar un comentario