18 de Mayu de 2025
Track: Salentinos (Ribas de Sil) - Cordales de Xistréu y la Robeza
Tornábemos al monte col grupu, llueu d'un parón de vacas de selmana santa y faciémoslo yéndonos hasta la comarca de Ribas del Sil nel Altu Bierzu, onde ya tuviéramos va dellos años, ascendiendo al Miru y al monte más altu de Degaña, el Veigardón, nuna ruta que dexáranos con un tastu bien dulce, por mor de les vistes y la guapura del percorríu.
Pesie a lo lloñe de la fastera pa nós, dos horines de coche dende'l centru d'Asturies, vamos dir peranimaos, los tres participantes de la ruta, Montse, Rubén y yo. Asina que quedamos en Mieres y arrancamos hacia, Vil.lablino, parando enantes en Güergas de Babia a almorzar.
Llueu del almuerzu y estacazu raru nel Moriscal, continuamos viaxe hacia L.laciana primeru y Ribas del Sil dempués, pasando per Palacios, onde vemos unos cuantos satélites pela carretera ya que tan de fiestes y siguimos hacia Páramu, pa continuar pela guapa carretera hasta'l valle de Salentinos, alloriando un pelín colo guapo del llugar.
Preparamos tolos trastos y pasaes les 9 y media, somos a salir caleyando pel pueblu, enterándonos qu'esiste un albergue de montañeros, camentando lo desconocío d'estes tierres pa nós. Saldremos del pueblu y ya tendremos cartelos informativos de l'ascensión al Catoute, ún de los cumales, que tenemos na tiesta conocer.
Tendremos per delantre casi 4 kilómetros de pista pel valle Salentinos hasta la Braña Salentinos, onde esiste un refuxu, faciéndose bastante apriesa, ya qu'en 50 minutinos aportamos a esta guapa braña. A destacar nesta parte, l'alcuentru con un esbardu al pocu del pueblu, penriba d'una llerona, que quedósenos mirando y llueu coló hacia la viesca (les semeyes y vidios queden pa nós).
Sacante d'esta anéudota, la pista ye agradecida y sirve pa calecer pates pa lo que tenemos per delantre y ye que namái que paramos a sacar una semeyina nun guapu tabayón y el restu, fue dar trisca hasta la Braña Salentinos, onde entamamos la verdadera ruta, siguiendo los cartelos hacia'l cordal de Xistréu y la so cota más alta el picu Valdiglesia.
Ascenderemos per cómodu camín hasta'l mayáu de la Merendiel.la, alloriando colos colores de la beriza en flor y con un pocu más d'esfuerzu, salimos ya per senderu hacia'l cordal, pasando en primer llugar pel altu la Carranca, pa continuar pela cuerda hasta'l primer vértice xeodésicu del día: El Chao (2043 m), onde ganamos vistes hacia'l banzáu de Matalavilla, asina como a tola redolada de montes de Degaña, Ibias... que cuéstame un triunfu reconocer.
El camín ye perclaro, toca continuar al siguiente finxu el picu Braña La Pena, al qu'aportamos con mui pocu desnivel de más, faciendo cota en 2096 m, siendo esti el nuesu primer dosmil del día de categoría. Dende Braña La Pena, aparte de les vistes a les llagunes del Corral y el Carbón, vemos la imponente presencia del Valdiglesia, al que empobinánomos ensin munchu descansu, con una baxada potente y una xubida tendida que va ponenos nos 2137 del puntu más altu del cordal de Xistréu.
Dende esti guapísimu monte, , vemos tolo que tenemos per delantre y nun ye otra cosa que'l cordal de la Robeza, quiciás el doble de llargu que'l que ficimos, asina que picamos dalgo, ponemos ropa que ta poniéndose frío y entamamos una llarga baxada pel altu los Orillos hasta'l colláu de Tierrafracio, onde tenemos vistes del pueblu de Salientes, llugar de partida de rutes hacia'l cordal de Xistréu o al Nevadín, monte que tamién pícame enforma.
Paramos mediu segundín nel colláu de Tierrafracio (1804 m) y echamos la vista hacia arriba, ya que va tocanos ascender de nuevu más de 300 m de desnivel, dando exemplu de por qué estos cordales, caltienen dosmiles cimeros de la cordelera Cantábrica. Ensin más, ponémonos en marcha, xubiendo quiciás, el monte más pindio de la ruta, como ye'l picu la Robeza (2039 m), el cuál sufrimos decidiendo siguir de continuu hacia'l picu la Cernella, puntu más altu del cordal.
Dempués de la Robeza, dosmil de tercer categoría, baxaremos al colláu con vistes a la llaguna la Robeza y entamaremos un llargu y sele ascensu hasta'l picu la Cerneya de 2126 m, cumal de más altor del cordal de la Robeza, nel que ya sí, decidimos tumbarnos tranquilamente a comer y descansar, ya que nel intre, llevamos casi 5 hores y 13 km de ruta, poro'l descansu ye más que merecíu.
Con tola pereza del mundiu ponémonos en marcha, teniendo per delantre, el tramu más divertíu del cordal, sobretou na parte más averada al Catoute, teniendo que poner les manes en dalgún puntu, pero sin mayores problemes, encumamos los 2118 m del picu Catoute, ensin dubia, ún de los montes más nomaos del Bierzu, anque na realidá el Cerneya, seya de más altor nesti cordal y el Valdiglesia na contorna más cercana.
Con una bona soba enriba y ñubes amenazantes hacia'l sur, decidimos nun parar muncho nel vértice del Catoute y arrancamos de nuevu, teniendo per delantre un tramu quebrapates qu'entama a pasar factura, ya que tendremos que facer dellos dosmiles ensin categoría como los altos de Calogán y continuar hasta otra remesa de montes de 1980 m aprosimádamente, que van mermándonos les fuercies, sintiéndome perbien xubiendo y baxando pindio, pero sofriendo un pocu col cadril nos tramos más seliquinos onde la zancada rápida nun me va tan bien.
Abandonamos los altos de Calogán, pasando pembaxo de Fana Rubia y comerémonos dos montes que faense duros como los Corros (1988 m) y el Abranal (1984 m), teniendo dempués que facer otru descensu, pa entamar l'ascensión al últimu dos mil de tercer categoría del día, como ye la Peña Noguera de 2003 m, el cúal fízonos hasta ilusión dempués de pasar per varies llombes que nos fueron amatagando les fuercies, hasta esti puntu, onde al fín, tenemos enfrente l'últimu oxetivu del día, el vértice del altu la Bobia.
Coles primeres goteres cayendo y poques ganes de moyanos, descendemos de la Noguera y xubimos a fueu hasta'l Altu La Bobia (1947 m), onde sacamos semeya coles nueses cares cansaes y entainamos a descender hasta'l colláu onde miramos el track y les ñubes pa guianos y decidimos aventurar baxada hacia Salentinos pel valle anterior al que teníemos preparáu, el de Sunida, ya que les ñubes de lluvia convidónos a intentar acortar un pelín la ruta.
Dempués d'un primer tramín con senderu bien claru, aportamos a unos praos onde dubiamos un pocu per onde tirar, anque bien ceo alcontramos traza de senderu, que va llevanos a garrar un senderu a la vera de la riega, agasayándonos una baxada pente beriza floriada, árboles col verdor primaveral y pequeños tabayones según vamos avanzando valle abaxo.
Finalmente, aportaremos a la pista pela que xubiéramos munches hores atrás, descendiendo finalmente hasta Salentinos, saliendo casi al altor del cartelu de la ruta al Catoute, poniendo los nuesos pies cansaos na furgoneta llueu de 8 hores y 20 minutinos, 23 km y un desnivel acumuláu de +/-1750 m, esfrutando d'una preciosa ruta al traviés de dos cordales con 6 seis dosmiles de categoría y 3 vértices xeodésicos.
No hay comentarios:
Publicar un comentario