martes, 29 de septiembre de 2020

Caín (Valdión) - Mesones - Torre Los Cabritos - Puertos de Cuba - Capozu

15 de Xunetu de 2020

Track: Caín (Valdión) - Mesones - Torre Los Cabritos - Puertos de Cuba - Capozu

Alborecemos un día más nel Albergue de Caín, esfrutando cola calma d'un almuerzu recién fecho. Ye lo que tien venir en Xunetu al monte y non n'Ochobre, que tenemos más hores de lluz pa les nueses xabazaes y tamién d'estes pequeñes coses.

Poro, magar de llenar el banduyu, preparámonos y salimos Caín p'arriba, sortiando les obres de renovación del empedráu, colo que los vecinos anden pelín molestos, ya que paez ser que nun tuvieron pandemia pa facer la obra y non en plenu mes de Xunetu, estráu de turistes. Lo de los políticos nun camuda nin nos pueblos, nin nes ciudades, nin nos paises, siempre fadiando al ciudadanu.

Partimos del pueblín de Caín (460 m)

Una vegada más y paezme que ya perdí la cuenta, vamos ascender la canal de Mesones, la cual podemos facer hasta'l Boquete, salir pel H.ou Tres Piedralluenga a la mandrecha o escapar pelos Puertos de Cuba a la manzorga. Esta vegada, tornábemos a salir hacia los Puertos de Cuba, ya que'l nuesu destín yera da-y un tientu a la Torre Los Cabritos y sobretou, qu'Ana conociese la canal de Capozu que tovía tenía na llista de pendientes.

Fadremos tol guapu tramu hasta'l sedu Mesones, nel que les ñubes entamen a xugar dándonos unos paisaxes ablucantes, pa como siempre, aportar al mayáu Mesones, pente la ñube. Pararemos un ratín a picar dalgo y beber, cola esperanza que seya namái que borrín mañaneru, comentando un pocu la xugada que tres paisanos llioneses que lleven bon ritmu pero sin saber nin la dirección que quieren siguir.

Facemos clásica ascensión pela canal de Mesones

Sorprende un pocu estes coses, ya que teníen cierta edá pa tener prudencia y esperiencia. Tiren p'alantre mentantu acabamos de recoyer y garramos el desvíu hacia los Puertos de Cuba, oyendo pente'l borrín voces tol ratu hasta qu'acabamos por topalos de nuevu, teniendo una vegada más qu'encomenda-yos curiáu si la borrina tien pensáu quedase tol día. 
 
Por suerte, el día abre definitivu, pudiendo esfrutar munchísimu d'un camín que nun conocía entá como ye'l del H.ucabáu hacia los Puertos, ya que la vegada anterior, ficiéramos camín dende'l H.ou Tres Piedralluenga, bordiando tola fastera sur de la Torresanta, lo que fuera una actividá per interesante.

Averámonos hacia los Puertos de Cuba cola vista puesta na Torre Los Cabritos

A la fin, demientres vamos contándo-yos que monte ye caún, Piedralluenga, Peñeblanca y Robriza, la Torresanta... terminamos por aconseyalos xubir hasta los Puertos de Cuba, onde algamen más vistes de la fastera de Peña Bermeya, que xintasen y ya o dar la vuelta o baxar por Capozu, pero esto últimu fícelo cola boca pequeña. 
 
Col pasu los años, tiendes a nun animar muncho a la xente, ya que llueu siempre quedes cola cosa de que sería d'estos o los otros, o pior entá, se t'acoplen y responsabilidá pa ti. Dexamos atrás a los paisanos, llioneses, bona xente, por otra parte y metémonos de llenu n'ascensión a la Torre Los Cabritos, entrándo-y d'entamu pela primer canalina qu'alcontramos a la so manzorga.

Atacamos la Torre Los Cabritos entrando pela primer canalina a la manzorga
 
Entamaremos a ascender per tarrén amestáu, muncha yerba y piedrina suelto pa pasar a los primeros trepes nel encaxone del canalizu. Equí paramos y recalculamos como los GPSs, jaja. Nun m'alcuerdo que fuera tan complexu-y digo a Ana pero la verdá ye que nun-y di la importancia necesaria y Picos ten pone nel to sitiu rápidamente. 

Ayeri, pel crestéu del Llambrión, cargaos con cuerda, arnés y cascu, nun usamos res y güei que vamos dar un pateín, alcontrámonos con un marrón en forma de milenta aguyes, torres y toes per un tarrén podre superior, por dalgo ye la torre Los Cabritos, sólo-yos da a los robezos por andar per estos picos.

Restolamos nun paisaxe ablucante varies canales
 
Lo meyor de tou, ye que nin siquiera sabemos cual ye la más alta, nin cuantes torres son y comprobando'l gps vemos que se dieron media vuelta, poro toca restolar opciones. Descartamos la primera canalina que garramos ya que vemos un bloque empotráu al final pocu apetitosu y pasámonos a la segunda canal llambriando per tarrén bastante espuestu.
 
La segunda canalina déxanos ascender mediu caminando per tarrén más cómodu, pero na so parte final, ponse mui vertical con una paredina que paez cortanos el pasu. Nun lo tenemos claro y tovía, faigo una traviesa pisada por robezos onde aparte de les brutales vistes de los Urrieles, alcuéntrome con una tercera canalina mui descompuesta que tamién xubiría a una h.orcadina, anque tampoco paez más cenciello que na que tamos.

Algamamos l'ascensión a la tercer Torre Los Cabritos

Decidimos finalmente, intentar trepar pela segunda canalina saliéndonos a la mandrecha, alcontrándonos con unos pasos mui espuestos, trepando bloques que dan la seguridá xusta, con pies terruñosos o yerbosos. Vamos, un placer pa tolos sentíos, así que facemos los pasos sollertes de nun cometer nin un fallu porque'l fostión ye lletal.
 
Aportaremos a lo alto, encumando lo que creyimos la tercer torre de los Cabritos, pero ta enllenu d'aguyes, así que tampoco-y damos mayor importancia. Vemos que la segunda ye más alta, pero l'accesu dende equí ye pa tomalo con calma y probáblemente con necesidá de material, así que restolamos per tolos llaos otra posible baxada pa nun repetir los pasos del final de la canalina.

"Croquis" de la Torre los Cabritos

Magar de dar vueltes, echar un vistazu al final de la tercer canalina, la cual da de too menos bon rollu, decidimos baxar revoluciones, picar dalgo, sacar una semeya de "tamos vivos" y entamar el descensu cola tiesta nel sitiu.

Aportamos fino, fino sin tirar nin una piedra al "pasu" y facemos el destrepe delicáu d'espaldes al vacíu, tocando con mimo cada bloque, evitando lo que se mueve y los pies herbosos o terrosos. Tengo que dicir, que fué de los pasos más malos, poco fiables que fice en trepe y en destrepe, d'esos momentos en monte que nun ties munches ganes de repetir.

Colamos de los Puertos de Cuba pente grandes vistes del Cornión

A los pocos minutos desfacemos apriesa tol restu la segunda canalina y damos colos pies na base la Torre Los Cabritos. Mirámonos, reímonos, dámonos un abrazu y alcordámonos de lo bien que ta'l material nel Albergue y de lo que bien que lo pasamos el día anterior pel cresteríu del Llambrión, navegando per llambries de caliza maraviyosa, jaja.
 
D'esti xeitu, garramos un sitín con vistes a tol Cornión y sacamos la cecina y a xintar daqué, qu'anque fuera polos nervios ya nos lo ganamos. Manda güevos que teníemos na tiesta un día tranquilu de patéu, pues na, taza y media de trepes infames per tarrén descompuestu.

Percorremos los puertos de Cuba pa descender darréu hacia la canal de Capozu

Magar de la xinta, pasiaremos relaxaos pelos Puertos de Cuba, pasando penriba del Chozu de Carbanal, pa garrar la baxadina hacia la cabecera de la canal de Capozu. Entamaremos el descensu per Capozu, alcontrándonos con un grupu mozu de vivaqueros que nos comentan con cierta desesperación que quieren baxar ya.

Somos a pescanciar que durmieron en Vegagüerta, pero nun entendemos qu'a eses hores sigan dando vueltes per ehí, asina que ponémoslos en direición a Cordiñanes pela canal y nos desentendemos, echando un vistacín atrás dacuando, pa ver que nos siguen bien.

Aportamos a la Farfada pa descender pegaos a la riega hasta Puente Capozu

Ye la mió tercer vegada qu'ando per esta canal, yendo un pocu a mi bola, alcordándome d'aventures pasaes, demientres Ana baxa como un curciu, esfrutando a tope de cada pasu. La verdá ye que pa min ye una de les canales más guapes del Cornión, llarga, con un percorríu preciosu y una llegada a Vegagüerta dafechu épica cola faza sur de la Torresanta.
 
A bon pasu, aportaremos a la baxera de la canal, garrando tol senderu de los sedos de los Cabidos, hasta parar al altor de la riega la Peguera, camentando la posibilidá de baxar per ella hacia Puente Capozu. Por dalgún motivu decidimos dir hasta la Farfada, onde echamos un vistazu a la entrada de la canal de Tres La Envernosa que tanto esfrutásemos va añu y picu.

Saldremos de Puente Capozu hacia la carretera pa siguir caleyando sele hacia Caín

Descenderemos siempre a la mandrecha de la riega la Farfada, alcontrándonos con una viesca bien guapa que travesamos, despaciu esfrutando de cada pasu, quedándonos coles ganes de volver cuando tean a tope d'agua les riegues de la Farfada y la Peguera ya que somos a albidrar la fuercia cola que tienen de xuntase y baxar per Puente Capozu al Cares.
 
Coles mesmes, cruciaremos les riegues seques y saldremos pela manzorga hacia un claru onde ya atopámonos coles cabañes de Puente Capozu, travesando tol mayáu, pa salir pela parte alta, en Las Vegas, onde alcontramos una baxadina pelín tomada hacia la carretera.

Momentu de descansu más que merecíu a la entrada de Caín

Sin mayores problemes, fadremos el restu'l camín pela carretera ensin molestamos en garrar el camín vieyu que va pela baxera de Mueñu, travesando los puentes de Canceles, Mabru y finalmente al altor de la fuente la H.arda entramos en Caín parando nel primer chigre a tomar una birra bien merecía.

En resume, percorríu que sacante l'ascensión a los Cabritos, debería ser un clásicu pa los namoraos de les canales, ya que paezme que los 17 km xuniendo les canales de Mesones y Capozu pelos Puertos de Cuba ye la meyor manera de conocer el Cornión valdionés, anque toca pagar un preciu, eso son les 10 hores y media de ruta y los 2000 metros de desnivel acumuláu.

Camudando'l Camín pel Cornión

No hay comentarios:

Publicar un comentario