Cordiñanes (Valdión) - Capozu - Vegagüerta - Les Poces - H.uente Prieta - Vegarrionda (Cangues d'Onís)

7 de Xunetu de 2014

Track: Cordiñanes (Valdión - Llión) - Vegarrionda (Cangues d'Onís)

Tercer día de Travesera 2013-2014 y dempués de les engarradielles col tiempu, la nuesa gran esperanza taba nel día de güei, nel qu'espertábemos col envís de conocer la canal de Capozu y ascender dellos cumales de la fastera de Vegagüerta.

Partimos del pueblu valdionés de Cordiñanes, al cual p'aportar dende Asturies, nun hai camín nin mediu curtiu jeje. Asína que lo meyor, ye dir de monte y conocelu aportando dende cualesquier macizu de los Picos o dende la sienda'l Cares.

Entamamos nel Mirador del Tombu (826 m)

Baxaremos una migayina dende'l pueblu hasta'l mirador del Tombu, onde nun día claro, non como'l nuesu, deberíemos tener vistes a tol seutor del Llambrión, al del Frieru, a tolos parés que cayen hacia'l ríu Cares... una maraviya qu'esperamos ver a la llargo'l día.

Al pocu del Mirador xubiremos alcontraremos al llau de la carretera un camín qu'ábrese a la mandrecha, el cual tien de llevanos calteniendo l'altor hacia l'entamu de la canal. Esti camín, pasará pel guapu monte la Corona, que tien ruta circular combinando cola sienda'l Cares.

Averámonos pel preciosu monte la Corona hacia la canal de Capozu

Nel nuesu andar xunto a Fernan, diremos albidrando posibilidaes de canales perpindies a conocer, anque poques paecen tener ascensu ya que van direutes hacia los parés de les Torres d'Arestas. Aún así, pente les cueves de Los Moros y la Capiya paez xubir qu'asciende pente les peñes d'Espinaréu y Sardón así como la más conocida de Tras la Envernosa.

Nel nuesu caleyar despedirémonos de Fernan, que tien de volver a pola furgo p'alcontranos de nueu delles hores dempués en Vegarrionda... llargu camín en coche hasta ellí. Nós, pasaremos pela fonte de la Farfada que baxa con bona agua hacia'l regueru Peguera que vien dende Capozu.

Facemos sienda a traviés de los Cabidos

Pasaremos cerca la cueva Lluques pa metenos nos Cabidos, primeru pol Bah.eru y llueu pol Cimeru, que son dellos sedos qu'al traviés de tramos ñaturales y otros barrenaos, fadránmos pasar un de los meyores momentos del día.

Hai que dicir qu'esti tramu d'entrada a la canal ye una pasada y les vistes hacia'l Cuetu Agudu, El Pandiellu y el Cuetu'l Chozu, separaos por verticales canales como la de H.orau, faen más impresionantes si pue ser, el percorríu.

La Canal de Capozu supera toles espeutatives nueses... guapa en tol percorríu

Pasaos los Cabidos, metémonos de plenu na Canal de Capozu, la cual na so primer parte, seguirá n'envueltes penriba de los espolones que cayen dende les Torres Pardes p'a posteriori, metese en plena vallina a partir de la cueva l'Agua más menos.

Dende equí, con una pingadura fina de la lluvia cayida na vexetación el día anterior, veremos con desesperación que'l día sigue ensín querer abrir del tou. Miramos hacia'l nuesu destín en Vegagüerta y sigue tapecíu pel borrín y miramos pal macizu central y nun vemos nin un sólu cumal... pinta feu l'asuntu.

Parte cimera de Capozu entrando en Vegagüerta

Dexaremos posibles desvíos hacia los puertos de Cuba como'l del mayáu del Verón del Corvu y el Chozu del Carbanal y siguimos hasta la siguiente salida hacia los Puertos, ya que vemos tola vallina hasta'l refuxu de Vegagüerta con muncha ñeve y nun mos apetece catar los ñeveros.

Fuera del final de la canal, siguimos sienda cenciella viendo esnalar la borrina penriba de cumales que teníemos na llibreta: Punta Estremera o les propies Torres de Cotalbín que tan xustu enriba del propiu refuxu, nel que nunca meyor dicho... refuxámonos d'un cutu descomanáu.

Descansamos en Vegagüerta (2038 m) y siguimos camín hacia Vegarrionda

Pasamos 40 minutos dientru'l bunker de Vegagüerta, xintando y descansando ya que llevamos casi 4 hores d'ascensión. Tantu esfuerzu, casi ensín parar con Bittor y Alberto, pa nun poder xubir nin un cumal ya que la borrina ye fonda y el fríu nel mes de Xunetu ye fuera lo normal.

Con una mala hostia fina, faigo camín hacia Vegarrionda pel conocíu camín pelos h.oos de la Llerona y les Poces, los cuales al igual que na Travesera 2011-2012 na ascensión de la Torrezuela, caltiénense con bien de ñeve y con mal tiempu como nel día de güei, poro sigo ensin conocer les entrañes de la Peñasanta Castiella coles aguh.es de Corpus Cristi y del Gatu.

Arrodiamos el h.ou la Llerona entainando hacia la h.orcada les Poces

Travesamos a escape ñeveros na Llerona y aportamos a la h.orcada Les Poces onde acolumbramos más ñeve inda, quedando un pelín ablucaos pola cantidá contando qu'esti añu nun fué de los más ivernosos, pero bono Picos ye así, hai qu'aceptalu y pasar con curiáu ensín resbariar.

Por suerte, podemos relaxar un pelín ya que paez qu'esti h.ou ye más protexíu que l'anterior y nun fae esi fríu que nos xelaba y a pesar de llevar tola ropa disponible na mochila, fízonos casi correr peles lleres y la ñeve pa finar la travesía penriba la Llerona.

Esfrutamos un pelín del sol y de les vistes na redolada de les Poces y el H.ou Lluengu

Nel intre, intentamos esfrutar de les vistes hacia la Cabra Blanca, Estribos, Garites... y de dellos collacios que tenemos penriba nuesa: torres d'Enmediu, la H.orcada, les Tres Maríes y el Torcu, asína como de la Torrezuela, la cual dedicimos esta vegada arrodiar pembaxo conociendo un nuevu camín.

Nin con mayores nin menores dificultaes que pel otru, vamos dir faciendo pasu baxo la Torrezuela dexando atrás Les Poces y viendo embaxo nuesa tol h.ou Lluengu cola compaña de la xerra Mercader a la so manzorga y de los parés del Requexón y torres de Canal Vaquera y Cotalba a la mandrecha.

Una pequeña ascensión nel Altu la H.uente Prieta (2131 m)

Como altu nel camín, al altor ya de la H.uente Prieta, vamos ascender ún d'esos granos que surden enmediu los h.oos y que suelen nomase como altos. Ésti, que nun vien en dengún llistáu pero que siempre que pasé per equí dióme sensación d'importante, nomélu como Altu la H.uente Prieta y tien 2131 m con un trepe y destrepe mui prestosos p'al menos quitar esa fame de facer cumes.

Dende equí ya sólo, quedónos descender a la H.uente Prieta y ascender hasta'l Mosquil de Cebolleda (2108 m) pa garrar el marcáu senderu hacia Vegarrionda, pasando al llau de los porros La Mazada y Bolu siempre tan picantes pa cualesquier montañeru.

Camín perconocíu hacia Vegarrionda dende'l Mosquil de Cebolleda

El restu'l camín tornaremos a facelu pente la borrina alcontrándonos na Llampa Cimera a Fernan que cansáu d'esperanos salió a estirar les pates y a facenos compaña, entrugando que tal nos fuera la xornada de güei, de nuevu marcada pol mal tiempu y el fríu, torgando planes más ambiciosos no qu'ascensiones refierse.

En resume... con un bon día y posibilidá d'ascensiones cencielles na fastera de Vegagüerta sería una ruta ideal, así quedóse un pelín más feble pero con mui bonos datos a rexistrar: 18,5 km de percorríu, casi 2000 m de desnivel positivu acumuláu y cerca de 10 h y media andaes... nun ta nada mal.

Camudando'l Camín nel Altu H.uente Prieta

Nesta ruta ficimos 1 dosmil de Picos d'Europa: Altu La H.uente Prieta (2131 ms)Ver progresos en: Retos montañeros