Vegabañu (Sayambre) - Peña Bermeh.a - Posada (Valdión)

8 de Xunetu de 2012

Track: Vegabañu (Sayambre) - Peña Bermeya - Posada (Valdión)

Son les 8 y media de la mañana y tamos preparaos pa la segunda estaya de la Travesera Picos 2011-2012. Atrás queda'l despertase con cierta dificultá y remolonear un pocu dientru'l sacu, pa dempués tener el meyor de los almuerzos que tuve en dengún de los demás refuxos nos que tuve durmiendo. Espectacular, abundante... asína presta salir al monte.

Tamos nel refuxu de Vegabañu, del que solo tengo bones pallabres, tan solo la lluvia del día anterior privónos quiciás de pasar más tiempu na mesa de fuera con toa tranquilidá, pero dientro tamién tábase de luxu.

P'aportar a esta preciosa vega tendríemos que xubir el puertu'l Pontón dende Cangues d'Onís como ficimos na ruta al Cantu Cabroneru y caleyar per pista durante una hora aproximáu. Así lo ficieren Bea y Josean pa cenar con nós el día anterior.

Coles Peñes Santes partimos de Vegabañu (1320 ms)

Ye un día tan raru como especial por dellos motivos: el motivu normal ye'l que tamos de Travesera y eso ye una allegría de por sí; el motivu ilusionante ye la visita de los nuesos collacios cántabros que xúnense a la travesera pa facenos compaña; el motivu raru y triste ye que namái finar la ruta Fernan y yo vamos quedar solos pa completala y el motivu especial ye facer l'ascensión al llau de Josean que cola Peña Bermeh.a, acaba los sos montes centenarios de Picos.

Con tou esto, salimos con bones sensaciones pal día de güei. Ayeri, fuí la mayor parte del día atrás con Simón y non porque él fuera un pocu floxu y ficiéra-y compaña, sinon porque yo tampoco diba pa tirar voladores y so ritmu yérame afayaizu.

Calecemos pates hacia la viesca de Cuesta Fría

Coses de les pates y de los músculos, vamos ser Simón y yo, los que salgamos con bon ritmu al traviés de les praeres que fáenmos travesar les distintes riegues que xúntense formando'l ríu Dobra y meterémonos con brenga pela viesca de Cuesta Fría, qu'anque tien el nome de cuesta, fáise mil vegaes menos pesada que'l día anterior pa baxala.

Como non, tendremos una paradina nel Roblón, enantes de siguir camín pente la guapa viesca, qu'esta vegada si que vamos esfrutándola a tope, anque tola roxada y lluvia de la nueche vaya moyándonos a cada roce coles fueyes.

Perguapa viesca de Cuesta Fría y Vegabañu a lo lloñe

A la fín, saldremos de la viesca y penriba de les fayes y robles, podremos avistar Vegabañu a lo baxo, lo cual dános pa discutir un pocu, si la ñebla aída dacuando a caleyar ensín ver onde ta rialmente'l nuesu oxetivu o ye meyor velu. Pa gustos collores... pero fízosenos llarga la baxada a toos, viendo o ensín ver, Vegabañu.

Con pocu más, que xubir tola sienda pente la beriza, pasaremos pente'l Cuetu Salambre y el Cerru p'arrodiar el Peñón de la Iglesia pela manzorga, arribando al colláu Frade, baxo un vientu pelín molestu que faínos poner dalgo de ropa.

Alcuentru colos cántabros (Juan, Tino y Jóse) nel colláu Frade

Los 1770 ms d'esti colláu, sedrán el puntu d'alcuentro con Juan, Tino y Jóse, que lleguen pela vega de Llós dende Sotu Valdión, casi a les 10 en puntu. El rixu que pusimos en cumplir los horarios foron increyibles per ambes partes y magar de tomar dalgo de bébora y xinta xuntos, ya tábemos en condiciones de siguir camín.

Cual ye'l camín... pues tornar a la canal del perru... qu'al igual qu'ayeri la baxamos, güei vamos xubila pente la ñebla tamién. Dame la risa, cuando m'alcuerdo de Calleja faciendo'l show col nome de la canal como si te llevase cola llingua fuera, cuando ye de lo más sele que te pues alcontrar per Picos... en fín... programes de televisión.

Xubiendo un día más la canal del Perru

En dalgo menos de 45 minutinos tamos ya nes cercaníes del colláu del Burru y digo cercaníes, porque Simón y yo nun vamos llegar hasta él. Un pelín enantes, vamos desvianos a la mandrecha per un pequeñu valle, col envís de xubir al primer Moledizu.

El restu del grupu, guiyáu por Fernan, va siguir xubiendo pela xubida normal dende'l colláu del Burru hasta'l segundu y más altu de los Moledizos, onde tendrán guapes vistes de Peñasanta Castiella, si la borrina decide colar d'una vegada.

Averándonos hasta'l primer picu de los Moledizos

Nel mio casu, a pesar de nun tener "inda" estos cumales en nengún de los retos, paecíame guapu facer los dos, así que Simón y yo, dímos-y preste, non ensín sofrir polo llargu y pindiu de l'ascensión a los 2256 ms del picu de los Moledizos I.

Cumal del primer Moledizu (2256 ms)

Dende equí, ya namái tuvimos que caleyar cenciellamente hasta un colláu, pa magar d'esti, facer otra ascensión asemeyada al primer Moledizu, xuntándonos toos na cume del segundu a 2300 ms esautos.

Xubiendo al segundu de los Moledizos cola Peñasanta Castiella apaeciendo

Son les doce la mañana y a pesar de tar el día soleyeru, la ñebla sigue xugando penriba d'un mar de ñubes ablucante. Ye un pocu frustrante, ya que dos díes na redolada de la Peñasanta Castiella y nun acaba de querer asomar entera... una pena.

Toos xuntos nel Picu de los Moledizos II (2300 ms)

D'otra miente, toca dir a pol oxetivu montañeru de la estaya, La Bermeh.a. Asína que facemos una semeyina toos xuntos y baxamos tranquilamente hacia la cresta que diba llevános hacia tan guapa montaña.

Hai que dicir que de primeres intentamos siguir tola cresta, pero llega un momentu nel qu'hai un trepe per un canalizu que va dexanos nun cortáu, nel que los trepes y destrepes son pelín complexos anque seyan unos 5 ms de corte.

Averándonos a la Bermeh.a bordiando'l crestéu pembaxo

Equí, perdimos una media hora y ye que trepar el canalizu casi toos y tornar a destrepalu de nuevu, llevónos a tar un ratín dando indicaciones, recoyendo mochiles y palos, por parte de los más avezaos a esguilar. Nun foi nenguna xera abegosa, ye más, foi dalgo guapu de facer, con un trabayu en grupu mui prestosu.

Namái que tamos toos embaxo, ya vimos qu'había que bordiar esti pasu pela fastera norte de la Bermeh.a y asína lo facemos baxando hacia los H.oyos del Caballo per una canal arenosa, dando-y continuidá per una travesía so la canal que baxa del corte hasta ganar de nuevu la canal afayaiza pa tornar a la crestería.

Xubiendo la canaleta pa tornar al crestéu

La verdá ye que dende baxo pude ver meyor el pasu del corte y nun yera nada guapu de facer y menos con tanta xente, asína qu'encomiendo a nun enmarronase y facer esti bordéu que sacante de la roca suelto na que podemos pegar dalguna culada nun tien mayor peligru.

Como premiu, al arribar a la cresta, vamos tener un sele paséu per un típicu amiestu de caliza y yerba, que con pocos metros más d'ascensión va dexános nel últimu cumal que-y quedaba a Josean p'algamar el retu de tolos centenarios de Picos: La Bermeh.a colos sos 2396 ms d'altor.

Caleyando cenciello hacia'l cumal

Foi un placer, poder acompañar a Jose Antonio nesti últimu cumal y a pesar de los nervios de metenos pela cresta dafechu, envede arrodiar pela parte baxera, camiento que toos sabíemos que diba cayer esta montaña sí o sí, jeje.

Norabona a Josean, nesti caberu finxu de los Picos. Cuantayá qu'entamaría con esti retu y pali que pali foron cayendo ún por ún... Urriellu, Les Peñes Santes, Torre Cerredu,... y munchísimos más picos que de xuru-y suponen una sensación distinta caún.

Oxetivu cumplíuuu... La Bermeh.a (2396 ms)

Había que cellebralo con una hora de descansu, nesti guapísimu cumal, nel que pudimos picar tou tipu d'embutíos, quesu y demás hestories pa fartucase, demientres esperábemos a que'l día espeyara del tou pa ver a la reína... pero nun hubo manera y tuvimos les ñubes esnalando penriba de tol macizu.

Al final, dímonos por vencíos y decidimos reentamar la ruta. Pa ello, tornamos so los nuesos pasos, hasta que tuvimos que separtanos en dos grupos: El primeru yera'l que podríemos nomar de retirada de la Travesera y taba formáu por Bea, Josean, Tito, Bittor y Simón y teníen que percorrer de nuevu la ruta a Vegabañu y d'ellí a Sotu Sayambre, lo cual llevólos unes 4 hores y media y el segundu de continuidá, seríemos Tino, Juan, Jóse, César, Fernan y yo.

Baxando hacia'l Bolu pela canal del Bufón

Esti últimu grupín sedrá'l que baxe pela canal del Bufón, la cual va tol tiempu a la manzorga de la Torre del Colláu Verde y que nel so entamu, ye una divertía baxada n'envueltes per tarrén casi arenosu, que faíse aína si se tien confianza y pocu mieu a les culaes.

Esta primer parte de la canal, tendrá un descansu penriba d'El Bolu. Esti monolitu, ye de fácil ascensu dende so parte superior, poro demientres siguimos baxando ya tenemos claru que va cayer tamién.

El Bolu y dellos cumales que cuéstame dixebrar

Pocu más de 5 minutos dende'l colláu del Bolu, vamos tardar n'aportar a los sos 2142 ms y menos ratu taremos nel cumal, faciéndonos unes semeyes ya intentando dixebrar dalgunos de los "cumales pardos" que tenemos en direición norte y ye que sigo sin pescanciar tol mundiu de torres que nos arrodien.

Entainamos a xubir al Bolu (2142 ms)

Pa cuando tamos onde dexáremos les mochiles, indicamos a unos montañeros pa onde paez que ta la meyor xubida, ya que tan na parte más delicada de la canal y vienen derrotaos dafechu. Esto amósanos a les clares que l'ascensión d'esta canal del Bufón ye d'un esfuerzu increyible.

Pocu más abaxo, confirmamos lo camentao. El nivel de piedra suelto ye una brutalidá y eso torna mui abegosa l'ascensión, pero pal nuesu casu, facilita'l descensu, tirándonos pel pedreru a lo xo, esnidiando y salvando la canal en pocos minutos.

Baxando'l pedreru del Bufón col guapu colláu Verde a la vista

En tarrén estable, axuntámonos toos y dempués d'echar un vistazu al colláu verde y a la so torre, albidramos per onde sigue'l senderu de la Travesona qu'aportaría nuna circular al colláu del Frade. Equí, dámonos cuenta que menos mal que l'otru grupu usó la mesma vía nel so descensu, porque esta canal nun ye afayaiza pa tol mundiu.

Siguimos descendiendo baxo los picos de Pambuches

El siguiente tramu tien de llevanos, dende la vertical paré sur del Bolu, hasta'l colláu de Pambuches, pero enantes tenemos que descalzanos pa sacar les milenta piedrines que tenemos dientru de les botes.

El bon humor sigue presente demientres baxamos a Pambuches

Magar d'ello, tendremos un guapu descensu per un amiestu de tramos calizos y tramos yerbosos, que siempre pembaxo de los picos de Pambuches, dexarános na ablucante pradera d'esti colláu de 1870 ms, el cual ye un llugar perfeutu pa descansar un ratín y xintar dalgo.

Toca descansu nel colláu de Pambuches (1870 ms)

Un cuartu d'hora vamos tar tiraos na yerba y siguimos camín alantre, ya que César, que d'entamu diba ser recoyíu pol so pa en Posada, va tener que tirar hasta Sotu Sayambre pa dir con Simón hasta Xixón, menos mal que los cántabros deciden volver tamién pol Pontón hasta Cangues jeje.

Como ya dixi nel día anterior... esti añu la loxística de la Travesera yera un enguedeyu finu y esti cambeu d'última hora, fizo que tuviéramos qu'entainar na baxada, anque tiempu pa descubrir picos nuevos tuvimos.

Baxando por Pambuches con vistes a Pica Gobantes y H.orcada Pambuches

De lo más guapu y destacable, foi la continuidá de les parés dende los picos de Pambuches a la torres d'Ita y Ciega y sobretou'l corte de la h.orcada de Pambuches hacia les torres d'Aristas, cola so puerte enmediu, la Pica Gobantes.

Siguimos baxando hasta dexar enriba les lleres de Pambuches y la Pandona

Pero en dalgún momentu, tendríemos qu'escaecer esti guapu seutor de la Bermeh.a y los sos impresionantes picos y esto foi cuando empobinámonos definitivamente hacia'l pueblu de Posada. Equí, tendremos la vista del seutor de les Peñes Cifuentes y del Llambrión y ehí, los Urrieles tomen protagonismu en tol restu de la baxada.

Vamos metenes na fastera de Pantivalles dexando atrás los altos cumales

Ésta, sedrá bordiando les últimes estribaciones de la Pandona, picu que forma esa especie de terraza colgada que ye'l colláu de Pambuches y baxaremos en pindies envueltes, per un senderu de piedra suelto primeru y llueu ya de tierra hasta averanos a los primeres viesques, onde podremos refuxanos un pocu del sol, que pegaba fuerte a estes hores.

Posada y el Frieru dende lo alto de Pantivalles

Na solombra de la viesca, xubiremos nun últimu esfuerzu hasta les cabañes de Pantivalles, onde ya tendremos vista del pueblu de Posada, final d'esta segunda estaya. Nesti caberu tramu, llevaremos más d'ocho hores nes pates y les ganes de topanos con una xarra de cerveza na man faen que baxemos pela pista con grandes zancaes.

Aportando a Posada finando la segunda estaya (915 ms)

A la fín, arribamos a Posada Valdión a les 5 y cuartu de la tarde, con una duración de la ruta de 8 hores y 45 minutos pa facer un percorríu de 14,5 kms nos que superamos un desnivel positivu de 1255 ms y lo que suel machacar más los músculos, 1665 ms de desnivel negativu.

En resumen... ruta mui prestosa na que conocimos dellos llugares completamente nuevos pa mi y pa Fernan, colo que cada vistazu que-y dábemos a un llugar yera ilusionante, como ilusionante foi compartir la ruta con tanta xente... anque dempués de les cerveces y les despedíes de la xente... quedamos solos Fernan y yo, con dos díes per delantre que como siempre son otra hestoria más.

Nel intre, solo teníemos que garrar "posada", duchanos, descansar, ver per interné como Roger Federer ganaba su 7º Wimbledon y tornaba a so posición davezu, númberu 1 y cenar, pa mañana tar lo más recuperaos posible pa la tercer estaya...

Camudando'l Camín colos Urrieles al fondu

Nesta segunda estaya de la Travesera 2011-2012 ficimos Peña Bermeh.a (2396 ms) perteneciente al club 111 de PicosVer progresos en: Retos montañeros