jueves, 31 de agosto de 2017

Caín (Valdión) - Canal de Mesones - H.usantu - Vegarredonda (Cangues d'Onís)

10 de Xunetu de 2017

Track: Caín (Valdión) - Canal de Mesones - H.usantu - Vegarredonda (Cangues d'Onís) 


Tercer estaya de la Travesera del GM Xuan de la Borrina y equí siguimos el grupu reducíu de tres miembros. Magar d'una nueche de birres, vinu, cena... y durmir como bardiones, llevantámonos con munchísimu ánimu.

Aparte, miramos pal cielu, que tirara agua con rabia durante la tarde y vemos ñubes y claros, dándonos munchísima esperanza pa la ruta que queríemos facer. Personalmente, llevántome motiváu a tope, contando con qu'al fin, pueda salir de les travesíes y del patéu, amestándo-y un toque picantín al día con dalguna ascensión curiosina.

Entamu de ruta en Caín (453 m)

Con estos ánimos, salimos de Caín, magar de garrar agua na fonte del Caineh.u, pa empobinanos pel míticu camín que tien de llevanos a Caín d'Arriba pasando pel Sedu. Dende lo alto del barriu, aparte d'alcontrar la entrada a la canal de Mesones, tendremos bones vistes del macizu central enfrente de nueso.

A Mesones téngo-y un ciñu especial, ya que fue la primer gran canal que facía na mió vida nos Picos. Hai que dicir, que d'aquella tábemos na primer estaya de la primer travesera y pa nós too yera nuevu y emocionante.

Vamos avanzando pela preciosa canal de Mesones

Alcuérdome de dir entrugando a Fernan en tou momentu, por esto y por aquello y que si'l sedu yera complicáu y mil hestories más. Agora, un día más, voi ascendiendo sele, sacando semeyes y dexando a los collacios que vayan poniendo'l so ritmu... y menudu ritmu ya que Silvia diba a fueu p'arriba.

Según voi xubiendo, nun pueu parar de mirar tamién pa la canal de la H.errera, siendo aquel descensu mui recordáu, por ser quiciás la última gran aventura del nuesu collaciu Simón, nel monte, que na vida cola so propia empresa y dos fíos ya tien abondo.

Averámonos al guapu tabayón de Mesones

Seguiremos esfrutando d'esta preciosa canal, aportando a unos de los requexos más guapos cola presencia d'un tabayón onde podemos refrescanos, ya que tamos nun día chornosu enforma. Dende equí, siguiremos col envís d'averanos al tramu más guapu de la canal de Mesones: El sedu de Mesones.

Los collacios nun lo conocen y flipen col percorríu d'esti senderu colgáu sol vacíu. Dicir que nun tien denguna dificultá y que ye mui disfrutón, pero como siempre nestos senderos colgaos nun podemos más que tar sollertes y estremar un posible resbarion, porque la cayía en dellos pasos ye llarga.

Pasamos el guapu sedu de Mesones saliendo a la parte alta de la canal

Fadremos el tramín del sedu, sacando semeyes y falando de lo guapu del sedu y sacamos la ñariz penriba del espolón que percorre y que nos alcontramos? Pues que tenemos borrín na parte alta de la canal, lo cual déxame un pelín mosqueáu.

Doi la vuelta y agüeyo la mesma situación pal central, un amiestu de ñubes, claros y borrín, too ello enrevesáu y ensin saber mui bien qu'esperar. Siguimos ascendiendo hasta'l siguiente puntu míticu d'esta canal cola mayada de Mesones.

El tiempu tórnase gafu y trastócanos tolos planes que teníemos

Pararemos un ratín a descansar, tovía cola esperanza de que'l borrín seya pasaxeru y siguimos avanzando sollertes de nun perder la sienda cimera de la canal. Hai que dicir que de la mayada Mesones hacia arriba, la canal amplíase y hai varios senderos yendo dalgunos hacia los Puertos de Cuba.

Poro, tenemos que dir atentos y mirando pal gps, sobretou cuando dempués de dellos metros d'ascensión metémonos dafechu nuna borrina fonda y qu'entama a escupir orpín. Les cares van diciéndolo too... hai que tomar decisiones porque con esta meteo los nuesos planes nun valen res.

Toca camudar de planes y empobinanos hacia'l H.usantu

La idega yera ascender Piedra Lluenga y siguir camín hacia Aliseda, pero conozo perbien esa fastera del Cornión y con estes condiciones ye una llocura. Ye un de los llugares de Picos onde más fácilmente podemos perdenos col borrín y nun sería sensatu meter a naide per equí.

La cara d'Haritz reláxase cuando-y digo que camudamos los planes y vamos durmir pa Vegarredonda. Les coses son así nel monte, hai que saber manexase cuando les condiciones nun son bones pa los planes que teníes y nun esponer de más al grupu.

Dacuando les bones decisiones son el meyor cumal

Siguiremos entós, camín hacia'l Boquete, poro trastearemos un pelín col gps y travesaremos un par de vallines hasta ponenos en bona posición baxo la cuevona que ta embaxo de la Piedra Lluenga. Dende equí, garramos un senderu más marcáu y diremos a bon ritmu hacia'l Boquete.

Aportaremos al Boquete y colos compañeros relaxaos, decidimos parar a xintar aprovechando que l'orpín a más altura (2011 m) desapaeció. Lo que nun desapaecieron son les ñubes y podemos ver los cumales de la redolada, pero la borrina sigue xugando y esnalando a delles altures, tapándoles y dexándoles ver dacuando.

Esfrutamos de la soledá del H.usantu y de les sos cumes

Ensin más, garraremos el marcáu camín dende'l Boquete y caleyaremos con calma travesando tol H.usantu dexando a la nuesa mandrecha los cumales de la non ascendida Piedra Lluenga y de los conocíos Traviesos, Canal Parda y Asturianos.

A la manzorga, dexaremos a la reina y de frente tendremos el cresteríu del Torcu y Les Tres Maríes pa continuar coles torres d'Enmediu y la H.orcada, dixebraes de la nuesa Peñasanta pela collada Santa María.

Travesaremos tol H.usantu y meterémonos nel H.ou Los Asturianos pa garrar el trilláu camín que tien de llevanos dende Les Barrastroses al colláu la Fragua y d'ehí pela Llampa Cimera hacia Vegarredonda, ya metidos otra vegada nun borrín fondu, que dexónos claro que ficimos mui bien tomando esta opción.

Camín perconocíu dende les Barrastroses a Vegarredonda


Aportaremos al refuxu y comentámos-y la xugada a la refuxera, qu'amáblemente llama a Vega d'Ariu pa dicir que camudamos los planes pola meteo y con suerte, alcuéntranos sitiu nun refuxu estráu de xente, cosa que nun esperábemos un llunes y con esti día menos.

Al día siguiente.. envede una xornada relaxada y más curtia... díbemos tener una bona xatada pa tornar hasta Poncebos, pero les coses son así... hai que tomales como vienen y salir de les situaciones ensin asumir riesgos y que la xente esfrute del monte que ye a lo que venimos.

En resume... clásica xornada si quies conocer lo más míticu del Cornión. Pa ello, caleyamos durante 7 hores y 50 minutinos un total de 12,5 km, superando un desnivel de 1900 m positivos y 900 negativos, lo cual nun ta nada mal.

Camudando'l Camín en Vegarredonda

No hay comentarios:

Publicar un comentario