Vega d'Ariu (Onís) - Peñeblanca - Robriza

23 de Setiembre de 2016

Track: Vega d'Ariu (Onís) - Peñeblanca - Robriza

Dempués d'una nueche fría p'andar per fuera'l refuxu, tiramos prontín pal sobre y descansamos un bon montón d'hores, ensín esmolecenos muncho por madrugar, ya que nun vamos mui lloñe en kilómetros de patiar pero sí n'intenciones a ascender.

Tamos na Vega d'Ariu y si miramos hacia'l sur hai dos siluetes qu'acaparen l'atención polo afilaes qu'amuésense dende la nuesa posición, son les peñes Blanca y Robriza, ye dicir de color caliar y coloráu (rubrum) así que na de Robliza que nun ví yo munchos robles neses lleres qu'arrodien los h.oos d'esa fastera.

Partimos con un día ablucante de la Vega d'Ariu (1612 m)

Pero lo primeru ye lo primeru, ye dicir como llegar a la Vega d'Ariu... pues la normal sería dende La Ercina, per Trea dende'l Cares o como'l día anterior pel Valle Resecu que prestónos enforma... anque hai munches más pero denguna más cenciella que dende la Ercina.

D'esti xeitu, despedímonos d'unos mozos (Xurde y compañía), colos que compartiéramos mesa na cena y qu'andaben faciendo l'Aniellu, colando del refuxu hacia'l llaberintu d'Aliseda. Como siempre bordiaremos la cabeza La Forma pela manzorga empobinándonos hacia'l H.itu.  

Dende'l H.itu tenemos qu'avanzar per un tarrén caóticu hacia la Boca'l H.oon

Dempués, tocará metenos nel tarrén caóticu d'esta fastera del Cornión, que tendrános un bon ratu siguiendo h.itos, llibrando torques, xubiendo y baxando a h.oos y cabeces, pero mientres téngase claru l'oxetivu y con un día tan prestosu, estes coses queden en na.

El primer oxetivu yera aportar a la Boca'l H.oon, amplia collada qu'asítiase pente la Verdelluenga y la Torre la Celada que va dellos años xuntáramos nuna primer estaya d'una travesera gloriosa. Esta vegada, nel nuesu camín ficimos por visitar la Cueva la H.ayeda, magar del pasu pela Vega Seca y los H.oos de la Mayada Vieya.

Descendemos al H.ou d'Oliseda pa entamar l'ascensu a la Peñeblanca

Magar de una hora y cuarenta minutinos tamos na Boca'l H.oon, onde tenemos vistes hacia l'enorme H.oon d'Oliseda, per onde pasáremos va dellos añinos como parte d'una durísima y mui ñevada Travesera.

Agora, intentamos nun baxar del too, pero por munchu que faldiamos, acabamos na parte cimera del H.oon, decidiendo xubir un pequeñu canalizu hasta una h.orcadina que dános pasu a la base de la Peñeblanca, la cual dende esta posición ye munchu menos fiera que dende la Boca'l H.oon.

Una panda enorme va faciéndonos ascender y acolumbrar vistes maraviyoses

Dedicimos dexar les mochiles y entamamos, entá a la solombra, un ascensu llargu per una panda amestada pente yerba y pedreru nun primer momentu. Siendo pindia pero cómoda, nun tendrá denguna dificultá hasta la parte alta onde entamaremos a ver que dalguno de los cumales ta más cerquina.

Penriba la metá del ascensu, el monte tresfórmase y la panda herbosa camuda a tarrén de terraces y llambries. Personalmente, ataqué un canalina y trepé per delles llambries pelín espuestes p'aportar a l'arista pero lo meyor, como fizo Fernan, ye siguir en diagonal per tarrén cenciellu hasta casi la cayida a la h.orcada cola Robriza, marcada per un gayoleru xendarme.

Cumal de la Peñeblanca (2194 m) turnándonos pa ocupalu jeje

Dende equí, otra diagonal a la manzorga, usando un pelín les manes en dalgún resalte y caleyando pela arista hasta'l cumal, el cual será perpequeñu, aéreu y calizu onde los haya. Dicir que ye casi, l'únicu puntu calizu dafechu de la Peñeblanca, dende la nuesa fastera, ya qu'hacia Caín baxa un paredón qu'abluca enforma.

Esfrutaremos d'esti preciosu monte, turnándonos na cume, ya que nun ye mui afayadiza p'andar corriendo a sacar les semeyes y dempués d'esfrutar de les increyibles vistes sol macizu Los Urrieles, decidimos que ye hora de tornar hacia la faldera'l monte.

De la que vamos baxando, falamos de la galbana que da baxar a poles mochiles y tornar a xubir hacia la collada Llombreras, así qu'averámonos hacia'l canal que baxa dende la h.orcada a ver si alcontramos pasu dalgunu.

Facemos travesía de la Peñeblanca hacia la Robriza

Más menos a metá del descensu, topamos con un bon pasu llateral, que llevarános a travesar la llera y entrar nun terracéu pel qu'avanzaremos col envís d'aportar al entamu de les dificultaes de l'arista de la Robriza.

Durante'l terracéu, unos robezos tuvieron a bien, pasar penriba nuesa y tirame 3 morrillos que ficiéronme correr pasándome raspiándome. D'esti xeitu, camentando lo guapu que ta'l cascu nes mochiles, entamamos l'arista, que de primeres, a simple vista acoyona.

Fernan métese con decisión nella y vamos abordando les pequeñes dificultaes, garrando la sensación de que nun hai tan mala roca como oyéramos y pa enriba vamos llibrando caún pel so llau ensín mayores problemes, sacante d'un trepe obligáu pa salvar un resalte con cayía p'ambos llaos.

Entramos n'arista de la Robriza confiaos hasta la vira "mortal"

Siguimos arista alantre, unes vegaes a la manzorga (la mayoría), otres pel filu y les menos a la mandrecha sobretou na parte final, enantes del muru. Ellí, delantre'l muru, tenemos lo que vamos viendo tola ascensión, una vira en diagonal pembaxo de la cumera y que se supón que debemos tomar.

La vira, con un toque herbosu na fisura, va ser de lo más espuestu que fice na mió vida. De primeres déxase facer bien, pero llega un momentu nel qu'estréchase, echándo p'atrás la muria superior, ensin agarres sol vacíu y la repisa de pies túmbase colo xusto p'avanzar.

Como si d'una escalada de precisión tratárase, vamos avanzando n'equilibriu y lo pior ye que tamos xubiendo, casi nun lo que queremos nin pensar pa baxar. Pasáu esti tramu d'unos 15 o 20 m, la vira sigue igual d'aérea pero tenemos dalgún sofitu más curiosu anque siempre sollertes del estáu de la roca pelín más rotu.

Cumeeee na Peñe Robriza (2751 m)

Finamos la vira y casi andando aportamos al cumal de la peñe Robriza de 2751 m, qu'al menos ye cómodu, ampliu, casi pa echar un partidín de tenis jeje. Taremos dellos minutinos, respirando, baxando les pulsaciones, sacando semeyes como si fuéramos baxar d'equí esnalando, pero la sensación ye de colemos d'equí cuanto antes y ya lo cellebraremos cuando temos en suelu.

Les condiciones tan perfeutes, la vira seca y aún así, sabemos que pa la baxada hai qu'andar finísimu y casi nun tenemos espíritu pa sacar semeyes, una antes del pasu y otra dempués. Descendemos, garramos la vira y aportamos a los metros clave, nos que Fernan pasa moviendo los pies con curiáu supremu y les manes van apoyaes ensín más... nun hai una mínima presa.

Tócame a mí, los que me conocen saben que destrepo de frente tolo que m'echen y nesti pasu nun hai más que romos pa les manes y los pies n'adherencia, nun alcontrando otra solución que poneme d'espaldes al vacíu, a la muerte, moviendo pies y manes cada 5 cm hasta colocar el cuerpu cómodu pa dir destrepando.

Salimos vivos de la vira y esfrutamos totalmente'l restu de l'arista

Finamos la parte más cenciella de la vira, aportando baxo la muria y destrepando, esfrutando ya del restu de l'arista. Tolo demás, ye un agasayu, en comparanza cola vira, tovía tenemos la respiración y les pulsaciones a tou meter cuando facemos l'últimu destrepe dalgo complexu que déxanos ya nel canalizu per onde entráremos terraciando dende la canal.

Sacamos semeyes triunfales cola Robriza y Fernan, m'espeta que nun vuelve a ascendela nin llocu, que nun xube con naide enxamás o al menos per esa vira non. Toi d'alcuerdo con él, si vuelvo nun será faciendo tola vira, ya que nun pasé per un llugar tan aleatoriu y espuestu na mió vida.

Poneme d'espaldes al vacíu, sin pies decentes nin manes ye tar espuestu a un mínimu resbarión y salir volando al vacíu. Cualquier fallu ye matase y mira que tenemos feches coses complexes, pero con ciertu control, manexando los tiempos y con una sensación de tar con un marxe y non nel filu la navaya.

Vía d'ascensu... munchu güeyu cola vira... camiento qu'azul meyor

Aportamos a la collada Llombreras (2088 m) y dámonos un abrazu, falando de llugares difíciles onde tuviemos xuntos que nun son pocos, alcordándonos de la Morra, con un pasu llateral per roca podre pero controlable, l'aventura nas Areneras, Peñasanta Castiella y Cabrones ensin asegurar y tantes otres, pero ésta Robriza llegónos al coral.

Llevamos dos ascensiones potentes y nun tenemos res d'agua nin comida, asína que tirámonos abaxo garrando l'enorme espolón central, pel qu'avanzamos entre llambries, evitando les dos canales qu'entrambos llaos baxen a Oliseda, aportando a les mochiles con un secañu importante.

Baxamos con secañu de Llombreras a Oliseda

Xintaremos con calma, fai un día pa espatarrar y ya ta tol pescáu vendíu. Ficimos lo que quiximos, xuntamos ambos cumales quitándonos metros de desnivel anque ganásemos en tarrén téunicu y los picores de grandes ascensiones desapaecieron pal día y quiciás hasta pal restu de los díes pel Cornión.

La aérea y espuesta Robriza y la pindia y llarga Peñeblanca dexaron el banduyu d'aventura enllenu y la fame de trepar escosó. Con calma y fartucos tamién d'embutíu y quesu, recoyemos trastos, llevamos al llombu la mochila y entamamos sele l'ascensu de nuevu a la Boca'l H.oon.

La calma y aselamientu son los motores pal camín hacia Ariu

Dende equí, apodéranos una calma, qu'aprovecharemos pa charrar de mil coses y baxar pelo que meyor vamos viendo. Asina, aselaos del too, averámonos una vegada más hacia los milenta senderos que vienen d'Aliseda y aportaremos al H.itu, ensin dexar de mirar pa los Urrieles que tan abandonaos dexamos esti añu.

Con pocu más, qu'entretenenos mirando pa los ganaderos apurando a recoyer el ganao, aguiyándolos hacia vegues más averaes a los llagos, siguimos cruciándonos con dellos montañeros que con un día tan bono, visitaron la Vega d'Ariu y tornaben de vuelta quiciás col tiempu pelín curtiu.

Acabamos aportando a la Vega d'Ariu con estes vistes

Aportamos al refuxu d'Ariu, caleciendo'l sol con fuercia entá y pidímos un par de cerveces pa cellebrar unes ascensiones que caltendremos n'alcordanza, casi siempre que seyamos a xuntanos pa siguir faciendo monte.

Los datos son lo de menos con 10,2 km de percorríu, 1040 m de desnivel positivu acumuláu y un total d'actividá de 7 hores y media, que quédanse nuna migayina en comparanza coles sensaciones de felicidá, nervios y templanza pa superar momentos claves del día.

Despedímonos en mediu la cena con un atapecer de restallu...

Camudando'l Camín n'Ariu con un preciosu atapecer