Vega d'Ariu (Onís) - Pica La H.orcada - Vegarredonda (Cangues d'Onís)

24 de Setiembre de 2016

Track: Vega d'Ariu (Onís) - Pica La H.orcada - Vegarredonda (Cangues d'Onís)

Llevantámonos, un día más, nel refuxu de la Vega d'Ariu, magar d'un día anterior increyible cola ascensión a les peñes Blanca y Robriza y una más qu'agradable cena aldericando con dos franceses de Pau, que veníen faciendo l'Aniellu de Picos.

Pesie a tener bona edá ya, pasaben con ganes de los 70, calteníen un espíritu aventureru que llevába-yos a facer una primer visita a los Picos y faciéndolo con bon xeitu, nin más nin menos, que metiéndose nuna travesía de varios díes... pa quitar el sombreru.

Un día más salimos de la Vega d'Ariu (1628 m)

Almorzamos xuntos y decidimos acompañalos hasta'l H.itu, despidiéndonos hasta'l refuxu de Vegarredonda, convidándolos a dir pelos llagos pa nun lliase nel marabayu de h.oos y vegues del Cornión.

El día alborecíu friucu y con vientu dalgo molestu dende primer hora del día, poro de primeres decidimos tornar pela fastera d'Aliseda y ascender hasta la H.orcada Blanca, col envís de conocer, pela mió parte, esta fastera del Cornión.

Caleyamos per tarrén complexu enforma con h.oos y caliares afilaos dende Aliseda

Fernan, camienta que ya tuviera va años per estos llares, pero nun ye alcordase claramente per onde tuviera, asina que vamos averándonos, esta vegada sí, a la mandrecha del Picu Gustureru, hacia la Vega Aliseda onde paramos a intentar garrar un bon camín.

Conocemos el camín que xube al colláu los Tiros y dende ellí tendríemos ascensión a la Verdelluenga o les Torres de los Cabrones, pero nós nun llevamos esi mesmu camín, sinon que tendremos de dir pembaxo de tou esti cordal calizu.

Negociamos lo meyor que podemos el camín hasta garrar una canal llerosa hacia la H.orcada Blanca

Entamamos per entrar penriba d'unes llambries, siguiendo los mesmos h.itos que van pal colláu Los Tiros, pero aina desviámonos a la mandrecha, penriba d'un tarrén pelín complexu con muncha frecha y dalguna torca profunda pel que tenemos d'andar sollertes.

Sorpréndenos dende l'altor de la nuesa posición, la enorme vega enllena ganáu que tenemos de frente, hacia'l colláu los Tiros y baxo los parés de la Verdelluenga, colo que tenemos claro qu'a lo meyor tendríemos un accesu a la canal más cenciella dende la base del colláu los Tiros.

Tola canal dende la Verdelluenga y l'ascensión a la Pica La H.orcada

De toes formes, plantámonos saliendo a metá de canal pel nuesu itinerariu y llueu namás que quédanos de remontar la llera final p'aportar a la H.orcada Blanca, magar de casi 3 hores dende Ariu. Asina que'l tarrén pel que nos movemos, con un día espeyáu se les trae,... güeyu con metese per estos llugares con borrín.

Nos 2085 m de la H.orcada Blanca, dexamos les mochiles y dámos-y la vuelta hacia l'occidente al paré que cae dende la Pica La H.orcada. En pocos metros d'ascensión de llambries alcontraremos una canaliza que nos llama pa intentar ascender a la Pica.

Cume na Pica La H.orcada (2128 m)

Metémonos dafechu nella y resulta ser una gozada de trepada con una roca perfeuta, algamando l'arista ensin mayores problemes y algamando'l pequeñu cumal de 2128 m nel que sentámonos un ratín y sacamos dalguna semeyina pa l'alcordanza.

Camentábemos un cumal más complexu y quedámonos un pocu desilusionaos, ya que viéramos dalgún reportaxe del Maquis, y tenía una pinta increyible, anque supongo que sería faciendo l'arista dende'l norte cosa que nun mos venía bien nel nuesu percorríu.

Descensu y camín hacia los cumales del H.ou Santu

Ensín más, descendemos pel mesmu pasu y tirámonos hasta les mochiles a descansar y picar cuatru caxigalines enantes de siguir camín. Llueu, saldremos de la H.orcada Blanca per un marcáu senderu nuna llera, baxo les muries de la Punta Gregoria, pa entrar dempués nos dominios del H.ou La Capiya.

Charramos un ratín, si tirámonos a por más montes como'l Porru la Capiya o el Tiru la Llera, pero miramos mapes y gps, miramos pa unes ñubes prietes que vienen del oeste, vemos el desnivel a superar y que nun diba quedar ehí tando al llau, Piedra Lluenga y dexámoslo pa meyor ocasión.

Averámonos hasta'l Porru Los Garapozales

Así qu'ensin más y cola amenaza de ponese feu per adelantáu, tiramos pembaxo del H.ou la Capiya, qu'en realidá son dos h.oos xemelos, hasta aportar a un hombru que fai colláu penriba tamién del H.ou La Canal Parda.

Dende esti colláu, si miramos al norte, veremos un porru que domina a ambos llaos lo que sedría'l H.oon Los Desvíos a la so mandrecha y la Vallugada a la manzorga. Camentamos que ye'l Porru Los Garapozales por ser el más destacáu de la redolada y tiramos hasta'l so cumal teniendo que facer dalgún destrepe y trepe pel camín hasta encumar los 2165 m.

Porru Los Garapozales (2165 m)

Magar d'esti entreteníu cumal, del qu'unos mapes ponen como Porru Los Garapozales y otros pónenlo muncho más baxo, unos doscientos metros de desnivel, tornamos al colláu y abellugámonos pa picar dalgo más, que vamos faciendo fame otra vegada.

Dende equí, xubiremos dellos metros, hasta la baxera del Picu Los Asturianos, onde aportáremos en Xunu con un tiempu malísimu, pa continuar hacia'l H.ou Los Asturianos, baxando per un llugar distintu más pegáu al H.usantu esta vegada.

Descensu tranquilu dende'l H.ou Los Asturianos hasta Vegarredonda

Metíos n'autopista del H.usantu a Vegarredonda, caleyaremos con total tranquilidá, cansaos por mor del pesu de la mochila y la suma de los 3 díes de rutes. La verdá ye que quedámonos con ganes d'un pocu más de caña, pero con estos pesos tárdase muncho en facer les travesíes pa facer más grandes montes por xornada.

En resume, ruta na que xuntamos Vega d'Ariu y Vegarredonda con un par de dosmiles más del Cornión nun percorríu pocu andáu de casi 12 km y 860 m de desnivel positivu, nunes 7 hores y 20 minutos de camín.

Camudando'l Camín con Ortzamendiren Sua