27 de Xunetu de 2025
Track: H.ou Los Cabrones (Cabrales) - Amuesa - Piedrabellida - Cares - Caín (Valdión)
Dempués de la Travesera Picos 2024 - 2025 nun saliéramos entá de monte y llueu de munchos díes d'esguilada per Asturies, pente selmana y de finde, ya tocaba salir a patiar un pocu y esparcer pel monte lloñe de pensar en víes, graos, equipar y apretar más o menos, depende del día.
Sicasí, teníemos poques ganes de pensar en llocures per Picos y más bien teníemos ganes d'un patéu rápidu, a mou entrenamientu que nun lo tuviéremos perlloñe de casa, asina que tiramos hasta'l Puirtu Braña y más en concretu, al aparcaderu de la estación ivernal de San Isidro na comarca del Porma.
Como yera d'esperar, aportamos al enorme aparcaderu ensin gota de vida nesta dómina de l'añu, amosando a les clares lo erróneu d'estes xeres deportives tan estacionales, qu'estrocen sobre manera tol espaciu ñatural pa cada vegada menos díes d'actividá al añu, ensin meteme ya nel ambiente pocu favoratible pa col mediu ambiente, qu'avérase a esti tipu d'instalaciones deportives.
Ensín más, preparámonos y salimos del aparcaderu en direición a los edificios y bien ceo, garramos de referencia la riega Cebolléu, o más bien barrancu, ya que tien un nivel d'argayu increyible, faciéndolo pela so mandrecha, ya que l'argayu na parte superior ye enorme y allóñanos del nuesu primer oxetivu: el picu Tonéu.
Ensin senderu perclaru, pero ensin problemes aportaremos al colláu Tonéu, algamando agora sí un claru y marcáu senderu qu'en malpenes una horina pondranos nos 2087 m del Tonéu, dosmil cimeru astur, que ficiéremos nuna guapa ruta va unos añinos, dende'l picu Fuentes, completando tola cuerda L'Eyu,
Nel intre, pararemos un momentín a esfrutar de les vistes al picu Torres y arrancaremos p'abaxo de vuelta hasta'l colláu pasando pela Llomba (2023 m) continuando hasta la collá Aguyas (1945 m), onde entamaremos l'ascensión a la cota más alta del día, la Peña Aguyas, a la qu'aportaremos dando zapatilla, alcontrándonos con un par de montañeros, de los pocos que díbemos atopar en tol día.
Col oxetivu cimeru del día completáu, ya que tenía pendiente esta peña Aguyas, dosmil Cimeru del Cordal Cantábricu, paez que relaxámonos un pelín y garramos descensu más seliquino hacia'l siguiente dosmil del día como yera'l Picu Roldán (2126 m), que nun ye otra cosa qu'una montonera de peñes cuarcítiques, pero que sonábame por nomalu los collacios esnidiadores traveseros que tenemos nel grupu monte.
Dende'l Roldán, continuamos pela cuerda dellos cientos de metros más, atopándonos nel nuesu camín col picu Cuerna, más nomáu que l'anterior por allugar nel so cumal un vértice xeodésicu marcando los 2139 m, malpentes un par o dos de metros menos que l'Aguyas. Dende la nuesa posición, les vistes entamen a ser terríblemente fees por mor del estrozu de la estación, muncho más marcáu na fastera contraria del circu de Cebolléu.
Ensin más, siguimos cordal alantre, pa terminar la ferradura de cumales de dosmil metros col picu Reondu, completando tol aniellu dende'l Tonéu hasta'l Reondu de 2123 m, puntu nel que decidimos picar dalguna barrina, enantes d'entamar un descensu qu'a lo postreru sería l'únicu puntu señaldable como dalgo dificultosu en tola ruta.
Llueu del parón a garrar aliendu y fuercies, entamamos descensu hacia les llagunes de los Cazadores, siempre garrando como referencia una pindia vallina a la manzorga d'un espolon que baxa dende'l Reondu, teniendo que navegar un pelín p'alcontrar les meyores y menos resbarioses traces de senderu, que llevaránmos a pasar pembaxu l'espolón en travesía a la mandrecha pa finalmente aportar a la fonte y llagunes de los Cazadores, que tovía calteníen dalgo d'agua nesta dómina l'añu.
Travesaremos les llagunes y equí podríemos dexar la ruta tal cual, descendiendo per pista pel circu Cebolléu hasta la estación, pero teníemos ganes d'allargar un pelín más la ruta, poro empobinámonos hacia la xerra de Sentiles, la cual diremos percorriendo cumal por cumal, hasta facer l'ascensión al primer de los sos montes más conocíos, como ye la Peña Requexines (2024 m)
Magar de la visual al llagu Ausente delantre de dos montes bien guapos de la fastera como ye'l San Justo y Runción, continuamos crestería alantre, hasta aportar a la Peña L'Ausente de 2042 m, onde esta vegada, sí que vamos parar un ratín a xintar el bocata ya que teníemoslo bien merecíu llueu de 4 hores y media ensin parar de caleyar.
Xintaremos con calma, Rubén y yo, esfrutando del llabor bien fecho, con una ruta a bon ritmu, ensin parar y preparámanos pal descensu final, que lloñe del mió recuerdu, cuando ascendí a la Peña L'Ausente n'ivernal va milenta años, alcontrámonos el senderu marcadísimu, pesie a lo pindio de la vallina que déxanos nel guapísimu llagu Ausente, onde atopamos a dellos senderistes esfrutando del día.
Coles mesmes, continuamos ya pel percorríu clásicu pente L'Ausente y San Isidro, charrando tranquilamente y echando un vistazu a tola llinea de cumales dende'l Torres hasta les Rapaínes, pasando pol Valmartín, Cascayón, Peña'l Vientu y demás guapos montes mui afayaizos n'ivernal, qu'esperemos visitar ñevaos pal iviernu 2025 - 2026.
Ya con esto, aportábemos al aparcaderu con bien de calor, mudándonos de ropa y arrancamos pal Puirtu Braña, parando na Pola Vieya a echar una cervecina a la solombra, pa festexar los 8 dosmiles d'esta ruta de 14 km y +/- 1135 m de desnivel acumuláu que completáremos en 6 hores y 15 minutinos.
No hay comentarios:
Publicar un comentario