H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

15 de Xunetu de 2026 

Track: H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

Últimu día de la Travesera 2025 - 2026, alboreciendo nel colláu H.ermosu al que llegáramos faciendo una travesía increyible pela Collada Blanca y la Torre La Palanca, volviendo a tener dellos problemes estomacales por mor de la superespeciada cena, pero a cambiu, tuviéramos a gustu viendo una proyeición del leopardu de les ñeves, abrigadinos nel esterior.

Preparámonos con calma, revisando un pocu tol refuxu, porque'l día anterior dalgún espabiláu, robóme los bastones y asina tamos, cola mochila puesta y ensin bastones pa facer casi'l mayor descensu de tola Travesera, teniéndonos que devolve a H.uentedé onde tenemos los coches.

Partimos de los 2065 m del Colláu H.ermosu

Salimos los supervivientes d'esti añu cola vista puesta nas Colladinas, clásica salida de H.ermosu, anque tol tiempu los güeyos se nos van al guapu más de ñubes que tenemos nel valle de Valdión, destacando como non, el macizu del Cornión cola so másima espresión la Torresanta llionesa y la Torre'l Frieru enfrente nueso, que tamién pide protagonismu.

Ascendemos hacia las Colladinas pa siguir hacia la Collada Ancha desviándonos al Hoyu Oscuru

Aportaremos a las Colladinas a bon ritmu y toca despedinos de Carlos y Mario, que tienen les dees desfeches y ya teníen claro, que preferíen baxar pela Vega Lliordes y la canal del Embudu, mientres que Montse, Rubén y yo, continuamos a la collada Ancha pa desviándonos a la mandrecha de la Torre del Hoyu Oscuru onde tenemos un atayu hacia la bas de los Picos de San Carlos y Altaiz.

Pasamos hacia'l Hoyu Oscuru col envís de garrar la canal de San Luis

Aportamos embaxo de la mole de piedra del San Carlos y éntrame la sensación de que llevamos munchos díes patiando ya y nun preparé l'ascensión más que con un track ensin mirar referencies d'ella y veo a los collacios ya tamién con un cansanciu perimportante. Ye bien ceo, pero'l sol calienta muncho ya a estes hores y ye día de retirada col viaxe llarguísimu de vuelta a casa, poro les nueses tiestes dícen a les clares que toca baxar prontín, pegar un piscinazo en Potes y xintar un menú de camín.

Esfrutamos de la canal de San Luis pa continuar per Lloroza hacia Covarrobres

Coles decisiones tomaes, siguimos pel H.oyu Oscuru, dexando de llau les ascensiones y empatamos xustu al entamu de la canal de San Luis, baxándola a fueu, pa metenos pelos h.oyos de Lloroza, navegando pelos senderos que sáquenmos hacia'l Cable, entrando de nuevu na sociedá por desgracia y al turistéu masificáu, qu'aína abandonamos xubiendo hacia'l Butrón, col envís de facer una visitina a los montes d'enriba del refuxu d'Áliva.

Escapamos del Cable hacia'l Butrón pa siguir camín hacia'l Cueturredondu

Tamos en tarrén ganaderu asina que los senderos tan más que transitaos peles vaques, faciéndose bien cómodu'l camín, averándonos al colláu la H.unciana, onde miramos les posibilidaes, dándonos una pereza terrible baxar al colláu de Valdecoru y tornar a xubir a los picos de Valdecoru, decidiendo ascender al más altu d'esti cordal, que ye'l Cueturredondu y que tenemos a malpenes cincuenta metros d'altor penriba.

Ascendemos al Cueturredondu (1915 m) y entamamos descensu hacia Igüedri

Facemos el pequeñu esfuerzu d'alcanzar el cumal del Cueturredondu (1915 m) cruciándonos con un grupín de montañeros veteranos vascos, alcordándonos muncho de los nuesos collacios del Baskonia y namái de facer una semeyina nel cumal, echamos a anchar p'abaxo, empobinándonos hacia la Cuesta'l Quesu, amplia canal que va facenos atayar ensin llegar al puertu Áliva.

Baxamos la Cuesta'l Quesu aportando a la pista que vien d'Áliva

Baxaremos tola cuesta, siempre coles cumes Abenas y el macizu Oriental enfrente, cola alcordanza de les nueses peripecies per Montestigu pa pasar pembaxo de los sos primeros dosmiles, los de Cámara que quedaron pendientes pa otra aventura. A la fin, damos preste a la Cuesta'l Quesu, aportando al rigu Nevandi, garrando dalgo d'agua de la fonte Los Asturianos y siguiendo pista abaxo hacia Igüedri.

Garramos el camín dende Igüedri de vuelta a H.uentedé

Arribamos a la Portilla del Boquerón embaxo los ivernales d'Igüedri, xustu onde sal un percorríu mui transitáu pelos senderistes dende H.uentedé, que serviranos pa terminar esta travesía y que ya ficiera corriendo con Kíla cuando baxara de la Peña Vieya, paeciéndome una preciosidá, pero nel día de güei, vamos tan cansaos y fae tanto calor, que se nos fae llarga y penosa, nun alcordándome del desnivel positivu que conlleva.

A la fin aportamos a H.uentedé, xustu a bona hora pa dir xintar un menú y pegar un pistinazu enantes de conducir de vuelta, terminando esta xornada con esta ruta de 6 hores y 17,25 km, faciendo un desnivel positivu de 580 m y un negativu de 1570 m, que fízonos que la piscina fuera pernecesaria pa descansar les pates.

Camudando'l Camín arribando a H.uentedé