miércoles, 14 de septiembre de 2022

Posada (Valdión) - Chávida - Canal Sur - Frieru - Asotín - Cordiñanes (Valdión) - Bustiu

28 d'Agostu de 2022

Track: Posada (Valdión) - Chávida - Canal Sur - Frieru - Asotín - Cordiñanes (Valdión) - Bustiu

Dempués de la llibrada tormentosa del día anterior, na contorna de la Peña Bermeya, alborecíemos con un día preciosu y una previsión más estable pero tamién más calurosa. Poro, almorzamos na furgo, despidiéndonos d'Ani y Rubén y caleyamos peles cais de Posada de Valdión, garrando bien d'agua, pa salir per un camín na carretera hacia Pandetrave, que nos enllace col Pr-PNPE 15, el cúal tien que dir empobinánonos al nuesu destín, la canal de Chavida y a la posteriori, la Torre'l Frieru.

Partimos de Posada (924 m) con un día bien guapu

Según vamos ascendiendo pel senderu, el calor y la humedá va desprendiéndose del suelu, dándonos una sensación de que nun lo vamos a pasar mui bien. Cuéstanos enforma garrar ritmu y decidimos caltener un pasu continuu anque seliquino, parando namás que pa echar una güeyada a la muria que forma tola redolada de Pambuches.

Avanzamos a ritmu continuu hacia la Canal de Chavida

Como va diez años con Fernan, alcontrámonos en Torones con bona fonte y bebederu, onde paramos un segundín a garrar aliendu y garrar más agua, pa siguir camín hasta la cabaña, onde separtámonos del PR que lleva al colláu Peranieva y la vista sólo pueu fixase na pindia y amplia canal de Chavida.

Pali pali ascendemos pela canal de Chavida hasta la H.orcada Media d'accesu a la canal Sur

A la escontra de la primer vegada que pasara pela Chavida, esta vegada alcuéntrome con un camín bien marcáu, nel que vamos ascendiendo a bon ritmu, acompañaos de delles nubes y cierta brisa, qu'ufreznos l'ánimu necesariu pa superar los metros de desnivel, separtándonos del senderu a la collada la Chavida, xusto a los 2000 metros, pa continuar a la manzorga hasta la H.orcada Media (2120 m).

Con 1200 m de desnivel ascendidos en 3 hores y media, decidimos pegar un descansu, mirar pa les ñubes y pal marabayu calizu que teníemos per delantre. Embaxu nuesa, la canal de Piedra amosaba lo que teníemos per delantre, la so continuidá caliza albidraba un tarrén de xuegu, perdivertíu, pero nel que díbemos alcontrar trepaes constantes y muncha piedra suelto.

Entama la diversión pel espolón Sur de la Torre'l Frieru

Ensin más, entamamos a trepar y envede baxar a la canal de Piedra, continuamos pel espolón Sur, alcontrándonos dalgún h.itu na parte baxa, pero aína perdímolos y la intuición fué la meyor conseyera, continuando pasín a pasu, hasta alcontrar la mayor dificultá nun aguya previa a la H.orcada Alta, la cual bordiamos pela so manzorga, pa destrepar hasta la H.orcada, onde tendríemos la cabera escapada hacia la collada Chavida.

Continuamos de la H.orcada Alta pel canalizu Sur hacia la cumera del Frieru

Les ñubes seguíen amenazantes, pero la tranquilidá de la escapada pela H.orcada Alta, si tornábase la meteo, fízonos continuar trepando ya metíos dafechu nel canalizu Sur, superando unes primeres terraces hasta alcontrar un doble canalizu, el de la manzorga col "nomáu" bloque empotráu y un canalizu más tiesu a la mandrecha nel que vemos una cuerda mui nueva, que nin siquiera usamos, pero que sirviónos de guía y relaxante mental pa tola trepada.

Aportamos a la Torre'l Frieru pel canalizu Sur nuna aventura caliza bien prestosa

Una vegada que salimos penriba la cuerda, con poques trepaes más cencielles más, aportamos a la h.orcadina cola Punta SE y dende equí ya caminando, ascenderemos dellos metros más hasta aportar a los 2445 m d'esti monte, qu'aparte de ser de los 2miles secundarios de Picos, ye ensin dubia denguna de los montes más guapos de los Picos d'Europa.

Semeyina del GM Xuan de la Borrina na Torre'l Frieru

Nel intre, el día asela, les ñubes esnalen y el sol cellebra con nós, esta aventurina pel Sur del Frieru, qu'a dicir verdá, sabiéndose mover nesti tarrén ye un auténticu esfrute, nel que contines trepaes en roca pelín podre nos tramos más cenciellos y con meyor roca no más complexu, caltién esi picor montañeru, que sólo nos Picos podemos alcontrar.

Míticu descensu pela normal NE de la Torre'l Frieru

Col oxetivu fechu, xintamos, bebemos, gociamos de les vistes del Cornión, de tola fastera del Llambrión, del restu de Peñas Cih.uentes cola cercana Torre del Hoyu Lliordes y entamamos el descensu pela normal, siguiendo los numberosos h.itos hasta aportar a los canalizos los cuales destrepamos sin más problema que tener cuidáu colo nidio de la caliza, na que ver col ascensu pela Sur.

Destrepes y pasos curiosos nel descensu norte del Frieru

Llueu de los destrepes, aportamos al ablucante balcón cola Aguya Maria Luisa hasta continuar al míticu pasu llateral, penriba del corredor norte del Frieru, pa continuar ya d'hombru n'hombru hasta destrepar la llambria pedregosa final, que tien de depositanos na llerona que baxa dende la collada La Chavida.

Descendemos hacia la canal d'Asotín navegando hacia'l Llagu Baxeru

Xubiremos unos pocos metros y garraremos el claru senderu que traviesa tola llera, empobinándonos baxo l'espolón NE de la Torre del Hoyu Chicu hacia'l Llagu Baxeru, navegando pente morres y h.oos, hasta la parte cimera de la canal d'Asotín, evitando baxar direutos a ella, ya que na parte baxa corta en delles muries.

Descendemos pela canal d'Asotín hasta la mayada pa siguir pela Rienda hacia Cordiñanes

Una vegada que tamos na canal d'Asotín, garramos ritmu de travesía y descendemos apriesa hasta la mayada d'Asotín, onde tendríemos el desvíu pel Congostu pa H.ermosu, pa siguir pel fayéu d'Asotín hasta la sienda la Rienda, que dexanos nel so aéreu trazáu en Cordiñanes, xustu enantes de que la tormenta, esta vegada sí, que descargue con ganes demientres esfrutamos d'un par de birres nel hostal.

Enllazamos de Cordiñanes a Posada pel camín del Bustiu

Colo prestoso de tar abellugaos, demientres la truena pasa, saldremos una hora más tarde hacia'l mirador del Tombu, onde lloñe de pisar asfaltu, decidimos garrar el camín del Bustiu, que caleyamos ente dalguna chubascada hasta Posada onde zarramos esta circular al Frieru.

En resume, actividá increyible, con ciertu toque alpinu y mui piquista que llevónos a facer esta travesía sur-norte del Frieru nun total de 11 hores y cuartu (descontar una hora de birra-lluvia en Cordiñanes) con percorríu de 17 km y un desnivel de +/-1720 m.

Camudando'l Camín peles Peñes Cih.uentes

No hay comentarios:

Publicar un comentario