27 d'Agostu de 2022
Track: Posada (Valdión) - Bufón - Peña Bermeya - Torres Pardas - Pambuches
Dempués del entrenu pel Picu Gabanceda, del día anterior, esta vegada ya tocaba ruta con tol equipín al completu, averándose hasta Posada de Valdión, Carla y Mario del GM Xuan de la Borrina y dos collacios, Ani y Ruben, del grupu xente qu'axuntámonos pa esguilar davezu.
Como siempre digo, val más ser pocos y afayaizos que munchos y terminar chifláu, asina que teníemos per delantre dellos díes de monte y furgonetéu con un plan trazáu qu'esperábemos llevar a bon puertu. De primeres decidimos camudar l'orde de les rutes per Valdión, entamando per una ascensión circular a la Peña Bermeya, que ya ficiéramos va munchos años colos collacios del Baskonia.
Llueu de saludar a munchos conocíos del mundiu de les carreres pel monte, ya que teníemos el pueblu abarrotáu de furgos y corredores, pa la Transvaldeónica, escapamos pali pali, hacia'l seutor de la Bermeya, ascendiendo hacia Pantivalles, con unes ñubes amenaciantes, que bien ceo, amosaron les sos intenciones con unes tronaes perimportantes.
Al altor de la fonte d'Hurdén, nun mos quedó otra qu'abelluganos media horina embaxo'l fayéu, a la espera que pasara la tormenta, enantes de poder continuar camín pela Llera Pambuches hacia la Pandona, demientres echábemos un vistazu a la baxada que nos diba esperar pela canal de Pambuches.
Demientres el grupu diba entrugándome que tal yera la baxada, ya diba poniendo sobre avisu a los implicaos, poro Ani y Ruben con Senda, ya teníen claro baxar pel mesmu camín. El restu, ya diríemos viendo sobre la marcha, ya que les tormentes siguíen presentes y les previsiones nun yeren mui positives.
Sicasí, el sol facia presencia y el calizu de Los Picos secaba apriesa tola agua que cayera, moyándonos mui pocu los pies na Pandona, pa terminar por secar el calzáu nes lleres de la canal del Bufón, pela que baxáremos esnalando va unos años y darréu facíenos apretar el culu pa ganar desnivel.
A la fín, salimos de la llera al hombru col Bolu, onde dámos-y un descansín a Senda, dándo-y agüina, pa continuar sele hacia la collada Bermeya, onde desvíome dellos metros pa encumar un par de cotes, ensin mayor importancia, que nomen los mapes como Torre del Colláu Verde (2346 m).
Dempués d'encumar estes cotes, empobínome hacia la Peña Bermeya, a la que tan aportando tol grupín, algamando los 2390 m d'altor d'esti 2mil cimeru de Picos, nel que decidimos esfrutar un bon ratín de les vistes, del propiu cumal, del picotéu montuno y d'una ruta de monte, nel intre, ablucante.
Magar de media horina, despedímonos de Ani y Ruben, descendiendo con
Mario y Carla a la collada Bermeya, onde garraremos pocu más abaxo una
traviesa que baxo les muries de Peña Bermeya, tien que dir averándonos,
perdiendo'l menor desnivel posible, hacia la H.orcada Ancha, siempre penriba de tol marabayu de los h.oos Llerosos.
Ensin mayores problemes, averámonos hacia'l siguiente oxetivu, garrando una canalina que terraceando llévame hasta'l cumal del Pardu Pescuezu (2301 m), onde tengo qu'esperar dellos minutos por Carla y Mario que siguieron el track, alcontrándome con un tormentón, salíu de la nada, enriba de la Peña Bermeya.
Con cara de circunstancia, mirámonos demientres la truena rebota en toles peñes del Cornión, decidiendo baxar hacia la collada colas Torres Pardas y nel últimu momentu, continuar el crestéu al norte, ya qu'al menos vamos a la escontra de la tormenta y creyemos que podemos llibrala.
Fadremos tol cresteríu (Torre Parda S (2323 m) y N (2321 m)) a la carrera, quedándonos col tastu amargu de nun esfrutalu como merez, ya que ye bien guapu y divertíu, pero cola negrura enriba nuesa, solo podíemos mirar a la sur de Torresanta llionesa onde calteníase'l sol, faciéndonos avanzar apriesa hacia la lluz como única opción válida.
Col cresteríu esprés completáu, tocaba restolar una baxada segura, cayéndonos les primeres goteres, garrando l'espolón Este de la Torre Parda N, como vía d'escape, alcontrando una baxada segura, con dellos tramos con traza de senderu hasta qu'aportamos a la parte alta del H.oyo Tras L'Horcado, onde baxamos vueltes y decidimos tomalo con calma al ver que la tormenta desplazábase al Sur dafechu.
Aportaremos a la boquera de la h.orcada Pambuches, oxetivu final, pa entamar el descensu final pela canal de Pambuches, pero lloñe de ser un puntu d'escape seguru, como ya me pasara na baxada de las Torres Arestas, tocó poner tola atención nel destrepe d'entamu, ya que ficímoslo pela otra h.orcadina que tien una llambrialina perfina de destrepar.
Llueu del destrepe finu, queda baxar tola llera ensin facer estropicios y ye que nun ye una canal cenciella nin munchu menos afayaiza pa grupos grandes, per equí báxase meyor cuanta menos xente seyamos ya que'l peligru ye total, pudiendo facer dañu con dalguna piedra que tiremos a los nuesos collacios o a dalgún grupu que vaya per delantre.
Les coses como son, hai sitios pelos que pases les vegaes xustes y siendo sinceros, pasando per equí per segunda vegada, nun sé si animaréme más vegaes, lloñe de facela n'iviernu o yendo concretamente a cumales que me falten como la Torre d'Ita o la Ciega, pero pudiendo evitala pienso facelo de xuru.
A la fín, aportamos a la Llera Pambuches onde empatamos col camín de xubida y ya descenderemos alégremente, intentando ganar tarrén, trotando un pelín, a los compañeros que ya diben aportando a Posada y teníemos ganes de xuntanos pa tomar unes birres, cenar y cellebrar esti estupendu día de monte.
En resume, ruta mui guapa, quedando un circular completa colas Torres Pardas y la baxada per Pambuches, pero siendo conscientes del peligru que contién esta canal. En datos, saliéronmos unos 15 km con un desnivel de +/- 1675 m nun total de 9 hores y media de patéu piquista, pudiendo resta-y casi una hora de la parada pola tormenta y la xinta nel cumal.
No hay comentarios:
Publicar un comentario