27, 28, 29 y 30 d'Agostu de 2022
Dempués de que la fola de calor nos torgase los planes montunos nel Pirinéu y de que nun saliese nes feches aniciales la Travesera Picos, intentábemos de nuevu tornar a Picos d'Europa (Asturies, Llión, Cantabria), preparando un par de díes per Valdión y otros dos pela montaña de Riañu, onde ya tuviéramos nuna travesera na que conociéramos la montaña Palentina.
El vienres como ya contara, arriméme enantes hasta'l Puertu Pandetrave p'ascender ún de los montes que meyores vistes del Cornión y los Urrieles tien, como ye'l Picu Gabanceda. Llueu de la carrerina, baxara apriesa pa xuntame colos collacios que vinieren a pasar el finde, como yeren Carla y Mario del GM Xuan de la Borrina y Ani y Rubén, que diben venir per primer vegada al monte con nós.
Col pueblu hasta los topes, por mor de la cellebración del trail de monte la Transvaldeónica, tuviemos echando una cervecina con un ambientín estupendu, pa dir cenar un platu combináu onde pudimos saliéndonos un pocu triste la opción escoyida, pero non siempre aciértase.
Al día siguiente, tendríemos una xornada de monte brutal cola ascensión a la Peña Bermeya y Torres Pardas, qu'esfrutamos como neños tolos collacios, llibrando pente tormenta y tormenta, pa baxar a Posada onde esta vegada sí, tendríemos una cena maraviyosa y una nueche estrellada increyible.
El domingu, continuábemos en ruta, Mario y Carla, col envís d'ascender a la Torre'l Frieru, pela canal sur, oxetivu desconocíu pa tolos participantes, asina que tuvimos un día montañeru con muncha motivación ya illusión por facer una ruta nueva a esti guapu monte, saliéndonos una circular de llibru dende Posada.
Finalizábemos el nuesu viaxe per Valdión, averándonos hasta la montaña de Riañu, onde taba esperándonos Anna que diba sumase a dos díes de monte per esta fastera llionesa. A la cena, prestosina del domingu de nueche, seguiríanos un alborecer a la espera de que la meteo decidiese que facer con nós.
A la fin, como ya contáremos na correspondiente entrada, pudiéramos facer nuna ascensión esprés el picu Yordas, que pesie a la curtia de la ruta, dexónos con un bon tastu, ya que la belleza del percorríu superaba con muncho les nueses espectatives.
Una vegada más baxamos de nuevu dende Liegos hasta Riañu, onde cenamos una hamburguesa y siguimos viaxe hasta'l pueblu de Salamón, onde al abellugu de la so ilesia, díbemos durmir y almorzar a la mañana siguiente col envís de continuar de monte, ya con una meteo soleyera.
Almorzaos, casi buscando'l sol, ya que les temperatures nesti pueblu, nun yeren mui altes precísamente, preparámonos p'ascender al caberu monte de la Travesera, que yera'l más altu de tola fastera riañesa, las Peñas Pintas y que tovía nun tuviéramos la oportunidá de conocer.
Con esti monte, zarrábemos una Travesera distinta, pero ye que colos años, siempre toca reinventanos, restolar alternatives, menos dures que quiciás n'años anteriores, pero que día a día, apórtenmos conocimientu de nueves comarques o simplemente de nueves canales, cumales o inclusu pasos o rutes a un monte ya conocíu.
Como siempre, vamos dexar unos datos a mou resumen y les correspondientes entraes del blog:
Estaya 1: Pandetrave (Valdión) - Picu Gabanceda - Susiella - Altu Vallosero
Duración: 3 hores
Llonxitú: 10 km
Ascensu: 800 m
Descensu: 800 m
Estaya 2: Posada (Valdión) - Bufón - Peña Bermeya - Torres Pardas - Pambuches
Duración: 9 hores y 30 min
Llonxitú: 15 km
Ascensu: 1675 m
Descensu: 1675 m
Estaya 3: Posada (Valdión) - Chávida - Canal Sur - Frieru - Asotín - Cordiñanes (Valdión) - Bustiu
Duración: 11 hores y 15 min
Llonxitú: 17 km
Ascensu: 1720 m
Descensu: 1720 m
Estaya 4: Liegos (Valdeburón) - Picu Yordas
Duración: 3 hores y 30 min
Llonxitú: 9 km
Ascensu: 715 m
Descensu: 715 m
Estaya 5: Salamón (Cistierna) - Peñas Pintas
Duración: 6 hores y 30 min
Llonxitú: 10 km
Ascensu: 985 m
Descensu: 985 m
Totales:
Duración: 33 hores y 45 min
Llonxitú: 61 km
Ascensu: 5895 m
Descensu: 5895 m
No hay comentarios:
Publicar un comentario