26 d'Agostu de 2022
Track: Pandetrave (Valdión) - Gabanceda - Susiella - Vallosero
Tornamos a los Picos d'Europa, col envís de continuar la tradición del GM Xuan de la Borrina, en forma d'especial montañera nuna Travesera de Picos pa esta temporada. El casu ye, que l'alcuentru col restu la xente del grupu yera en Posada de Valdión, ya que teníemos la idega de pasar un par de díes per esta comarca y pente salir de trabayar el vienres y aportar al pueblu, dábame pa salir a entrenar un ratín y de pasu tachar un de los Dosmiles Cimeros de Picos.
Pa ello, pegué en solitariu la xatada conductora, con parada incluyía en Riañu, al pasu de la Vuelta Ciclista, pa siguir per Portilla la Reina, hasta'l Puertu de Pandetrave. La mió idega yera facer una ruta más llarga con ascensión a L'Escañu, l'otru monte de segunda categoría que fáltame nel llistáu de Picos, pero viendo la hora de llegada al puertu, diba ser dafechu imposible, asina que'l Gabanceda diba ser l'oxetivu del día.
Así qu'a les 5 y media, bien pasaes, salgo corriendo dende Pandetrave, pista arriba, primeru per monte baxo y llueu per un pequeñu fayéu hasta aportar a un colláu con baxada hacia'l valle de la riega Gabanceda. Nel intre, la borrina andaba esnalando pela fastera norte del Gabanceda, dexándome namái qu'acolumbrar les cumeres de los macizos del Cornión y Urrieles.
Continúo corriendo cruciándome con dellos montañeros, hasta abandonar la pista pa siguir per senderu h.itáu que faime bordiar pel norte delles morres pa entrar nuna canalina pedregosa, onde ya empobínome pente la borrina hacia'l cumal cimeru del Picu Gabanceda de 2032 m, arribando en tan sólo 45 minutinos dende que saliera de Pandetrave.
Como entrenu, casi siento que quédase curtiu si baxo pel mesmu sitiu, pero la idega que tenía de baxar pel norte, nun ye afayaiza por mor del borrín, asina que decido averame hasta los valles al Sur, cola idega de volver corriendo pela carretera si nun alcuentro otru itinerariu. Aparte, nun quiero retrasar muncho ya que la xente dirá aportando a Posada y hai ganes de tomar dalgo toos xuntos.
Garraré tola faldera sur del Gabanceda, baxando per onde meyor voi viendo, siempre cola vista puesta na cabecera de la riega de Susiella y un senderu que paez venir del colláu Peñas Blancas. Dempués d'un primer tramu más pindiu, alcontraré a metá de vallina un senderu bien guapu que percorrerá a la vera la riega Susiella tol valle hasta aportar a una ampliada mayada onde ñaz el rigu Ceranzo, cola mecedura d'otres riegues.
Na mayada, alcuéntrome con un par de boliches en forma de mastines, a los que doi mimos un ratín, hasta que veo que vien la madre y decido siguir pista abaxo hasta'l crucie de les riegues Ceranzo y Gabanceda, onde camiento que xubir pela carretera va ser una soba terrible, poro tiro de GPS a la gueta d'una meyor solución.
Decido ascender pel valle Gabanceda, si fai falta hasta'l colláu final, pero alcuentro al pocu un senderu pente urcies a la mandrecha, que va llevame a un fayéu increyíblemente guapu, pudiendo meter otra xubidina prestosa hacia'l Altu Vallobero, onde na parte final tocó bregar un pocu con más urcies, hasta alcontrar la sienda que va percorrer tol cordal faciéndome descender cómoda y rápidamente hasta Pandetrave.
A la fín, ente pitos y flautes y vueltines pa sacar un percorríu más llargu, anduvimos a la carrera casi 3 hores, faciendo un percorríu 10 km con un desnivel de 800 m positivos, por mor de la segunda xubida hasta Vallobero, qu'anque paezca tontería, da-y un puntín prestosu a la ruta, pa non facer xubida y baxada pel mesmu sitiu.
No hay comentarios:
Publicar un comentario