30 d'Agostu de 2022
Track: Salamón (Cistierna) - Peñas Pintas
Magar del paseín de tarde del día anterior, cola ascensión al Yordas, alborecemos nel pueblu de Salamón, onde a la vera de la ilesia, con una mañana bien fresca, preparamos un almuerzu, a la espera que'l sol calézcanos un pelín los güesos y músculos enantes d'entamar a caleyar.
Con too preparáu, garramos agua nes fontes d'esti guapu pueblín y namái entamar a caleyar peles sos cais, un animosu cachorru amiestu de mastín con otru tipu de pastor, arrímase a por mimos y en definitiva a venir de monte con nós.
Según tamos saliendo del pueblu y entamando a caleyar per pista tol valle alantre, otra sorpresa en forma de mastín prietu enorme, ponse al pasu nuesu, acompañándonos hasta'l desvíu en Coto Redondo, onde vamos travesar una preciosa viesca y ye que nestos montes, nun sólo la caliza destaca, sinon que los fayeos son d'una belleza enorme.
Continuaremos esfrutando del fayéu, siempre siguiendo l'actividá perruna qu'acompáñanos, alloriando col mastín enorme, qu'en nun par de zancaes alcánzanos, llueu desapaez y vuelve a apaecer, siempre saliendo pel camín más correutu, demientres que'l pequeñu, xuega, golifa y cuerre pente les fayes, como si fuera'l so día descansu y diversión.
Magar d'una hora d'ascensión aportaremos a una collada pente Peña Llueza y el crestón de Peñas pintas, pa continuar hasta una mayada onde alcontraremos l'entamu l'ascensión a Peñas Pintas. Nel intre, camentábemos que los perronos quedaríen per equí, viendo actividá ganadera, pero pesie al calor, continuaron ascendiendo con nós, sicasí, diben restolando solombra pente cualesquier arbustu qu'alcontraben nel camín.
El camín d'ascensu ensin dubia y con delles marques de pintura, va llevanos hacia la collada pente la Peña Pinta Occidental y la Central, anque la opción más sensata ye ascender un tramu per esti camín más marcáu, pa continuar travesando a media faldera hasta garrar una canalina pente los Serrones Negros, que llevaríanos hasta la collada d'accesu a la Peña Pinta Oriental.
Dende equí tan sólo tendríemos que caleyar nuna cabera pindia cuesta y daríemos pasu al cumal de 1965 m de la Peña Pinta Este, onde alcontrámonos con un grupu de collacios de la Cuenca'l Nalón, colos que compartimos picotéu, alderique y comentarios so les grandes vistes que tienen estos montes.
Coles mesmes, descenderemos del cumal oriental hasta la collada y continuareos el crestéu, el cual puede facese per ambes faces, pero pela mandrecha alcontraremos más h.itos y nun baxaremos tanto, hasta per tarrén dalgo abegosu, con dalgún trepe y destrepe, uparémonos hasta los 1926 m del cumal central.
Con pocu más que baxar a la collada occidental, onde vien la xubida normal a Peñas Pintas, vamos entamar l'ascensu final al cumal Occidental de Peñas Pintas, el cuál tendré los puntos más picantes del día, con delles trepaes con dalgo d'ambiente hacia'l norte, cola collada d'Anciles nel puntu mira.
El calor aprieta y vamos con ganes de baxar, asina que nun mos entrentemos demasiáu y entamamos el descensu pela arista Oeste, alcontrándonos con dellos pasos, que tenemos que sortiar un pelín hacia'l Sur pa que'l perrín más mozu, seya a siguinos, ya que nesti puntu sentímonos cola responsabilidá de baxalu al pueblu de nuevu.
Por suerte, el mastín más grandón, quedara colos compañeros asturianos y camentamos que baxará pela normal ensin problemes. Nós, vamos guiyando al perrín como podemos, ya que nun déxase coyer nos momentos que-y da mieu un destrepe, aportando a la fin a una canal herbosa de baxada, que va danos problemes na so parte cimera, onde xuégame un mordiatu del perrín p'algamar un destrepe un pocu espuestu.
Una vegada que llibramos esti pasu tan gafu pal perrín, ya entramos nuna fastera de pedrera, onde'l can muévese meyor, pudiendo garrar ritmu, descendiendo baxo la solana tola canal hasta les cercaníes del colláu Anciles, al que nun aportamos, empobinándonos direutamente hacia la fonte Los Pastores, onde a la fín, el compañeru perruno pude refrescase con calma y supongo que relaxase en tarrén más que conocíu.
Dende equi, echamos un vistazu a la baxada, viendo qu'a lo meyor les canales contigües más herboses y abiertes, diben dar meyor tarrén pa toos, pero bono, ya na pista, nun tenemos más que dexanos cayer con calma hasta Salamón, onde a la entrada del pueblu, topámonos de nuevu col mastinón, que tamién tuviera refrescándose nel rigu y al que'l dueñu piesllara nun cercáu, suponiendo que ya tuviera aventura abonda per esti día.
En resume, otra prestosa y calurosa estaya de monte per Riañu, nel qu'ascendimos les tres cotes de Peñas Pintas, puntu más altu d'esti macizu tan guapu, nuna xornada de dalgo más de 6 hores, con un percorríu de 10 km y un desnivel acumuláu de +/-1000 m.
No hay comentarios:
Publicar un comentario