Liegos (Valdeburón) - Picu Yordas

29 d'Agostu de 2022

Track: Liegos (Valdeburón) - Picu Yordas

 

Continúabemos de monte per Llión, abandonando la fastera de Valdión y los Picos d'Europa, pa baxar un pocu'l nivel de les xataes, averándonos hasta Riañu, onde alcontraremos ascensiones más curties, pero nunos montes d'una belleza ablucante, como ya ficiéramos va unos años col Picu Gilbo.

Magar d'una bona cena per Riañu, alborecíemos col día más bien murniu y con munches duldes de que ruta facer. De primeres, almorzamos con calma y viendo les enormes ñubes y la previsión de la meteo, decidimos averanos hasta Liegos, puntu d'entamu de la ruta hacia'l Picu Yordas.

Partimos a les 3 de la tarde hacia'l Picu Yordas o Burín

Teniemos preparada una circular dende la pista qu'enllaza Liegos con Lois al otru llau del banzáu de Riañu, pero a pocos kilómetros de camín pela pista, les ñubes tornáronse tormentoses y un vientu afuracanáu, fízonos dar la vuelta, teniendo tiempu xustu pa tornar a la furgo enantes de que cayera'l primer bastíu.

Llueu d'otru café nun de los bares del guapu pueblín de Liegos, vemos que nun pinta parar en tola mañana, asina que decidimos echar una siesta mañanera nes furgonetes y cuando espertamos, la torba ya pasara y pudimos sacar les meses y silles pa xintar, viendo qu'era una hora bien afayaiza.

Enxamás llovió que nun abocanare y la tarde quedó preciosa

Col banduyu rellenu, decidimos ascender al Yordas, pero escaeciendo la circular, asina que subimos en furgo pela pista casi hasta'l puntu más altu, cerquina de la collada Lois. Nesti puntu, tendremos un apartaderu curiosu y un cartelu qu'indícanos l'ascensión al Picu Yordas o Burín. 

Lloñe de paecer que la ruta pudiera quedar pelín descafeinada, namás salir de la furgo vamos adentranos na viesca de Tendeña, un fayéu preciosu pel qu'asciende una pista que siguiremos con calma, hasta desvianos a la manzorga baxo los primeros espolones calizos qu'alcontramos.

Perguapu camín d'ascensión per fayéu primeru y con vistes hacia los picos dempués

Saldremos del fayéu entrando nun tramu de monte baxo, que tien de dexanos nel colláu Bayugoso, siempre con un camín cenciellu y con grandes vistes a los macizos de Picos d'Europa, Ponga, Redes y hasta'l monte ayerán nel Cordal Cantábricu. 

A les vistes hacia Asturies, vamos amestar namás que pasemos del colláu les primeres visiones del restu de montes calizos de Riañu, asina como de montes palentinos tan prestosos como'l Espigüete y eso que'l día nun ye'l meyor pa esfrutar d'esta fastera llionesa tan increyible.

Increyibles vistes pesie al día nel cumal del picu Yordas

Con pocu más, fadremos l'últimu tramu más a pinchu d'ascensión, siempre per un perbon marcáu senderu y ye qu'esti cumal, debe ser de los más cenciellos y visitaos de la montaña de Riañu, non siendo por ello, un monte menos guapu nin con piores vistes que tolos collacios de la contorna.

Cumal del Pico Yordas o Burín (1921 m)

En dos hores mui tranquiles de patéu, encumábemos los 1921 m del Yordas o Burín, dando por más que bona la xornada, ya que camentando como punxérase la meteo de mañana, al menos pudimos esfrutar d'una tarde curiosina, na qu'a dicir verdá, pocu más diba meyorar la circular a esta ascensión esprés, ya que tol percorríu en cuanto a vistes y guapura, ye más que suficiente.

Baxada pel mesmu itinerariu esfrutando de casa pasu una vegada más

Col día atapeciendo y con ganes de cenar curiosu, decidimos baxar apriesa, faciendo'l camín alcontrándonos con dellos corredores y montañeros, que paez ser, albidraron la posibilidá de facer dalgo tamién na tarde, llueu de que pasase tola torba mañanera.

Nós, aportamos de nuevu a la furgo, magar de 3 hores y media de ruta tranquila, nun percorríu curtiu pero bien guapu de pocu menos de 9 km con un desnivel acumuláu de +/-715 m, la cuenta pa facer fame pa una hamburguesa en Riañu.

Camudando'l Camín na montaña de Riañu