Horcadas (Tierra La Reina) - Pico Gilbo

14 de Xunetu 2018

Track: Horcadas (Tierra La Reina) - Pico Gilbo) 

Pues sí, alcontrámonos en Horcadas, na montaña de Riaño en Llión y tamos na octava Travesera. Como ya dixe nel resume, esti añu camudamos un pocu el sen de les travesíes per Picos a facer ascensiones nel monte de Riaño y Palencia.

Magar de la tumiza de coche de Xixón, pel corredor del Nalón, Puertu Tarna y finalmente Riaño, siguiremos un pelín más cruciando'l banzáu de Riaño pa desvianos dempués hasta'l pueblu de Horcadas (1137 m) onde partirá la nuesa ascensión del día al Picu Gilbo.

El grupu entama la xornada en Horcadas (1137 m)

Totalmente a la escontra de lo que ye vezu nes traveseres, vamos facer una rutina tranquilina, pa que la xente vaya poniendo les patuques n'orde, sicasí esto nun va pegase cola guapura de l'ascensión nin col ambiente durante l'ascensu.

Saldremos de Horcadas, magar de garrar agua na so fonte y sin perda caleyaremos nun cómodu ritmu pela pista de la manzorga de les dos que xuben hacia'l colláu del Baile (1274 m). Nesti casu, el nuesu camín sedrá a la solombra d'una viesca hasta salir na parte alta pela manzorga del cuetu Casnello, dando colos nuesos pasos a las Vallejas, onde tendremos un bon bebederu pa que se refresquen les perrines.

Facemos tol averamientu a la base del picu Gilbo

Ensín aportar al colláu del Baile, entamaremos l'ascensu hacia'l Gilbo, que lleva presente dende Horcadas prácticamente. De primeres, nun garramos del tou bien el senderu y ye que lo meyor ye tirar de frente hacia un marcáu hombru.

Una vegada que garramos el senderu, namái que tendremos qu'esfrutar de una guapa travesía na que les vistes sol banzáu de Riaño y la xerra de los Villaros col Pico Jano, son una pasada. Perpasáu l'hombru, garraremos un canalizu pindiu, pel que diremos caminando cola aida de les manes en dalgún pasu qu'otru, col envís d'aportar a l'arista xusto pente la Peña Los Serrones y el cumal del Gilbo.

Ascensión guapa y cenciella hasta l'arista onde les vistes abluquen

Si sumamos al ambiente gayoleru del grupu, esta llegada al cresteríu, el momentu nun puede ser más especial. Tengo que dicir, que poques rutes tan curties, pueden tener tantes coses xuntes. Y ye que con mui pocu esfuerzu de caleyar y poner les manes dos vegaes contaes, alcontrámonos con un espéutaculu en cuanto a vistes y con un crestéu cenciellu que fai pasalo como auténticos guah.es.

Cume nel picu Gilbo (1679 m)

D'esti xeitu, coles cámares y los móviles sacando fumu, ficimos casi tol restu de la crestería pente rises y comedia. Nel cumal de 1679 m, una ñube de mosquitos va empañar un pelín la estancia tranquila nesti y como les vistes nun ameyoren lo que ya viviéremos, decidimos continuar col descensu pela fastera contraria.

Descendemos pela fastera contraria hacia una pequeña collada

Per un claru senderín diremos perdiendo altor, con dalgún pasu de poner manos pero sin mayores complicaciones, diremos viendo les posibilidaes p'ampliar un pocu la xornada, anque les ñubes d'evolución qu'albidraben van apaeciendo pali pali.

El Cuetu Cabrón, vémoslo un pocu fuera de ruta y paez tener un accesu pelín abegosu pente una viesca zarrada, poro decidimos siguir el nuesu senderu, pero una traviesa preciosa con vistes hacia l'oxetivu final: la Peña Sarnosa.

Entretenémonos cola ascensión a la Peña Sarnosa (1464 m)

El nome nun ye mui guapu y a dicir verdá l'ascensión tampoco ye pa tirar voladores, ya que parte del grupu fízolo pela fastera norte, cosa que nun me prestó res por mor de la mió perrina, Kíla. Asina que dimos la vuelta a la cara sur y per ellí alcontramos una vía pela que pudiera trepar, aportando al cumal de 1464 m ambos grupos.

Ensin más, una cota apuntada pal bolsiellu, de non muncha importancia y non mui guapa precísamente, pero valió pa lo que teníemos en mente, facer un pelín más llarga la ruta y da-y un pocu más de picantín coles trepaes.

Baxamos cola calma hacia'l colláu del Baile de nuevu

Coles mesmes, descenderemos pela mesma ruta na fastera sur, cola importante presencia de la cara oriental del Gilbo y pasando penriba de la riega Vallarqué ya intentando nun molestar al ganáu, siguiremos a la gueta d'un bon senderu que nos dexe nel colláu del Baile.

Ellí, pararemos unos minutinos pa picar dalgo, ya que nel cumal del Gilbo les mosques andaben fadiando. Tiraos nel prau, hai que sacar la guiyada pa facer que la xente siga alantre, ya que Jose decidiera nun dir a la Sarnosa, nun m'estraña, tirando pal pueblu enantes que'l restu del grupu.

Nel colláu del Baile garramos la directa hacia Horcadas

Nel Baile, alcontrámonos con un cartelín que diz que llégase a Horcadas per otru camín y dempués de comprobalo nel gps, el grupu astur decidimos facer la ruta un pelín más circular baxando per una pista bien guapu y al mió entender más rápida que la qu'usamos pa xubir bordeando'l cuetu Casnello.

Con pocu más de 4 hores y media de ruta, aportaremos a Horcadas de nuevu, onde les prises por cerrar del chigre dexónos ensin la birra de dempués hasta Riaño, cosa qu'a Jose sí que le dió tiempu a tastiar cola calma. El calor, fue más bien el culpable d'esa ansiada cerveza, ya que nin los 7 km nin el desnivel superáu (580 m) fueron merecedores de tal premiu, jeje.

Camudando'l Camín en Riaño