Track: Caín (Valdión) - Cordiñanes - Asotín - Argayu Congostu - Colláu H.ermosu (Valdión)
Esto del monte ye así, al mal tiempu bona cara. Teníemos planes A, B y C pal tercer día y paezme que tuvimos que facer hasta'l D, porque de xuru, nun tenía comtempláu ascender a H.ermosu pela normal o al menos, pela más transitada nos últimos tiempos.
Yera la tercer estaya d'esta aventura per Picos, quiciás la más ambiciosa y dura nos planes iniciales, pero toca amoldase a les situaciones y pa eso nun tenemos precio. Magar de tola nueche oyendo llover, ventiar y tronar, a l'alborecer fue más xabaz entá y dende'l nuesu abellugu, nel albergue de Caín, veíemos na ventana'l techu, como rellumaben los relámpagos penriba de los Urrieles.
Saliendo de Caín (475 m) con un día permalo
La imáxen yera baxonera, pero metíu dientru de la camina, veíase d'otru xeitu y con una mirada ya diximos que pa que madrugar, vamos sobar otru ratín jeje. Asina, que cola calma, llevantámonos más tarde de lo que teníemos en mente y baxamos a almorzar, viendo qu'al menos paecía que paraba una migayina.
Preparamos tolos trastos, recoyemos tola habitación, ponémonos el gore y el chubasqueru mochileru y salimos de Caín a pol nuesu plan D. Nun queda otra opción, garramos agua na fonte del Caineh.u y echamos un vistazu a los nuesos planes y les canales que queríemos ascender están empapaes y la meteo, nun ye mui positiva pal restu'l día, sacante del collaciu del Tiempu n'Asturies que diz que para de tarde.
Vamos pel camín del Cares hacia'l Monte la Corona
De lo malo, voi conocer l'ascensión a H.ermosu pel Argayu Congostu. Tien coyones, qu'en tolos años que llevo faciendo monte nunca xubiera al refuxu per esti percorríu. Tengo aportáu o coláu de H.ermosu per Mueñu y el H.ou Grande, pelas Colladinas delles vegaes y la más guapa peles Travieses del Llaz pero pel argayu Congostu non.
Ensin más, caleyamos pel antiguu camín que sigui hacia Cordiñanes, faciendo un tramín más menos ensin moyanos, esfrutando un pocu de volver a patiar y de l'alderique davezu, con planes y más planes montunos a facer.
Averámonos a Cordiñanes pente una intensa lluvia
Pa cuando'l camín desemboca na carretera, entama a llover ensin xacíu, abellugándonos baxo un techín. Parará y siguiremos carretera alantre, saliéndonos de nuevu nel monte la Corona al camín, bien guapu por ciertu, hasta qu'otra vegada ponse a xarazar.
Intentamos ensin premiu tapecenos y ya totalmente empapaos, decidimos siguir alantre hacia Cordiñanes. Sabemos d'un accesu per Cubiellos a Asotín ensin pasar per Cordiñanes, pero'l cuerpu pídenos tomar otru cafetín y mudanos de ropa.
Magar d'un descansín en Cordiñanes averámonos hasta Asotín
Cola calma, tomaremos un café, bollería fina y una muda de camiseta que sienta estupéndamente y salimos hacia la sienda la Rienda. Nun llueve, nun fai fríu y ye bien pasáu'l mediudía, poro venímonos arriba y esfrutamos del caleyar ensin priesa y de cada pasín de la Rienda hacia la mayada d'Asotín.
Vamos encantaos, tampoco ye que forzáramos la máquina muncho'l día anterior, pero'l caleyar so la lluvia, fai que se resientan los músculos y agora van caleciendo, entrándo-y con munches ganes a la xubida hacia'l colláu Solano (1617 m).
Ascendemos hasta'l Colláu Solano (1617 m)
L'orbayu finu, entemécese col borrín, pero dempués de les esbastiaes de la mañana nun ye nin pa ponese'l goretex. Arribamos al colláu Solano, miramos la hora y paez que nos apetez facer dalguna cume, poro decidimos ascender a la pica Asotín y a la torre del Colláu Solano.
Dexamos les mochiles, garramos gps y móvil que pierde semeyes, jeje y ascenderemos con munchu procuru primeru a la Torre del Colláu Solano (1671 m) y dempués crestiaremos hasta la pica Asotín (1673 m).
Facemos travesía hacia l'Argayu Congostu
Nun son ascensiones difíciles en seco, pero'l tarrén ta pingando y los tramos amestaos de yerba y roca dalgo podre, fai que vayamos seliquino y poniendo güeyu a cada presa y pie. Contentos polos cumales y les vistes de película d'Avatar, destrepamos dende'l colláu pente ambos cumales y picaremos dalguna barrina sentaos sobre les mochiles.
Darréu, tenemos tola travesía del Congostu per delantre y tengo que dicir, qu'entiendo perfectamente que munchísima xente xuba hasta'l refuxu per esti percorríu, ya que daveres paezme mui esfrutón y bastante espectacular pa munchos senderistes y montañeros.
Trepamos tolos pasinos prestosos hacia'l Colláu H.ermosu
Llueu de la traviesa, meterémonos nel argayu dafechu y diremos trepando de rises, demientres camentamos qué nos va deparar el día siguiente. Nel camín, fuimos alcontrando montañeros que viendo que meyoraba'l día, aprovechaben p'abandonar el refuxu, pero tamién comentábenmos que muncha xente quedara a la espera de qu'al día siguiente pudieran facer actividá.
Entre trepe y trepe, vamos teniendo ya ganes d'aportar y echar una cervecina tranquila. Pali, pali, vamos viendo la silueta del refuxu, quiciás el refuxu más de moda de Picos, pol accesu y pola amabilidá y bon rollu que gasten los refuxeros.
En resume, un clásicu qu'antes o dempués tenía de conocer y que túvonos entreteníos durante casi 8 hores de camín, nel que percorrimos 14,5 km y ascendiendo un total de 1760m de desnivel acumuláu positivu.
Camudando'l Camín siempre alantre
No hay comentarios:
Publicar un comentario