26 de Xunetu de 2026
Track: La Vid (Gordón) - Bregón - San Roque - Rasón - Cuetu San Mateo - Fayabaxo - Santa Lucia - Ciñera
Dempués de la Travesera Picos 2025 - 2026 tornábemos a facer dalgo d'actividá, pa caltener la bona forma algamada y viendo que teníemos la meteo pelín repunante p'Asturies, averámonos hasta Llión col envís de conocer otru d'esos Montes Cimeros del Cordal Cantábricu de menos de 2000 metros, como ye'l Cuetu San Mateo.
Pa ello, nun tuvimos muncho que viaxar, averándonos a la comarca de Gordón, bien afayaiza dende'l Puertu Payares y llueu del almuerzu clásicu n'Ezequiel, continuamos hasta'l pueblu de la Vid, onde teníemos el nuesu puntu de partida, llueu de crear un percorríu xuniendo dalgún tramu d'un trail y una clásica ascensión al Cuetu San Mateo.
La idega yera allargar un pelín la ruta y meté-y kilómetros, poro decidimos salir del pueblu hacia la otra vera del rigu Bernesga, cruciándolo na Vid per una ponte y siguiendo pembaxo la carretera estatal pa metenos na faldera del Faedo, amplia llomba que va faciéndonos xubir un pocu per onde meyor veamos, hacia la crestería de la Peña Blanca.
Aportamos a la crestería alcontrándonos con un tramín calizu bien guapu nel que ganamos vistes hacia'l Cuetu San Mateo y los pueblos de Ciñera y Santa Lucia al Sur, continuando'l nuesu andar hacia'l cumal de la Peña Blanca, que nun facemos y garramos descensu aína hacia la collada de Buiza, pueblu que conocemos de les nueses escalades per Beberino.
Aportamos a la collada de Buiza y entamamos ascensu cenciellu de primeres hacia'l picu del Bregón, que fainos restolar un pelín cual ye'l so puntu más altu, alcontrándolo nel peñón occidental de 1555 m, teniendo un pequeñu canalizu d'accesu bien curiosu, sacándonos la semeya de rigor notando ya qu'a les 11 la mañana, el sol calez l'ambiente enforma.
Darréu, nun esperamos más y entainamos la baxada, amosando'l picu el por qué de su nome, Bregón, ya que tocónos bregarun pocu, pa descender hacia'l Sur, terraceando per peñes cuarcítiques y trepando penriba d'escobes p'algamar la collada occidental onde ya atopamos senderu y camín cómodos, que va dir llevándonos hacia'l barriu de San Roque nel pueblu de Santa Lucia.
Travesaremos esti barriu y vamos averanos hacia'l area recreativa de la Faya, llueu d'una baxadina bien guapa al llau del cementeriu con un murazo pegáu al rigu Bernesga, continuando dende l'area per pista hacia una foz pente les peñes del Canto'l Viso y la Peña la Boiga, garrando camín a la mandrecha, pegaos al Viso, per una fastera conocida como las Focechas, onde'l senderu marcáu de PR, va llevanos per una guapa viesca d'encinas hacia'l collao del Fresno.
Nel intre pasaremos del senderín a un cómodu camín que va llevanos hacia'l "Planeta Calleja", conxuntu de pistes para BTT, qu'aina podemos comprobar que furrula, cruciándonos con dellos bikers y pudiendo comprobar que tanto les pistes como dalgunes trialeres tan perbien acondicionaes y marcaes en munchos cruces con tolos posibles percorríos.
Nós, usamos una de les trialeres a mou d'atayu que va sacanos a la faldera del Cuetu San Mateo, onde entamamos una guapísima ascensión hacia unos cuetos en primer términu, metiéndonos al pocu nuna increyible vallina pente les muries del Cuetu, siendo una ascensión dafechu sorprendente, que nun conocía y que personalmente encantóme y paezme un monte de referencia polo guapu d'esti cordal Cantábricu.
Saldremos d'esta increyible vallina y fadremos la parte final del monte ya muncho más seliquina que la vallina, hasta encumar al pie de les 2 de la tarde los 1605 m d'esti monte, que como digo, paecióme bien guapo, cosa que nun esperaba siendo sinceros y pelín pindia l'ascensión, tamién seya dicha la verdá, costando un pelín xubila a ritmu rápidu.
Como suel pasar, tenemos el cumal tomáu de mosquines, poro decidimos baxar un pelín a xintar daqué y bien ceo, tornamos al patéu descendiendo per senderu marcáu hacia la cabecera de la riega de Fayabaxo, pasando per llugares bien guapos, con un amiestu de tramu d'encinares, pa pasar dempués a una baxada pel monte Carbayal, terminando nuna riega con cuerdes afitaes, que déxenmos na parte baxa y esplanada de la mina de les mines gordoniegues.
Equí podríemos ya baxar tranquilamente per pista hacia Santa Lucia, baxando pela foz pente la Peña'l Castro y la del Valle, pero nós, aparte d'echar una güeyadina a la escuela d'escalada de Santa Lucia, tiemos la oportunidá, divertía oportunidá, de travesar la Peña'l Valle, per un antiguu túnel mineru, que sácanos xusto al otru llau de la peña, saliendo con vistes a les piscines del pueblu, recordándonos la calufa que tábemos pasando.
Descenderemos de la peña hacia la pista que sube a les mines y decidimos descartar el restu la ruta, que tendría de llevanos al faedo de Ciñera, qu'entá nun conocemos, ya que'l calor ta siendo insoportable, poro baxamos al pueblu y garramos ya camín tranquilu, travesando Santa Lucia, pa salir per camín colgáu, baxo'l picu'l Cuchillar, hasta'l pueblu de Ciñera.
En Ciñera tan sólo, quédanos siguir camín al traviés de les cases hasta aportar de vuelta a La Vid, piesllando una circular de 17,2 km, na que superamos un desnivel acumuláu positivu de 1140 m, durante un percorríu que llevónos un total de 6 hores y 40 minutos.
No hay comentarios:
Publicar un comentario