Piedrafita (Los Argüeyos) - Cuetu Millaró - Guazones - Campastiñosas - Puertu Piedrafita

 15 d'Agostu de 2026 

Track: Piedrafita (Los Argüeyos) - Cuetu Millaró - Guazones - Campastiñosas - Puertu Piedrafita

Continuamos de monte col grupu n'Agostu, dempués d'unos díes de descansu y muncha bicicleta per Soria, nos que repetimos varies rutes pero sobretoo metimos volumen de kms nes pates, aprovechando pa conocer dalgunes zones del Celtigravel de Soria, tornamos a poner les pates en mou patéu, yéndonos hasta Los Argüeyos en Llión.

Partimos del pueblu de Piedrafita (1302 m)

Tirando un pocu de repertoriu de rutes sueltes que preparo y nun acaben por salir, vamos averános hasta Cármenes, pa conocer un pocu tol valle de Piedrafita y percorrer la xerra de Riañu, a la que pertenez el perconocíu Cuetu Millaró, que ya ficiéramos tanto en branu como n'ivernal, nun d'esos intentos que ficiera por deprender l'esquí de travesía.

Ascendemos pela riega de Riosol pa salir pela Mayá'l Puertu

Aportaremos entós, al pueblu de Piedrafita, dexando'l coche nun aparcaderu al pie la carretera y baxamos un pelín pa cruciar les cais del pueblu, saliendo per una pista a la vera la riega Riosol, que fadrá percómodu l'avance hasta la Mayá'l Puertu, onde alcontramos restos de dalgún cabaña y ya vemos l'entepechu a superar cola vista puesta nun arcu na faldera del picu La Foya.

Salimos hacia l'altu del Sesteo pasando pembaxo l'arcu baxo'l picu la Foya

Tiraremos p'arriba con xeitu, con un día nel que la brisa amataga la sensación de calor y fainos xubir ensin mayores problemes esfrutando del nuesu pasu pel arcu, pa continuar hasta la cumera del cordal, pel qu'enllazaremos les ascensiones al altu del Sesteo de 2046 m y continuaremos ensin mayores problemes hasta los 2185 m del Cuetu Millaró, llueu d'una ascensión de 2 hores y media dende que saliéramos de Piedrafita.

Ascendemos al míticu Cuetu Millaró (2185 m)

Piocamos unos frutos secos y continuamos camín, pudiendo acolumbrar como un mar de ñubes va tomando posiciones dende'l norte, así que decidimos apurar pasu, baxando del Cuetu Millaró hacia'l Norte, col envís de continuar tachando cumales, pasando en primer llugar pela collada Cuayaura, p'ascender el picu La Carba (2161 m) y siguir cordal de Riañu alantre, pasando pol Recuéncanos (2160 m) cola vista puesta na Peña Guazones.

Continuamos avanzando pela xerra de Riañu pasando pel picu la Carba

Tenemos enfrente la peña más vistosa d'esta parte del cordal, baxando dende Recuéncanos hacia la collada Lambeta, pa facer un rápidu y pindu ascensu, per tarrén más calizu a la Peña Guazones, la que sorpréndenos polo guapa que ye, con una cayida ablucante pal valle de Tablao, teniendo embaxo nuesa la peña Riañu, que malpenes llevanta d'un hombru de la Guazones, poro descartamos la so ascensión, anque nun se-y viera dengún problema.

Siguimos hasta la guapa Peña Guazones algamando vistes al valle de Tablao

Facemos semeya na Peña Guazones (2114 m) y echamos una güeyada pa restolar una baxada, saliendo hacia l'occidente per una evidente canal, averándonos a un espolón a ver si garramos un canalizu final a la mandrecha o baxábemos más per una vallina a la manzorga, deciendo esta última al ser menos pindia, faciendonos descender dalgo más de 200 metros enantes de fader una guapa travesía per llambries hacia l'Altu'l Corralón.

Descendemos per tarrén pindiu hacia l'Alto'l Corralón 

Dende l'Altu'l Corralón, entamamos a ver como van formándose ñubes d'evolución, teniendo claro que la previsión de tormentes tien tola pinta de cumplise, sicasí, quédenmos un par de cumales y tamos enfotaos en terminar la ruta, asina que descartamos baxar pel valle'l Corralón y entamamos l'ascensión hacia'l picu Campastiñosas, que faésenos daveres bien llarga y ye que los 200 m de desnivel, ya pesan les pates a estos altores de la película.

Caberu y llargu ascensu hacia'l Picu Campastiñosa con vistes a un mar de ñubes nortiegu

Non sin esfuerzu a portamos a los 2103 m del picu Campastiñosas y decidimos continuar pela col.lá Val.lina y Media hasta cercanu picu Vallequín que ya encumara nuna ruta a L'Estorbín va dellos años, parándonos nos sos 2080 m a esfrutar d'un de los mares de ñubes más increyibles, moviéndose tola blancura como si d'espluma la mar fuera, xugando cola llende asturllionesa según la marea movíase.

Averámonos hasta'l picu Vallequín onde xintamos pa continuar descensu pel valle Torío

Descenderemos al colláu Vallequín, a xintar dalgo curioso y en menos d'un cuartu d'hora, decidimos descender metíendonos pente la borrina col envís de conocer el ñacederu del ríu Torío y tol valle pel que deberíamos d'esfrutar de dellos tabayones, que cola seca que gastamos esti añu, nun tenemos el placer de conocer, anque sí tenemos que dicir que'l valle ye bien guapu y esfrutamos de cada pasu de descensu pelos senderos.

Píllanos la tormenta y esfrutamos d'un paseín pel valle Toríu hacia'l Puertu Piedrafita

Pa cuando aportamos a la parte baxa del valle, onde empatamos cola pista que vien dende la col.la Bustempruno, la truena ya fonda ya y entamen los primeros goterones, teniendo que tapecenos col chubasqueru, pa continuar pocu dempúes per lo que tendría de ser la carretera del puertu de Piedrafita, que nun conocía y nun sabía que nun se llegara nin tan siquiera a asfaltar.

Descendemos pela pista del Puertu Piedrafita hasta'l pueblu homónimu

Con pocu más que siguir cómodamente'l l'antigua carretera del puertu, ya que como digo, caltiense de tierra, vamos facer un pocu más de 4 km, pasando pela Casa'l Puertu y habiendo de tener cuidáu nel mayéu de Bucipeñes, onde allúgase una esplotación ganadera ovina con dellos mastinos, bastante gafos por ciertu, asina que munchu curiáu con intentar atayar les envueltes nesta fastera.

Polo demás, cola truena y los rellámpagos de fondu, aportaremos al pueblu de Piedrafita, zarrando una circular de 17,4 km bien caminables, superando un desnivel acumuláu de +/- 1185 m nun total de pocu más de 7 hores de camín.

Que vos preste!!