Braña la Senra (Tameza) - La Cadavina - Puertu Banduxu - Braña La Cueva - Nial La Utre

23 d'Agostu de 2026 

Track: Braña la Senra (Tameza) - La Cadavina - Puertu Banduxu - Braña La Cueva - Nial del Utre

Una nueva ruta más del GM Xuan de la Borrina, na que personalmente nun tenía munches idegues pa facer dalgo nuevo. Por suerte, Carlos, tamién ye fiel seguidor de dellos blogues de monte y apúntase cosines dacuando, proponiendo facer esta ruta que viera nel blog del collaciu Javi Cienfuegos, nel conceyu de Tameza, onde facía años que nun tornaba de monte.

Partimos dende la braña de Senra en Tameza (910 m)

La mala suerte fue que Carlos al final nun pudo venir y ya nun mos daba tiempu a camudar de ruta, asina que siguimos alantre cola propuesta, el restu del grupu, parando a almorzar en Grau y continuando llargu camín hasta Yernes en Tameza, teniendo que siguir pista alantre la braña La Senra, asfaltada reciéntemente por mor del ciclismu, hasta'l mesmu colláu de Fancuaya, baxo la faldera del míticu monte L'Oral.

Caleyamos pente los praos hacia'l colláu la Cadavina baxo la faldera de L'Oral

Saldremos entós dende la Senra, caleyando per pista tranquilamente, hasta'l desvíu al colláu Fancuaya, el cuál dexamos a la manzorga, pa siguir per otra pista más baxa metiéndonos na faldera de L'Oral, atopando en primer términu dellos praos bien cuidaos pa metenos en tarrén de felechos hacia'l colláu de la Cadavina, onde alcontramos el Corru la Señora, desviándonos al par suyu hacia los Forcaos Viechos, dexando'l desvíu a Cuallagar a la nuesa mandrecha.

Bordiamos los Forcaos Viechos hacia'l Puertu Banduxu

Continuaremos pelos Forcaos Viechos, siempre per senderu bien visible, col envís d'averanos al Puertu Banduxu, siendo tol percorríu, bien guapu, per llugares ganaderos pero a la mesma vegada, xabaces, ya qu'alcontramos una manada xabalinos de tolos tamaños, corriendo pelos praos, pente les vaques en sintonía relaxada y tenemos la suerte de ver dalgún venáu nesti tránsitu hasta'l puertu.

Conocemos les llagunes de Barrera que paeznos un llugar bien guapu

Nel Puertu Banduxu, atopamos la pista que vien dende'l pueblu homónimu y la siguiremos conociendo tol valle de les llagunes de la Barrera, mayáu preciosu ganaeru con munches vaques, pente les que pasamos con tola tranquilidá, echando una güeyada a les llagunes demientres damos-y vuelta a los picos de la Piedrada y Barrera, ascendiendo hacia'l colláu que denos accesu a Valdelabedul.

Pasamos per Treslacuendia empobinándonos hacia'l Regueirón

Descenderemos esti guapu valle, hasta un antiguu mayáu d'Ortocéu, onde podremos escoyer a bordiar el picu Traslacuendia per ambos llaos, anque decidimos siguir pela mandrecha, pasando peles cabañes de Faguyán, pa siguir descenciendo hacia'l Regueirón, el cual travesaremos pela parte alta, p'alcontrar sienda pembaxo la Muria d'Abaxu, que marcada con dellos topos mariellos, va llevanos a ún de los puntos más guapos de tola ruta, como ye la Braña La Cueva o Cuveiriza, apunte tomáu per Victor Delgado.

Conocemos la increyible braña La Cueva... un llugar máxicu

Esta cueva dexónos plasmaos, ya que dientro allúgase una cabaña en bastante bon estáu, sacante la techumbre, lo que diz munchu de la calidá d'esti aviru pastoril. Tuvimos un ratín, echando unes semeyes y ceo, decidimos continuar, saliéndonos a la mandrecha la cuevona, col envís d'entamar l'averamientu hacia'l Nial del Utre, que siguiendo los pasos del compañeru Cienfuegos, nun lo vamos facer pela faza Oriental que llevaríenos ensin problemes al cumal, sinon, que perpasaremos hacia la faza oriental, col envís d'aportar de manera más xabaz.

Entramos en tarrén xabaz n'ascensión hacia'l Nial del Utre o picu Taraniellu

Pa ello, como dixi xubiremos penriba la Cuveiriza pela mandrecha y tomando de referencia otra pequeña cuevina, saldrémonos a la faza Occidental del monte, per una forcadina, teniendo la visión d'una guapa aguya enfrente nuesu. Al pocu d'esti pasu, tendremos el tramu más espuestu hacia'l Regueirón, teniendo un destrepe un pelin delicáu, pa dempués ya metenos per travieses yerboses que van dir llevándonos hacia una pindia canal de yerba, que tien de dexanos baxo unes ablaneres onde alcuéntrase escondía la Cuedrada.

Conocemos el proyeutu d'escuela d'escalada de Cueva Hedrada pa salir per tarrén pindi hacia'l Taraniellu

Otru llugar increyible, tamién d'usu ganaeru pesie a nun contar con una cueva como tal, pero'l desplome del aviru en cuestión ya tan bestial, qu'alcuéntrome con delles víes de deportiva equipaes, que más tarde entérome que pudieran llegar al novenu grau. Otra ayalga más qu'alcontramos nesti pequeñu conceyu de Tameza, que ye una auténtica maraviya pal montañismu, pol monte nel qu'andar, pola etnografía rural y por tar a la mesma vegada tan cerca y tan lloñe de la civilización.

Ascendemos a los 980 del picu Taraniellu o Nial del Utre

Saldremos de la Cuedrada, non sin alloriar una vegada más de les víes equipaes nesi desplome y garraremos pegaos a los parés, pente la viesca, un senderu que va llevanos a una pindia canal, con dalgo de senderu marcáu, que va sacanos a un canalizu final, pel que treparemos encaxonaos pa salir a la parte cimera del Nial La Utre de 980 m, qu'encumaremos y per primer vegada na nuesa vida, veremos los coches y la braña de Senra dende au saliéramos.

D'esti xeitu, col coche a tiru piedra, baxaremos un pelín del cumal y xintaremos cola calma, pa dempués facer los malpenes 15 minutinos que tienen que dexanos pente mayaos de nuevu na braña La Senra, onde atopamos delles cabañes con bien d'ambiente de merienda de los paisanos del pueblu. Nós, damos por terminada la ruta de 10,25 km de percorríu, superando un desnivel de +/-655 m nun total de 5 hores y diez minutinos de disfrute montuno.

Camudando'l Camín per Tameza