15 de Setiembre de 2025
Track: Las Vegas de Sotres (Cabrales) - Puertos d'Áliva - Colláu Cámara - H.oracón de la Miel
Últimu día asitiaos per Sotres y llueu de los pateos pelos Urrieles colos Campanarios y per Andra con H.idiellu, alborecemos con un día pelín ñublu, cola borrina xugando y con una previsión de lluvia pa la tarde, lo que créanos munches duldes de cara a facer dalguna actividá y aprovechar un pocu la mañana.
El día anterior, teníalo clarísimo, cola idega de conocer les canales de la fastera de Fresnidiellu y baxar pel Fresnedal o dalgo asina, pero pa cuando queremos arrancar, recoyendo un pocu los trastos na furgo, ya tenemos la borrina metida nes peñes.
Otra idega, ye dar un pateín a la Cabeza Sonllanu que pel momentu taba despeyáu, pero dame un pelín de pereza ya que fícela nun va muncho, asina que decidimos dir hasta Fresnidiellu en furgo y ver nel sitiu, como preséntase'l tema. Cola mesma, aparcamos y miramos les canales, cola borrina ya a mediu altor, quitándones les ganes de navegar per vallines herboses nestes condiciones.
Asina que decidimos dar un patéu hacia'l Puertu Áliva, al menos por estirar un pocu les pates y porque vemos que pal sur tenemos el cielu más claru y si toca moyase que seya tornando per pista y non engolaos en canales herboses.
Poro, continuamos hasta las Vegas de Sotres, onde pondremos puntu d'entamu, garrando cuatro frutos secos y salimos caleyando pela pista, ensin ver gran cosa, la canal del H.erru casi al completu pal oriental y pal central nin tan siquiera media Moñetas, lo que diznos que pinta la cosa regular pa facer dalgo curiosu.
Aportamos al Puertu Áliva pente'l borrin y pali pali, va abriendo y dexanos al menos echar una güeyada a que montes podríemos ascender. Pensámoslu un ratín y vemos que pa los Picos de Cámara, ta metida la ñube, pero pa les Cumes Abenas, tan más escampláu, asina qu'entamamos ascensu hacia'l colláu Cámara col envís de garrar un camín en diagonal hacia'l picu'l H.oracón de la Miel, puntu cimeru d'Abenas.
Pelín enantes de Cámara (1700 m) garramos senderos de robezos en paralelu hasta enllazar con un senderu ampliu n'ascensu que va dir llevándonos hacia la parte alta d'Abenas, faciéndose pindiu l'ascensu pero cenciellu hasta dar a l'arista, onde ya gastamos les últimes enerxíes pa encumar los 1917 m del picu'l H.oracón de la Miel.
Teníemos la ilusión de ver los pueblos llebaniegos a lo baxo, pero la borrina ta pegada al cordal y tan sólo tenemos dalgo de vista hacia la Peña Vieya, poro sacamos la semeya de rigor y ponémonos a baxar pela enorme panda, alloriando cola baxada, camentando que si cargase sería una maraviya pa esquiar, cola inclinación perfeuta.
Aportamos a Campumenor, onde tenemos un casetón ganaeru y restu de dalguna mina y siguimos ya hacia la capiya de la Santuca, pa coneutar hacia la pista que baxa del Hotel d'Áliva, intentando llibrar en tola baxada per senderos pa nun pisar nes piedrines de la pista, ya que llevamos les plantes de los pies a fueu de los dos díes anteriores.
En 4 hores y media de patéu, aportamos de nuevu a las Vegas, dempués de caleyar unos 14 km con un desnivel acumuláu de +/- 855 m que ficieron al menos, que nos ganásemos el vermú y un menú asturianu, nel chigre Las Vegas en Sotres, siendo este la única allegría que llevámonos nestos díes, pol tratu y por llibranos de quedar (a les 9 y media) ensin cenar, llueu del rutón a los Campanarios.
No hay comentarios:
Publicar un comentario