Sotres (Cabrales) - H.idiellu - Traviesas - Grah.al - H.unciana - Andra - Fuentesoles

14 de Setiembre de 2025

Track: Sotres (Cabrales) - H.idiellu - Traviesas - Grah.al - H.unciana - Andra - Fuentesoles

Dempués de la xatada del día anterior cola ruta a Los Campanarios, el grupu diba mermase sensiblemente pasando de díez a seis, los animosos montañeros que díbemos atacar la clásica canal de H.idiellu, que nun conocíen entá. Poro, llueu del almuerzu mañaneru, más relaxáu que'l día anterior, vamos salir caleyando peles cais de Sotres a les 9 la mañana.

 

Partimos de Sotres (1030 m) con un día preciosu

Baxaremos pela carretera, hasta la Curvona, onde'l parque de Picos tien un control de los coches qu'acceden y continuamos caleciendo les patuques pela pista en direición a las Vegas. El día preséntase preciosu y podemos esfrutar de tola contorna de canales y peñes, destacando como non, la visión de les peñes de Fresnidiellu, quedándome con ganes de patiar les canales que les envuelven. 

 

Pateín clásicu pela pista dende Sotres hasta la entrada de la canal de H.idiellu

Aportamos a la entrada de la canal de H.idiellu y entamamos l'ascensu pali pali, dexando que les pates vayan garrando ritmu ensin forzar la máquina res, ya que'l día anterior nótase enforma nos músculos, sicasí, tenemos la suerte de xubir a la solombra y anque nun queramos, vamos bastante fuertes xubiendo, sobretou porque la primer parte de la canal tien un senderu bien marcáu que facilita muncho nun pensar per onde dir.

 

Esfrutamos munchísimo del ascensu de la canal de H.idiellu con vistes a la parte baxa de los Urrieles

Nesti tramu, atopamos un par corredores entrenando y un grupín que vemos como desvíense a la mandrecha, sospechósamente, pero suponemos que saben lo que faen, asi que tampoco decimos na. Más tarde, vémoslos dar la vuelta y volver al senderu correutu de la canal. Nós siguimos a lo nueso y vamos aportando a la parte alta de la canal, onde atópense dalguna traviesa, d'eses que siempre pica conocer y saber d'onde víen, porque pa onde va téngolo claro, ya que va años, desviáreme hacia Las Malatas saliendo dempués hasta los campos de Valdemingueru.

 

Navegamos pela parte alta de H.idiellu onde los senderos dixébrense y faese caóticu l'ascensu hasta la chimenea final

Esta vegada, nun vamos facer denguna modificación al plan d'entamu, ya que queremos conocer la canal de H.idiellu completa, poro toca sali pel canalizu final, Pa ello, navegaremos un pocu na parte más alta onde difumínense los senderos y toca siguir más bien h.itos nun tarrén más roto y embocamos hacia'l canalizu, onde xubo'l primeru pa ver como ta la instalación de la cuerda.

 

Facemos el pasín y tramu final de H.idiellu pa salir al colláu Valdemingueru (2145 m)

Sorpréndeme un pelín, ver la cuerda afitada a un antiguu clavu, tando xustu enriba un paraból, que cláramente usen pa instalar cuerdes cuando la Travesera, pero que llueu desmonten. El casu ye que fuimos pasando ún a ún, intentando nun tirar muncho de la cuerda, ya que nun se vé estremádamente fiable y con un pocu más de trepe, salimos a una vira onde ya encaramos l'últimu tramín hasta'l colláu Valdemingueru (2145 m).

Terminamos d'esti mou, los 1100 m de desnivel d'esta perguapa canal de H.idiellu, que sincéramente prestóme conocer na so totalidá munchísimo y nun digamos a Pepa, que la tenía na tiesta dende cuantayá. Tocará descansar un ratín, tumbaos nel prau y picando dalgo con vistes a tol pozu d'Andra, mientres el mió maxín acolumbra una llínea qu'apetezme siguir hacia la parte alta del Grah.al.

 

Dexo al grupu p'aventurame pela Traviesa inferior del Grah.al

Toca dividir al grupu, ya que la xente ta cansadina del día anterior y paez-yos que cola canal de H.idiellu tuvieron abondo, asi que guiyaos por Pepa, van facer travesía pel macizu hasta'l Casetón d'Andra onde van esperame, Llueu de xintar, salgo un pelín antes qu'ellos y corriendo avérome hasta l'entamu de la Traviesa Inferior del Grah.al, teniendo referencies del collaciu Pucavi gran conocedor d'esti macizu Oriental.

Entaino pa garrar la traviesa calteniéndome en contactu por walkie colos compañeros, pa que m'avisen si tengo dalgún grupu pembaxo la traviesa, ya que xustu les lleres caen sol camín que va pal Redondal, poro tócame dir sollertes de nun aventar denguna piedra, faciéndolo ensin problemes cruciándome con varios grupos de robezos que paecen tar un pelín sorprendíos de ver a dalguien pelos sos dominios.

 

Salgo a los altos del Grah.al y asciendo al so puntu más altu nuna amplia Rasa (2284 m)

Disfruto munchísimo de la Traviesa Inferior, saliendo ya per tarrén amestáu de peñes calices y lleres, hasta la parte alta del Grah.al, teniendo que descender dellos metros enantes d'afrontar la cabera y cansina xubida hasta los 2284 m del puntu más altu del Grah.al, na nomada como Rasa de la Inagotable, anque nun seya'l nome correutu, siendo namás El Grah.al toa esta fastera, como bien diz Victor nes sos conferencies y blogue.

 

Perguapu pasu dende'l Grah.al y la H.unciana (2268 m)

Dende'l Grah.al, desciendo un pelín sobre mis pasos y baxo hacia la boquera de la canal d'Arredondas, que entá nun conozo, a la gueta d'un pasín perguapu hacia la H.unciana. Ta perbien señalizáu, poro ensin problemes salgo pembaxo'l cumal del Grah.al y salgo per una h.orcadina hacia un par d'aguyes que trepo y destrepo, anque sedría meyor perder un pocu d'altor y atacar la H.unciana dende más baxo, pero bono, como voi solo pues dame por facer dalgún pasín espuestu y ataco finalmente la cume de la H.unciana (2268 m).

 

Baxando de la H.unciana pel Hoyu Oscuru hacia la Providencia

Contentu pel entrenu fechu y por tachar dos cumales qu'entá nun tenía nel bolsiellu, desciendo hacia l'altu del Hoyu Oscuru y alcuéntrome con un canalina que tampoco conozo, así que tírome abaxo corriendo pasándolo podre nel descensu hasta l'Hoyu Oscuru onde empobínome hacia la mina la Providencia, aportando a esta y decidiendo tirar a la mandrecha per senderos que travieses Las Vegas d'Andra, hasta dar al colláu Tresmancondiu en primer llugar y dempués al de la Aldea, onde faigo ya la baxada final al Casetón.

 

Baxando hacia'l Casetón d'Andra y descendiendo hacia Fuentesoles

Nel Casetón, xintaré'l bocata que llevaba con una cervecina y decidimos baxar hacia Sotres, ya que tenemos munches ganes de pasar una tarde tranquilina nel pueblu, ensin les prises del día anterior. El descensu, como non, sedrá pela pista hacia'l H.ou del Texu, pero desviámonos hacia Fuentesoles, pa baxar ya con vistes a Sotres, pela mayada'l Mediu y la del Robro, garrando ya pista formigonada hasta la parte sur de Sotres.

 

Tramu final hasta Sotres dende Fuentesoles

Aportaremos a Sotres con una sudada potente, ya que pegaba bien la solana, magar de 8 hores de ruta pel macizu Oriental, faciendo un total de 18 km y superando un desnivel acumuláu de +/- 1605 m, quedándome un tastu bien prestosu a ruta potente. 

A la fin, pudimos tar per Sotres cola calma, ya que llegamos a les 5 la tarde y pudimos tar de terracéu al sol, colos pies al aire en chancles, despidiéndonos ya del grupu pocu a pocu, ya que pal siguiente día namás que quedábemos Mario y yo, que llueu de pegar una cara pero agradable ducha nel albergue, casi quedámonos ensin cenar, una vegada más y eso que teníemos reservada la cena... en fin, Sotres 2.0. 

 

Camudando'l Camín pel macizu d'Andra