28 de Setiembre de 2025
Track: Mildón (Valle Altu Peñamellera) - Foz de Mildón - Riega Collantes - Senda Collantes - Oceño
Magar de día anterior tornando a les Carreres pel Monte, nel trail de la Pica Torbina, xuntámonos dellos collacios del GM Xuan de la Borrina, pa entamar la temporada 2025 - 2026, con una salida moderada en tiempu y llargura dle percorríu, pero perguapa en belleza y xabacismu montuno, como ye vezu nel nuesu grupu monte.
Pa ello, aprovechando que taba nel día anterior n'Arenas allugáu, quedaremos a una hora prudente p'almorzar y salir hacia'l Valle Altu de Peñamellera, desviándonos a l'altor de Mildón hacia'l pueblu d'Oceño, llugar onde aparte de la escalada, tamién tuviemos varies vegaes de monte.
A dicir verdá, la ruta que vamos facer, ye un amiestu de dos rutes que ficiéremos va tiempu na redolada d'Oceño, conociendo per primer vegada la foz de Mildón teniendo que pegar una vueltona grandísima, por nun atopar manera d'enllazar con Tah.adura y de la sienda Collantes que disfrutáremos nuna travesía preciosa dende Trescares.
Esta vegada vamos empatar la foz de Mildón cola sienda Collantes, pasando pela riega Collantes, de la que nun tenemos denguna referencia, asina que como ya dixi, un pocu d'aventura yera asegurada, sumándose al tarrén conocíu, que nun ye precísamente un percorríu domingueru, nin muncho menos.
Aparcaremos na entrada a les primeres cabañes de Mildón y saldremos cuesta arriba per pista, hasta embocar camín hacia'l valle de la riega Tah.adura, onde asítiase la conocida foz de Mildón. Dalgunos de nós, ya lo conocemos, asina que callamos y que los collacios esfruten del espectáculu, ya que como recordaba, el camín colgáu sola riega ye una maraviya y según vamos averándonos a la riega, los distintos requexos pelos que pasamos son ablucantes.
Les semeyes son constantes y el trazáu a la vera la riega ye pura diversión, llibrando dalgún pasu resbariosu, pero sin mayores problemes vamos avanzando pela foz, teniendo qu'andar sollerte de nun apilancar colos escayos, que crucie dacuando de llau a llau del senderu. La verdá ye que col pasu los años, recordábala asemeyada, asína qu'espero que siga calteniéndose esta foz pal esfrute de los montañeros avezaos a lo más xabaz d'Asturies, pero dependerá de la actividá ganaera y paezme que poca habrá per estos llares colos años.
Finaremos el tramu más andáu de la foz de Mildón col clásicu destrepe con escalare y travesaremos la riega pela ponte que xube a la cabaña de la Rondina de Bos, sicasí nesta ocasión namás que lo cruciaremos pa continuar pegaos a la riega Collantes, alcontrando pasos y dalgo de sienda, cruciando en delles ocasiones la riega pa garrar tramos transitables, según embarrancase nuna vera u la otra.
Alcontrámonos con tramos de gran belleza tamién na riega Collantes, llugar xabaz onde los haya, transitando na mayor parte pela fastera derecha, hasta la mecederua de les riegues de Collantes y el Nario, qu'entranos pela mandrecha, decidiendo cruciar Collantes, a la vera esquierda y saliendo per tarrén pindiu, hacia la parte alta de la riega, dempués d'un tramu transitable, alcontrarémonos con praos dafechu tomaos de felechos y cotoyes.
Quiciábes podríemos continuar hasta la mayada Collantes, que ya conocíemos de la baxada dende Carraspión, pero como andábemos con pelín de priesa y vimos un pocu abegosu continuar pel rigu, salimos a la parte alta y tocó bregar como poques vegaes, turnándonos p'abrir pasu, pel senderu que vemos baxo los nuesos pies, pero que la broza fai casi imposible de transitar.
1 hora de llucha continua pa superar 170 m de desnivel, nos pone ya na sienda Collantes, que nel intre ta pelín tomada, pero según vamos caleyando hacia Oceño, veremos como pasín a pasu, ta más pisada y podemos dir escaeciendo la hora de pinzaos y rabuñades, asina como podemos garrar un pasu más allegre hacia la parte más guapa de la sienda Collantes.
El día acompaña y les rises vuelven, anque les pates siguen bramando, aportando al Cuetu la H.oradá, onde alcontramos un guapu sedu y la semeya clásica cola H.oradá, pa baxar dempués pel senderu colgáu y acolumbrar el restu de la sienda, enllena de pasinos bien guapos, con dalgunos tramos armaos y otros escavaos na peña.
La verdá ye qu'esta sienda ye un auténticu exemplu de trazáu ganaeru, entreteníu, con vistes y pasos perguapos ensin dificultá, pero con ambiente sola riega Tah.adura, poro debemos dir atentos a cada pasu, pa nun tener sustos. Pa cuando dámonos cuenta, tamos ya xubiendo la cuesta final hacia la collada Tresllué, onde entamaremos un guapu descensu hacia'l pueblu d'Oceño.
La nuesa idega yera xintar en Casa Alfonso, pero tan de vacaciones, asina que toca siguir caleyando dende Oceño, primeru per carretera delles envueltes, hasta garrar camín na parte alta de la braña de Mildón hasta les cabañes inferiores onde teníamos aparcáu los coches, teniendo tiempu de sobra pa mudanos de ropa y dir a xintar a la Calluenga onde teníemos reserváu, previu vermú na terraza.
En resume, ruta curtia de malpenes 9 km y un desnivel acumuláu de +/- 485 m, nun total de 4 hores y media, pero too ello, sabiendo onde nos vamos meter, ya que tamos en tarrén de Picos, con pasos colgaos sobre riegues increyibles, sedos de pastores y broza cola que tendremos que lluchar, asina que los tiempos y kilómetros nun vos engañen, nun ye una mañanera al uso, pa xintar el menú, hai qu'andar y navegar con visión montañera.
No hay comentarios:
Publicar un comentario