10 de Marzu de 2025
Track: Obar (Cabrales) - Palancas - Polvorosa - Tordín - Sonllanu - Sotres (Cabrales)
Colos díes más llargos y el cadril con más fuercia cada día, tocaba probase un pelín más y aprovechando que tenía a dellos collacios per Cabrales, decidí poner ruta pa esa fastera, anque finalmente, nun pudo venir muncha xente a facer esta guapa travesía pente Obar a la vera'l Cares y el pueblu de Sotres.
Los motivos cimeros d'esta ruta, yeren dos defechu, conocer el nomáu Aventón de las Palancas, un kilómetru vertical dende Obar hasta Portudera pa entamar la ruta y al final d'ésta, ascender a la Cabeza Sonllanu, ún de los últimos Montes Cimeros de Picos, que fáltenme por conocer de segunda categoría y que sorprendióme poles vistes tan guapes que tenía.
Alborecemos n'Arenas prontín, llueu de pasar la tarde del sábadu, tomando dalguna cervecina y cenando pal día siguiente a les 9 la mañana tar almorzaos, asina qu'averámonos hasta l'aparcaderu d'Obar, Pepa, Rubén y Naiara, guardesa del refuxu del H.ou de Cabrones, qu n'esta vegada va xunísenos pa conocer esta guapa travesía.
Preparámonos nel aparcaderu, coles meyores gales y miramos p'arriba del nomáu Aventón de las Palancas, kilómetru vertical que toma nome de la parte alta de la canal, tamién conocíu como Ardalomba pelos de Tielvi. Cualesquier person, daría-y pereza con tan sólo mirar, pero dempués d'añu y mediu de dolores y una operación de cadril, yo taba gayoleru por metéme con un bon desnivel.
Entraremos a la esquierda de les cabañes d'Obar, per un senderín pente felechos secos bastante marcáu, nel que nun tenemos muncho más que pensar, qu'en dar zapatu, ya que paez que sigue calteniéndose gracies en parte a los entrenos de los corredores. Poro, tiramos pela Cuesta Obar, con un ritmu sele y pali pali, vamos ganando vistes a los Cuetos d'Albu y a los Cuetos del Trabe.
Cola vista puesta nel paré de la Peña'l Robru, siguimos ascendiendo, pudiendo algamar al cabu d'una solitaria ancina, un descansín pa echar un tragu d'agua y continuar per un tramín más llanu, a la salida la riega la Cojita, continuando dempués hacia la Cuesta'l Caxigu, onde tornamos a apretar el culu, con dellos tramos mui pindios, onde toca meter presión a les zapatilles.
La verdá ye que ta encantándome, ya que necesitaba un esfuerzu así, anque bono, llevamos un ritmín afayaizu y voi super cómodu. Les vistes amplíense hacia'l H.ou Los Cabrones, parándonos, como non, a comentar la xugada, ya qu'a Naiara, ya-y queden menos vacaciones hasta tornar a la temporada de refuxera.
Salimos d'El Caxigu, teniendo otru pequeñu "descansu" y metémonos baxo los parés del Picu L'Águila (Tielve) o Cabeza Redonda (Arenas) al tramu final de la canal nomáu como Las Palancas (Arenas) o Ardalomba (Tielve), saliéndonos pela Tiesa Ardalomba, nome que nin pintáu, porque'l tramu final hacia la Broquera Ardalomba, ponse tiesu, con dalgún tramu ensin senderu, hasta les envueltes finales que sáquenmos a Portudera finalmente.
Na boquera d'Ardalomba, garramos aliendu y caleyamos un pelín más hacia'l norte, p'algamar les vistes hacia la mar, a tol cordal del Cuera, ablucante acolumbralu d'entamu a fin y tamién a la entrada a Portudera per Somas, que treaeme guapes alcordances de rutes y díes de carrera pela xerra.
La verdá ye que l'esfuerzu paga la pena, polo guapo de la xubida pero sobretou pola entrada a la xerra onde algamamos vistes increyibles primeru al norte y más tarde, al sur, cuando caleyamos un pocu más hacia'l colláu La Polvorosa (1215 m), onde con vistes a tolos Urrieles y al Picu Urriellu como non, vamos a parar un ratín a xintar daqué y recuperar fuercies.
Sentase delantre de los mayores cumales de los tres macizos, anque les ñubes tápenmos la fastera Sur, nun tien preciu y la verdá ye que los mil metros de desnivel direutos, punxeron les pates bien calentines, pero darréu tenemos un llargu camín entá, pa esfrutar d'un pateín per Portudera, entamando por ascender a la cercanda Cabeza La Polvorosa (1304 m).
Llueu de la Polvorosa, continuamos hacia l'Oriente, dexando les cabeces de Robezu y Llamedu al norte, que ya conociéremos n'otra perguapa ruta va unos años y continuamos hacia la Vega Crimienda, onde saludamos a dellos caballos, pa continuar hacia'l Pelliteru, onde alcontramos quiciás el tramu más abegosu del senderu, hasta aportar a la boquera del sedu La Cruz, atopando unes vistes verticales sobre Tielve increyibles.
Equí, revisamos la meteo y veo les cares de los collacios, que ven mui lloñe llegar a Sotres y mui cerca baxar a Tielve y hasta a mí apetezme conocer el sedu La Cruz, que pícame enforma, pero tengo ganes de completar la travesía, así que dígo-yos que tiramos un pelín más y tovía nel Entreh.anu podríemos abandonar hacia Tielve si torciérase la meteo.
Continuaremos baxando un pelín dende La Cruz, pa descender hacia la Vega L'Ingranéu, onde ya tenemos senderu más tranquilu, ya que pocu más alantre, atopamos la percorrida senda de Caoru, siguiéndola dellos metros más, hasta atopar la fuente Viña, onde decidimos al fin, parar a xintar el pinchu con tola calma.
Magar de recuperar fuercies y garrar agua fresco, siguimos camín, llibrando la Cabeza Blanca pel sur, pa descender hacia L'Entreh.anu, llugar onde alcordámonos tamién, de la retirada hacia Tielve de parte del grupu, dempués d'aportar dende Mildón, demientres el restu, siguíemos nuna xabazada ruta hasta Oceño de vuelta.
El nuesu destín ye'l Vau Camba, asina que xubiremos per un guapísimu camín armáu hacia'l Cuetu Los H.orcaos, pa descender pela vega Espeyas, hacia la riega la Cimbraña, onde atopamos carteles del PR que tiene de llevar hacia Sotres a les nueses collacies, demientres, Rubén y yo, nel vau Camba, tenemos qu'alcontrar una salida pel monte Camba hacia la Cabeza Sonllanu.
Despedímonos en Camba de Pepa y Naiara y vamos escucando pel vau, onde tendremos la oportunidá d'ascender al monte, alcontrando un tramu onde vemos el monte más llimpiu, metiéndonos a bregar per un fayéu mui mozu y casi virxen ya qu'en tola xubida casi nun alcontramos traces de senderos d'animales.
Sicasí, sacante de lo pindio y duro de l'ascensión, nun hai que bregar cola broza, asina qu'algamamos non sin esfuerzu polos 400 m de desnivel dende'l vau, la cresta superior del monte Sonllanu, teniendo que crestiar a posteriori, ya na faza sur del monte, hasta los 1397 m de la Cabeza Sonllanu.
Na realidá nun daba un duro, por esti cumal, pero cayóme la boca dafechu, ya que les vistes dende la Cabeza Sonllanu son increyibles, colos dos macizos Oriental y Central enfrente y tol valle del Duh.e enfrente, poro ye una maraviya pa tener una curtia ascensión dende Sotres pa los visitantes del pueblu.
Tábemos falando d'esto Rubén y yo, cuando entamamos el descensu del cumal hacia un casetu en ruines, pa siguir esi crestéu hacia'l valle del Duh.e, hasta alcontrar na punta NO el senderu claru, que va llevanos hacia una filera de h.itos primeru y a marques colloraes dempués, que n'amplies y pocu pindies envueltes van dir baxándanos hacia la parte alta de Sotres.
Colos nuesos camientos completaos, en cuanto a lo guapu d'esti monte p'algamar vistes, aportaremos a una pista que vien dende la Caballar y vamos descendiendo hacia la parte alta de Sotres, pasando primeru pela Boriza y más tarde per Treslallosa a les cais de Sotres, esfrutando d'un paseín caleyando agüeyando tolo guapo y remozao qu'alcontramos el pueblu.
Con pocu más, alcontrarémonos con Pepa y Naiara que tan esperándonos nel intre con Jorge y Jose que vinieron buscanos dende Arenas, terminando esta ruta de 13.5 km con un desnivel positivu acumuláu de 1600 m y 785 negativos, nun total de 7 hores y 45 minutos de puru monte y disfrute de vistes, ganándonos más que sobrádamente la cerveza en Sotres y la hamburgues n'Arenas.
PD: Mil gracies a Victor Delgado (Pindio Pindio) y a Victor Puente (Pucavi) polos datos toponímicos
No hay comentarios:
Publicar un comentario