Abelgas (L.luna) - Peña Negra - La Viesca - La Filera - La Raya

23 de Febreru de 2025

Track: Abelgas (L.luna) - Peña Negra - La Viesca - Picu Filera - La Raya

Continuamos cola recuperación del cadril, poro quería dar un pasín más, aumentando kilómetros y desnivel, a ver que tal nos alcontrábemos. Pa ello, como nos últimos tiempos, restolémos nos miós llistaos, decidiéndome a conocer el Picu Filera en L.luna, monte cimeru de la cordelera cantábrica, dexándame a les clares que Llión va ser un vezu abenayá, ya qu'Asturies téngola mui patiada y cuéstame alcontrar dalgo nuevo a facer.

D'esti xeitu, magar del almuerzu en Mieres p'axuntar coches, díbemos tirar pel Güerna hasta la salida al parque de Babia y L.luna, bordiando'l banzáu de Caldas, hasta garrar el desvíu en Sena hacia Abelgas, percorriendo una guapa carretera hasta'l xeláu pueblu, siempre a la vera'l rigu Pereda.

Partimos con una xelada importante en Abelgas (1270 m)

Preparámonos con un par de graos baxo cero y salimos a caminar peles cais del pueblu, hacia la pequeña foz que faen les distintes riegues que formen el rigu Pereda. La temperatura nun invita a quitar ropa de momentu, asina que siguiemos a bon pasu, col envís d'atopar los primeros rayinos de sol ya na foz de la riega'l Cuartero, onde desviarémonos hacia'l valle de la Guariza, siempre per bon camín.

 

Perpasamos les foces del rigu Pereda hacia'l valle La Guariza

Nel intre, entá tenemos que xugar col borrín mañaneru, que diéranos un bon sustu al cruciar el Negrón, ya que poques vegaes viéramos una Asturies espeyada y un Llión tapecíu, pero'l día aparte de fríu, taba xuguetón, sicasí, a lo llargu del nuesu perguapu paséu pel valle la Guariza, el sol fizo caltener la so fuercia y fueron desapaeciendo les nublines, pa sintir a la fin, dalgo de calorín nel cuerpu.

 

Entamamos a tener vistes demientres esfrutamos del ascensu del valle La Guariza al colláu Remansadero

Siguiremos caleyando hasta aportar a una amplia envuelta que va facenos ascender, pel Llano La Fuente, hacia'l colláu de Remansadero, onde vamos entrar a la xerra de la Filera, pero más en concretu, a los enormes mayaos de Campohermoso, llugar dende onde podríase descender hacia la comarca d'Oumaña.

Nun ye'l nuesu casu, ya que namás entrar en Campohermoso, vamos desvianos a la manzorga p'ascender primeru cómodamente pela faldera del monte Peña Forada hasta la collada cola peña Castillo, onde pasaremos de caminar per praos, a tener que bregar un pelín más pente les urcies, navegando pelos puntos más febles hasta aportar a los 1806 m de la Peña Negra.

 

Ascendemos pela faldera del monte Peña Forada pa siguir hacia la Peña Negra (1806 m)

Les vistes de tola redolada son una gociada, tanto pal macizu de Penubina de L.lena y Quirós, como pa la fastera del Ceyón y las Tres Marías, como pa cumales de Teberga, Somiedu y Babia. Llueu d'acolumbrar ya intentar aldovinar tolos montes, vamos continuar hacia la base del picu la Viesca, onde vamos separanos en dos grupos, continuando camín Benjamín, Carlos y María, demientres, Rubén, Marcos y yo, vamos aventuranos na Viesca, que tien una fastera norte bien amenazante.

 

Abegosa ascensión al picu La Viesca (1867 m) onde tuvimos qu'aplicanos con ganes

Y cuando digo aventuranos, ye por que tocó, bordiar la faza norte hacia l'oeste, blincando y trepando pente les peñes cuarcítiques, que cola xelada, facíase perdifícil avanzar, teniendo que curiar cada pasu, pa nun resbariar y mancase. Llueu d'algamar un pelín más la faza sur, ya pudimos ascender dalgo más cómodos hasta los 1867 m del picu La Viesca.

 

Descensu infernal del picu La Viesca pente destrepes y bregada pela "viesca" moza

Contentos pol entreteníu descensu, siguimos arista hacia l'oriente, viendo delles baxaes direutes pela faza norte, pero xelaes, poro decidimos navegar pel sur, teniendo que destrepar dalguna peña, bastante divertida, pero na faldera del picu, alcontrarémonos con un pequeñu infiernu de fayéu mozu, que fainos pasar pente árboles, urcies y demás broza hasta algamar la salida hacia las Camariellas.

 

A la fín somos a garrar bon camín hasta l'arista de la xerra la Filera encumando los sos 1873 m

Nas Camariellas, alcontraremos a la fin un senderu que vien dende Curueña d'Oumaña, pel que continuaremos con vistes al guapu picu que terminábemos d'ascender, demientres los compañeros, espérenmos por casi una hora, xelaos pol vientu fríu, nel puntu de más altor, como ye'l picu La Filera de 1874 m.

Malpenes, sacamos semeya a tola guapísima redolada, destacando munchísimu'l contraste de la planicie sur llionesa col monte calizu xabaz de fastera norte de Llión y d'Asturies y otra de grupu y escapamos corriendo pela arista oriental, col envís d'alcontrar un abellugu hacia la fastera norte, onde poder parar un minutu a xintar y descansar.

 

Entainamos nel descensu de la Filera p'abelluganos del vientu y poder descansar

A la fín, enantes del colláu Cuartero, vamos aparar a descansar y xintar, ya que los tres que fuimos a la Viesca, nun paramos en tola ruta un minutu y pegamos una bregada, que pal mió cadril, fue un auténticu retu, quedándome la verdá contentu, cola fuercia de pierna drecha d'anguaño y viendo un futuru mui prometedor pa los prósimos meses y años, espero.

 

Descendemos al colláu de la Raya pel Cabadoiro llueu de xubir a la Peña Blanca

Llueu del descansu, pasaremos pel colláu, pa xubir mínimamente a la Peña Blanca y ya xustu dempués, garrar un cortafueos ñeváu en descensu que tien de dexanos llueu d'una llarga baxada nel colláu de la Raya, onde tendríemos accesu hacia'l pueblu de Mallo de L.luna, bien pegáu al banzáu de Barrios.

 

Continuamos camín de la Raya pel valle Cuartero hasta tornar a la foz d'entrada a Abelgas

Sicasí, esi nun ye'l nuesu destín, asina que tiraremos pel mayáu Ablano, pela evidente pista pa siguir camín siempre pegaos a la riega Cuartero, pela que descenderemos con vistes a los montes del valle La Guariza, enantes d'entrar de nuevu na mecedura les riegues de Guariza, Cuartero y Valverde que formen el rigu la Pereda y que mos daría entrada de nuevu al pueblu d'Abelgas.

En resume, terminamos una ruta bien guapa, que déxanos con munches ganes de tornar pela fastera, ya que la bayura de montes que tenemos a conocer ye motivante. Nel intre, terminábemos la ruta nun total de 6 hores y 5 minutinos, p'algamar los 16.5 km de percorríu superando un desnivel acumuláu de +/-800 m.