Peñes (Gozón) - Verdicio - Cabu Nigru - Xagón - San Xuan de Nieva - Les Tablaes - Vioñu - Bañugues

17 d'Ochobre de 2025

Track: Peñes (Gozón) - Verdicio - Cabo Negro - Xagó - San Xuan de Nieva - Les Tablaes - Vioñu - Bañugues

Cuantayá que nun espublizaba una costera nel blogue y aprovechando dellos díes de vacas y mi vuelta a la BTT va unos meses, partimos Suco y yo hacia'l puntu más septentrional d'Asturies nel Cabu Peñes, onde tengo l'envís, de continuar la costera de Gozón de la que ya ficiera la fastera oriental caminando va munchos años.

Daquella, percorriéremos dende Antromero hasta'l cabu Peñes, nuna ruta de casi 20 km de costa y darréu, tamos preparando les bicicletes, sabiendo que tenemos per delantre la costa occidental, pero con una vuelta pel centru del conceyu pa conocer el Techu de Gozón y volver a Peñes, que lo suponemos que llevará una bona kilometrada.

Partimos del Cabu Peñes nel puntu más nortiegu astur (103 m)

Montámonos nes bicicletes dando la vuelta al faru de Peñes, onde ya tacháremos el vértice xeodésicu n'anterior parte de la costera asina como fuéramos a la punta Gaviera, saliendo esta vegada a la manzorga per senderos, que van llevanos pegaos a la costa hacia les llagunes del cabu Peñes, puntu d'acolumbramientu d'aves, que travesamos sin problemes al tar seques, hasta que vemos a la nuesa manzorga, el vértice de La Granda (115 m).

Averámonos al vértice de la Granda (115 m) con vistes a la costa central astur

Dexamos les bicis nel camín y xubimos al vértice pa continuar pela costa pa enllazar con camín, pegaos a la carretera hasta'l pueblu del Ferriru, onde tornamos hacia la costa hacia un guapu mirador, siguiendo tola costa nun tramu increyible pa rodar en bici, siempre pegaos a la costa con unes vistes brutales de milenta sableres xabaces (Carnera, La Cabaña...) hasta salir a la rasa de Verdicio.

 

Conocemos sableres xabaces hasta averanos a llugares más conocíos na fastera de Verdicio

En fastera conocida, perpasamos los praos d'aparcaderu en branu, onde tovía alcontramos dalgunos asitiaos y pasamos al llau de les dos sableres de Verdicio pa comenos un rampón dende la segunda sablera de Verdicio hasta la parte alta penriba la sablera de L'Aguilera, onde ya llanearemos con tendencia a baxar hacia les cases del Molín del Puirtu Llamperu, plantegándose antes nós, la necesidá de volver hacia la rasa de Podes, ya que nun atopamos camín ciclable hacia'l mirador de Playa Nigra.

Pasmos llugares bien guapos como L'Aguilera, Puertu Llamperu y el Cabu Nigru

Dende la rasa tornaremos per caminos hacia la costa, pasando per playa Nigra y siguiremos pegaínos a la costa pel cabu Nigru, que ya conocemos de baxar a blocar dalgún día y tiramos a la fin, hacia'l monte Xagón, onde tenemos durante un bon ratu, grandes vistes de la sablera de Xagón, bien nomada nesta fastera central d'Asturies, onde acolumbramos muncha xente de paséu mañaneru en tola so estensión.

Perpasamos Xagón pa siguir per Nieva hacia l'Altu del Boscón

Nós, pasaremos penriba la sablera, al llau de les dunes y salimos hacia'l pueblín de Nieva, desviándonos al pocu de les últimes cases hacia l'altu del Boscón, otru vértice xeodésicu de Gozón, al qu'aportamos en bici a la faldera y caleyamos los últimos metros del cumal hasta los 72 m d'altor, que van danos unes vistes siendo sinceros, ablucantes, de tola ría d'Avilés, esi amiestu d'entornu industrial y ñatural según pa onde echemos los güeyos.

Encumamos el Boscón (72 m) pa descender al faru de San Xuan de Nieva

Baxaremos del Boscón y tiramos hasta'l faru de San Xuan de Nieva, asomándonos hasta la Punta la Forcada y baxando pel Arañón hacia les cases de pescadores de Nieva, al par del astilleru d'Avilés, onde paramos a xintar enfrente la ría y vamos continuar hacia San Balandrán, comiéndonos un duru entepechu hacia Zeluán y en xeneral a la parroquia de Llaviana, a la qu'aportamos con una petada fina de pates. 

Salimos de la ría d'Avilés hacia la parroquia de Llaviana tornando hacia'l centru del conceyu gozoniegu

Llueu de la subidona dende la ría, llanearemos un pelín pasando al llau de la Torre del Difuntín, saliéndonos a la manzorga hacia'l pueblu de la Piñera, onde atacamos la sele ascensión hasta'l puntu de más altor de Gozón, como ye'l monte Les Tablaes en Piñera con 135 m, marcáu per un cartelu al llau del típicu depósitu qu'alluga'l vértice no alto de la estructura. 

Pelín cansaos y con tol trabayu planiáu fechu, pararemos en Perdones dellos metros más alantre de la Piñera a echar un cervecina y picar dalgo y entraremos en mou de buscanos la vida pa volver hacia Peñes lo más aina posible, ya que llevamos 3 hores y media sin parar.  

Facemos el techu de Gozón nel monte Les Tablaes pa continuar escapada hacia'l centru de Gozón

Pa ello, vamos dir navegando peles carreteres comarcales de Gozón, travesando fasteres ganaderes, siempre per caleyos afayaizos pa ciclar, cruciando namás la AS-238, col envís d'entrar na parroquia de Vioño, siguiendo pela parroquies de Santolaya y Eres, hasta aportar a la de Bañugues, raspiando ya la costa oriental de Gozón.

 

Aportaremos a la costa oriental de Gozón empobinándonos a la fin hacia'l Cabu Peñes

Dende Bañugues, tocará baxar hacia Llumeres, puntu perguapu industrial-costeru, teniendo de secute que sufrir una llarga xubida hacia la parroquia de Viodo, onde ya entraremos a la fin, na rasa final hacia'l Cabu Peñes, al que tantes ganes teníemos d'aportar, llueu de 5 hores y 15 minutos de ruta de bici de monte.

En resume, completamos una ruta en bici que va facenos conocer tola costa occidental de Gozón, tachando dellos vértices xeodésicos nel percorríu pa tachar dempués el techu del conceyu nes Tablaes, too ello esfrutando de conocer milenta sableres y fasteres ganaeres de Gozón nun total de 48,5 km con un desnivel acumuláu de +/-625m

 

Camudando'l Camín pela Costa Occidental de Gozón