Antromero (Gozón) - Costa de Gozón - Cabu Peñes (Gozón)

16 de Xineru de 2016

Track: Antromero (Gozón) - Costa de Gozón - Cabu Peñes (Gozón)

Aportaron les ñeves y llegaron con fuercia, quiciábes con demasiada fuercia pa nós que nun tábemos preparaos mentalmente pa ponenos a trabayar, llevar trastos, usalos y usalos con seguridá. Asina que dempués de tola selmana dándo-y vueltes si meténos de lleno nes rutes ivernales, acabamos por decidir que yera un bon momentu pa facer la ruta costera que teníemos dende l'añu pasáu.

Ésta yera nin más nin menos la travesía dende Antromero y el Cabu Peñes, qu'enllaza cola que ficiéramos de Carreño l'añu pasáu. Pa ello, quedamos p'almorzar ensin madrugar muncho, sobretou porque nos durmimos, en Candás.

Alborecemos na sablera San Pedro n'Antromero

Ellí, facemos el trasiegu de coches hasta'l cabu Peñes y salimos d'Antromero (38 m) per un camín que tien de llevanos a la regueru del Pielgu, pasando al llau d'un guapu molín y entrando na Playa San Pedro.

Demientres los collacios lleven los coches, Pau y yo esperamos xugando con Kíla nesta sablera, esfrutando del alborecer y dándo-y vueltes a la tiesta por si tenemos la oportunidá de ver a los pas de Kíla.

Esfrutamos del paséu pela Playa San Pedro y siguimos costa alantre

Kíla ñacía n'Antromero a pocos metros d'esta playina, cuerre nerviosa pela sablera, cuando aporten en coche los demás del grupu y siguimos pegaínos a la costa hasta alcontrar les xaules y chamizos onde atópamos el llugar onde va más de tres años recoyimos a Kíla.

Viendo les condiciones onde tan... la nuesa Kíla tuvo un guelpe de suerte na so vida perruna. Cola llárima cayendo del güeyu, dexamos a la ma de Kíla, ya que ye la única que sigue col dueñu al cual alcontráramoslo más tarde recoyendo ocle en La Playa Moniello.

Siguimos esfrutando de la costa gozoniega hacia la capital Lluanco

Siguimos camín, pela costa alantre, pasando pente La Iría y les puntes del Sobrao y del Cabritu, viendo de pasu el pedreru la Basera y la nomada Playa'l Bigaral o de los Cristales, por mor del vertederu nel que tuvo convertida esta playa durante munchos años.

D'esta especial pedrera saldremos al llau d'un regueru hacia les caberes cases de La Iría, garrando primeru un caleyu asfaltáu y saliendo más tarde a la As-239 siempre n'ascensu hacia L'Alto'l Monte, onde entamaremos el descensu hacia L'Aramar con vistes al islla del Carmen cola so ermita.

Pasamos per L'Aramar hasta entrar en Lluanco

Güei cola marea alta, nun tenemos pasu a la ermita del Carmen, asína que siguimos descendiendo hacia la sablera de L'Aramar, onde desendolca la riega la Gallega y xubiremos pel molín de L'Aramar, bordiando la urbanización de los Laureles pela manzorga hasta tornar de nuevu hacia la costa, baxando a la playa'l Dique.

Nel nuesu pasu pel Dique, alcuérdome que ya tuviera ellí con Marce, collaciu del tayu y llocal de Lluanco, teniendo que cruciar el ríu Cañeo con curiáu pa nun moyanos muncho y saldremos ya a la parte alta de la capital, Lluanco, pasando al llau de la punta y playa de Samarincha.

Travesamos Lluanco de llau a llau con un día increyible

El día nun pue tar más guapu y dan ganes de parar a tomar el vermú, pero malpenes son les once la mañana, así que caleyaremos pela costa de Lluanco pasando al llau de la Playa La Ribera primeru y llueu pela de la de Lluanco, magar de pasar al llau la Ilesia.

Abandonaremos Lluanco, pasando penriba'l muelle'l Gayo y al traviés d'un parque entamaremos la sienda costera que va dende Lluanco al cabu Peñes, ya que pel momentu, los nuesos pasos fueron lloñe de cualesquier tipu de baliza de PR.

Dende la Talaya tenemos vistes hacia'l Cabu Peñes y el islla La Herbosa

Siguiremos costa alantre, pasando penriba la playa'l Corral y la punta'l Castillo, empobinándonos hacia la punta'l Caballo y de la Vaca, onde podemos acolumbrar al fín el Cabu Peñes dende La Talaya, puntu del percorríu onde baxamos hacia la nuesa primer parada.

Pa ello pasaremos al llau de los cantiles de Ñera y llueu baxaremos hacia la Playa Moniello, onde paramos nel chigre La Barquera y esfrutaremos de dellos minutos de vermú y picotéu variáu de frutos secos ya inclusu dalgún cachín de bocadiellu que llevábemos pal camín.

Pasamos per guapos llugares como Moniello y la rasa de L'Aguión

Media horina asoleyando, da pasu a siguir alantre hacia L'Aguión, guapa rasa costera, anque préstanos averanos a los cantiles de la punta La Pelleya y del castillo Manzaneda, pa ver romper con fuercia les foles.

Siguimos rasa alantre hasta la Punta L'Aguión, onde encomencipiamos la baxada a la sablera de Bañugues, abriéndose cláramente les vistes hacia'l Cabu Peñes. Dende que saliéramos de Moniello, pilláronmos nel nuesu caminar un enorme grupu de monte de Xixón, La Peñuca y a tramos casi danos la risa porque paez que vamos de romería toos xuntos.

Baxamos hacia Bañugues onde travesamos gayoleros la sablera

Por suerte, paez ser que tiran hasta'l fondu la ensanada y nós decidimos travesar la sablera, aprovechando la baxamar. Nesta travesía tan gayolera, tendremos de travesar riegues, saltar champanes y facer equilibrios de peña en peña... eso o direutamente descálceste como Pau y sin problemes travieses la sablera Bañugues.

Xubimos de nuevu a la rasa onde acolumbramos Picos a lo lloñe

Son les dos y cuartu la tarde y la xente ya va teniendo ganes d'un segundu vermú, asína que salimos de Bañugues de nuevu hacia otra rasa, yendo esta vegada pel mediu d'ella anque nos cantiles tendríemos como ellementos costeros la punta Sabugo o el isllote'l Curviru.

Aportaremos a les cases d'El Monte, parando a tomar otru refrixeriu, anque enantes buscamos dalgún tipu de baxada hacia la playa Llumeres, pero pesie al guapu mirador, nun hai continuidá na sienda, anque entrugamos a paisanos nel chigre y sí que de guah.es decíen poder baxar... agora broza y pocu más.

Pasamos per Llumeres colos restos mineros bien visibles

D'esti xeitu, nun mos queda otra posibilidá que garrar la carretera Go-1 durante unos 700 m, qu'en baxada continuará hacia los restos de l'antigua mina de fierru de Llumeres, travesando dempués la riega Barreo pa xubir finalmente polos Abanales hacia Viodo.

En Viodo caleyaremos la penúltima rasa costera, ya que tovía quédanos baxar hacia la Playa la Cueva y siguir tola riega homónima en sen ascendente hasta por fín entrar na enorme mesete que ye'l Cabu Peñes.

Tramu final hacia'l Cabu Peñes dende'l monte Coneo

Caleyaremos entos travesando tola rasa, pegaos al monte Coneo hasta aportar al pié de la casa La Gaviera onde ya garramos la carretera As-328, viendo a la fín el cartel de Peñes y el so hermosu faru, que dende vien lloñe díbemos viendo cuantayá.

Nel camín hacia l'aparcaderu del faru, avérome lo más que pueu al vértice de Peñes, ya que ta vallao y siguimos hasta'l coche, onde Zori y Pau, quédense con Kíla a mudase de ropa y los demás siguimos camín hasta la Peña La Gaviera onde finaliza'l PR y el mundu... al menos l'asturianu pol norte.

Vistes dende la Peña La Gaviera... finisterre astur nel cabu Peñes

En resume... bona ruta, tranquila pero hai que tar d'andar ya que los sos 19.5 km asína lo esixen, al igual que la so parte final con un tarrén más quebrapates qu'asciende hasta los 670 m de desnivel acumuláu en 7 hores y media anque bien podemos restá-y una hora nes paraes vermuteres.

Siguimos camudando'l camín... tamién pela costa astur...

Camudando'l Camín nel Cabu Peñes