Cuetu L'Abeyera (Caravia)

27 de Xunetu de 2015 

Si l'añu pasáu fuéramos dellos díes a Caravia, casi que siendo la escuela más visitada del branu, esti añu namái que pasamos un día per ellí, y como non, Haritz fue'l collaciu qu'acompañóme a trepar nesti pequeñu requexu del Sueve.

Pa entamar y ver la so evolución dende la vuelta a la peña d'Haritz volvió a da-y a los cuartos y pasó tranquilamente a los quintos, anque alcuérdome por mor de la lluvia nun tuvo tiempu a da-y un pegue al quintu que-y faltaba por probar.

Preparándonos pa trabayar duramente

Pente medies d'esguilar, sele pela mió parte nos quintos, metíme a probar l'únicu sestu que quédame nesta escuelina, que nun ye otru que Welcome to Tijuana (6c) con una variante a la manzorga a metá de vía qu'algama'l 7b.

Y cuando andaba pela cuarta chapa, más menos, tiritiando de pensar nun posible resbarión de pies, púnxose a orpinar, lo que fizo que fuera dafechu imposible siguir esguilando. Pa los que nun conocéis esta escuela, hai que dicir que ye fina enforma de pies y siempre tien pelín de mofu de cuerrer l'agua peles víes.

 Kíla tien menos ganes de trabayar... asína qu'aselar mientres tanto

Asina que... siempre hai una primer vegada... tocó abandonar material, un mayón, mi primer mayón jejeje. De toes formes, tovía tocó recuperar el restu de cintes, baxar y volver a xubir el quintu que quedara montáu pa qu'Haritz diera fín a los graos más baxos del Cuetu L'Abeyera.

La próxima vegada... intentaremos apretar con tolo que tenemos dientro.

Cuetu L'Abeyera
 
Croquis modificaos por mi de la escuela d'escalada del Cuetu L'Abeyera, por mor de Piratas Free. Gracies y col so permisu.


14, 21 de Mayu, 6, 13, 20, 29 de Xunu y 26 de Xunetu de 2014

Nun se dicir mui bien, cual fue'l motivu pol qu'esti branu diónos por visitar tanto esta escuela. Quiciás, tábemos fartucos d'otres escueles más visitaes davezu y como nun tenía nin semeyes d'esta escuela, un día picámonos y fuimos hasta ellí a ver que se cocía.

Cartelu de la escuela d'escalada de Caravia

Y así a la tontu, tuviemos mediu branu yendo a ella, descubriendo pela mió parte, les víes de placa más dures que nunca fice. Equí, ye too tumbáu o casi vertical, pero los pasos son esixentes, mui téunicos de pies y difíciles de lleer a vista.

Alberto na placa de Les Abeyes (6a/+) y na cueva baxo'l paré

Poro, cayeron munches víes con un máximu de 6c+ de la númberu 2 del croquis, pero les de 6b+ p'arriba tuviéronme trabayando varios pegues en varios díes. Lo guapu de tornar a una escuela de pocu a pocu, ye que conoces a xente, a bona xente como Emilio, equipador d'esta escuelina y vecín de Lloroñi.

Pau faciendo víes de primera cada día más tranquila (Pirondolos Redondos y los Sedos Lin)

Tal fue'l bon rollu con él, que convidónos a les fiestes del so pueblu, nel que diba facese una quedada escaladora con fartura posterior, pero por un malentendimientu, y sobretou porque nun volvimos muncho magar de falar d'ello, fuimos el finde que nun yera y nun tuviemos la suerte de volver a venos pa echar unes rises y esguilar xuntos.

Trabayando na vía Los Raposos que queda de 6c durín, durín

Tamién alcontrámonos con muncha xente, unos xeniales y otros pelín flipaos que paez ser que necesiten la paré pa ellos sólos y los pies de vía como si fueran el roco de la Calzada. Y ye qu'hai xente que si fuera por ellos, de xuru que preferíen que les escueles d'Escalada nun tuvieran al aire llibre onde los animales de compañía puedan esparder como tien de ser, en llibertá, siempre y cuando nun torguen la vida normal del ganáu.

Charly faciendo la so primer vía de primeru col IV los Sedos Lin

A lo que vamos, qu'alcuentres xente bono y xente payaso y quiciás por ello, dexamos de dir por nun alcontrame al mesmu anormal un día tres otru. Menos mal que somos de quedanos colo bono, conociendo a Emilio y a Miguel, que taba faciendo un trabayu de llimpieza y regraduación de la escuela, pasándome los croquis modificaos a los que-yos fuí dando la mió opinión tamién.

Haritz alcordándose de vieyos tiempos esguilando

En xeneral, escuela a la que tengo que tornar y siguir probando coses ya que de lo que probé encadenélu too con trabayu pero quedó encadenáu. Aparte, sirvió y mui bien, pa que xente nuevo n'esto de la escalada pudiera facer la so primer vía de primeru como Charly o volver a engolase na parede como Haritz.

Too ello como siempre, parando magar del deporte nel merenderu Casa Pancho, pa echar unes cervecines... que ye de lo que se trata nestos deportes al aire llibre, de pasalo bien antes, durante y sobretou dempués.

----------------------------------------------------------------------------------------

Hestoria na escuela del Cuetu L'Abeyera

Pocu tengo que cuntar d'esta escuelina, conocida tamién como La Trincherona, ya que namái-y ficimos una visitina y durante un par d'hores a lo máximu, dempués de dar preste a la siguiente ruta de montaña: Altu'l Fitu (Caravia) - Xerra'l Fitu.

Y ye que, como nun mos quedamos (al menos yo) cansaos cola rutina y tenía munches ganes de conocer esti paré, del Cuetu L'Abeyera, pues fuimos a l'alcuentru de les sos víes, que tan a escasos 5 minutinos d'onde podemos aparcar el coche na xubida al Altu'l Fitu.

Como aportar? Pues cenciellu, ya que dende Xixón, garraríemos l'Autovía'l Cantábricu pa salinos d'ella en Colunga, onde garramos la AS-260 qu'al traviés de los pueblos de Coceña, Lloroñi y unes cuantes curves de xubida al Fitu, dexarános enfrente d'una cantera onte ta'l Cuetu L'Abeyera.

Tan solo, prebé unes poques víes y toes de cotación baxa, pero'l rangu anda pente los cuartos y un sétimu, poro ye perfeuta pa metése a la solombra la viesca y esguilar en placa, cola posibilidá, de baxar al pocu a dase un bañín a la Espasa.

Lo del Cuetu L'Abeyera, diz a les clares, lo qu'hai na so paré, jeje. Y ye que, les víes del centru tienen l'inconveniente de tar habitaes por un abeyeru, poro andáivos con güeyu nun marchéis con un bon picotazu, como-y pasó a un rapaz estranxeru que taba ellí dándo-y un pegue a la vía nomada como Les Abeyes.

Como tamién tamos ensín una semeya, habrá que poné-y remediu ya intentar conocer unes cuantes víes más, que de xuru que paga la pena una visitina a esta escuelina... onde per primer vegada tuviemos la oportunidá, d'escuchar un escape de gases al apretar nun pasu, jeje.... poques rises nos echamos.