lunes, 21 de octubre de 2013

Tuíza Riba (L.lena) - Prau Capón

29 Setiembre de 2013

Track: Tuíza Riba (L.lena) - Prau Capón


Segunda ruta de la temporada 2013-2014 y vamos apostar duru, ye más vamos apostar tou al Siete. Como tolos años, vamos intentando llimpiar el calendariu de rutes d'años pasaos y nesti casu, el Siete nel macizu de Penubina, taba pente elles.

Pa ello, tenemos qu'averanos hasta'l pueblu de Tuíza Riba y fadrémoslo como ye davezu saliendo de Xixón y garrando l'autovía minera hasta Mieres del Camín, onde siguiremos hasta'l pueblu de Campumanes en L.lena, onde una vegada más, nun somos a alcontrar un llugar decente onde desayunar.

Sol y ñubes en Tuíza Riba (1210 ms)


Magar d'un cafetín ensín sofitu sólidu, tiramos pola carretera 8 de L.lena, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin entramos en Tuíza Riba, onde aparcamos el coche, cola visión nada prestosa d'una enorme ñube prieta enriba'l macizu.

Ye ún de les coses menos motivantes na montaña, pero nun queda otra qu'al menos intentalo o esperar que'l tiempu vaya abriendo. Asína que, preparámonos y baxo un solín estupendu, facemos el míticu camín al Meicín, demientres cuntamos mil y una hestories que pasónos nestes montañes, a los nuevos.

Camín davezu dende Tuíza Riba hasta'l Meicín

Ensín averanos hasta'l refuxu, paramos un segundu a aldericar que posibilidaes tenemos. Llevamos menos d'un hora hasta'l Meicín y p'arriba tenemos un ñube que xube y baxa, pero que nun tien pinta de desapaecer en nengún momentu.

La verdá ye que les posibilidaes, son poques, ya que la fastera del Fariñentu yera una bona posibilidá, pero dexamos atrás el camín de xubida que conozo y a la Pena Cerreos, ya xubimos demasiaos del grupu como pa repetila.

Xubimos penriba'l Meicín hacia'l valle Covarrubia cola ñube metía dafechu

Ensín más, decidimos prebar suerte y vamos xubir al valle Covarrubia y avanzar hasta onde podamos. Ciertamente, foi una pena nun preparar, más opciones alloñaes de les cotes más altes como la Penaubina y los Picos del Fontán, que suelen quedase coles ñubes, pero la meteo nun amosaba dalgo asína.

La xubida pel valle Covarrubia faise cómoda, dexando a la manzorga l'ascensión pol Canalón Oscuru hacia la Forqueta'l Portil.lín, pasando nós, baxo les muries del Portil.lín Fonderu. A bon ritmu, echando una güeyada dacuando, hacia'l Meicín y más lloñe a la Mesa, que tan tol tiempu baxo un sol al qu'envidiamos.

Metiéndonos más y más nel valle Covarrubia baxo los Picos del Portil.lín

Lo que nos toca, ye dir poquín a pocu, ganando-y tarrén a esa borrina que quier quitanos la ilusión de l'ascensión al Siete. De tal mena, vamos xubir hasta una especie de colláu so los 1980 ms, nel que si tuviésemos la oportunidá tendríemos que desviárnos hacia'l Siete.

Pero non, parámonos y vemos que nun va ser posible. Ye más, sabiendo qu'hai delles trepadines, la roca ta húmeda, que nun conozo l'ascensión, que somos munchos y dalgunos nun sé que tal muévense nes trepaes.... tien de quedar pa otru día sí o sí.

Aportamos a la entrada del Fuechu la Cabra con cero esperances pal Siete

Amás, un grupu de montaña tién que facer d'un mal día, un día positivu y metése neses condiciones al Siete, diba ser frustrante pa toos ya inclusu dalguien del grupu podría garrá-y mieu al monte y a mí en particular, jajaja.

Así que, cero marrones y vamos conocer un pocu más esta fastera baxo les Castil.línes, conociendo'l Fuechu la Cabra, col envís d'al menos ascender hasta'l más sele de los cumales que llenden con Llión, el Prau Capón.

Toca conocer tola fastera del Fuechu la Cabra empobinándonos a la norte d'Ubina

Col oxetivu camudáu, la xente reláxase y caleyamos a bon ritmu, travesando pedreros y fuechos, hasta'l colláu que fai, esi guapu cumal que ye'l Cuetu les Cabres. En realidá, pa dir ganando altor adulces, vamos dir dalgo penriba'l colláu cola vista puesta nuna covacha baxo la muria norte de la Penaubina.

Pali que pali, averámonos hacia esa especie boca l'infiernu, que con dos dientes ye más amenazante si cabe. El tramu final hacia ella, sedrá una pedrera pelín abegosa, polo suelto la roca, na que los menos avezaos sufren un pelín.

Decidimos facer una cenciella ascención al Prau Capón

Dende la pedrera, pasaremos a un tramu más cenciellu, de terraces y con pocu más, y baxo la presión qu'exerce la cara norte de la Ubina, encumamos el Prau Capón de 2171 ms, el cual tienmos preparáu una increyible sorpresa.

Nun ye otra, qu'una cayía hacia Santumil.lanu de vértigu y más en concretu hacia una pedrera que paez acabar casi nel mesmu Torrebarriu. Ún a ún, vamos aportando al cumal, asomándose a tal balcón dalgunos y otros casi que prefieren nun mirar, baxando al pocu d'esti pequeñu pero guapu cumal.

Pasando tol mundiu pol cumal del Prau Capón (2171 ms)

Aunque ye ceo, la una y media, tenemos fame, así que decidimos baxar hacia'l colláu col Cuetu les Cabres, onde hai delles peñones, nes que descansar un ratín. Na baxada, aparte de camentar una posible escapada y trepada hasta'l Cuetu, toca facer una visita a la covacha.

Pa cuando soi a llegar a ella, ya taben los Carlos echando-y un vistazu. Yo tuve acompañando a Natalia y Berto hasta la cume, que retrasáronse nel ascensu al nun alcontrase mui bien, Berto y llegué un pelín tarde pa ver que nun paecía tener continuidá.

Un vistazu en toles direiciones... Castil.línes, Penaubina, Santumil.lanu, Cuetu les Cabres

De la cueva de la que nun conozo'l nome, vamos baxar al colláu a xintar y nel intre, apaez un numerosu grupu de montaña, que tien la intención de xubir al Cuetu les Cabres, poro con tanta xente penriba mía, prefiero dexalo pa otru día.

Col estómagu enllenu, namái que quédanos facer un descensu tranquilu, cola sensación de tomar mui bones decisiones nel día de güei y col trabayu bien fechu, no que se refier a conocer una migayina meyor esti guapu macizu de Penubina.

Entamamos la baxada al Fuechu la Cabra, magar d'una güeyadina al "covachu l'Infiernu"

Durante la baxada tendremos la "suerte" de ver los tres Castil.lines y el nuesu oxetivu inicial, el Siete, del cuál falamos llargamente y dalguien comenta que'l nome-y vien de que ye'l séptimu picu si contamos dende la Penaubina.

Nun lo sabemos, pero quien sabe: Penaubina, Prau Capón, Puerta L'Arcu, 3 Castil.lines y Siete... al menos ye divertíu l'asuntu. Polo demás, baxaremos faciendo una visitina al refuxu'l Meicín onde tomamos una cerveza demientres Kíla enzárzase nuna discusión con un burrín... nun se quien ye más burru.

Colos Castil.lines y el Siete, facemos el restu la baxada hasta Tuíza Riba

En resume, día tranquilu y non pol tiempu, nel que completamos una alternativa a la ruta prevista, faciendo unos 10,5 kms, durante 6 hores y media y ascendiendo unos 1050 ms de desnivel acumuláu, lo cual nun ta nada mal pa salir del pasu.

El próximu día más y meyor esperamos....

1,2,3,4,5,6, Siete... Camudando'l Camín

Nesta ruta dimos preste al Prau Capón de 2171 ms que ye: dos mil de L.lena y pertenez al Club 58 del Macizu de Penaubina.

Ver progresos en: Retos montañeros

4 comentarios:

  1. Ficistis bien. L´ascensu al Sietu nun tien delles complicaciones, pero meyor col terren bien secu, y más yendo xente que nun sabes como esguila peles peñes. Además pa mi ye´l picu les Ubiñes con meyores vistes. Perriba la Ubiñona. Meyor con un dia buenu.
    Un saludu

    ResponderEliminar
    Respuestas
    1. Gracies Javi, eso mesmu camentaba yo demientres baxaba y bien contentu pola decisión. El Siete bien merez una visita con un gran día, pa disfrute de tol mundiu.

      Un abrazu

      Eliminar
  2. Nun salió mal la altarnativa Berto, esti sábado sin nun hay noveda, pasaremos nosotros por allí, pretendemos unir el Siete con Ubiña -ya lo hicimos mas veces- aunque nun creo que pasemos por la cueva esa pa conocela, ya habrá otres ocasiones.
    Un saludu

    ResponderEliminar
  3. Dan bon tiempu, así que paezme a mi que vais tenelu chupáu, qu'eso conocéislo como la palma la man, jeje.

    Un abrazu Monchu

    ResponderEliminar