El Condao (Llaviana) - La Repunta - El Cotón - Mediodía - La Triguera - Fresnéu - La Robellá - Xerra - Boroñes

27 de Xunu de 2026 

Track: El Condao (Llaviana) - La Repunta - El Cotón - Mediudía - La Triguera - Fresnéu - La Robellá - Xerra - Boroñes

Continuamos un pocu cola preparación pa la Travesera de Picos del GM Xuan de la Borrina, viniéndonos a la tiesta, que tenía pendiente una crestería que bien pudiera valenos, pa superar un desnivel curiosu y sobretou pa movenos per tarrén calizu, asina que decidimos averanos hasta'l Condao en Llaviana, p'acometer la crestería sur del cordal de Peñamayor hasta'l Picu La Triguera. 

Les previsiones son de bastante calor y posibles tormentes de tarde, asina que saltámonos l'almuerzu de turnu y a les 9 la mañana tamos preparaos nel aparcaderu del cementeriu del Condao, pa entamar a caleyar, onde un potrín y la so ma, tienen a bien aparte de saludanos, acompaganos un ratín de pista nos primeros pasos del día. 

Partimos del pueblu d'El Condao (375 m)

La pista pela que salimos ye la que xube hasta'l colláu de Breza, xustu al empar del nuesu oxetivu final como ye'l Picu La Triguera, que tamién ficiéramos va munchos años na otra parte de la crestería de Peñamayor dende Fayacaba naquella ocasión. Esta vegada, saldremos a 375 m d'altor poro tenemos casi mil metros direutos d'ascensión per una crestería que nun pilotamos res, asina que vamos a l'aventura como siempre.

Xubimos pela pista hacia Breza pa desvianos a la manzorga a la gueta del crestéu

Avanzaremos pela pista a bon ritmu, pasando per antigües cases y dalgún molín bien guapu, pa continuar durante media hora aproximáu, hasta'l puntu nel que salimos a la manzorga per un senderín, onde pali pali vamos avanzando pelo más pisáu que vamos viendo. Nun ye un tarrén cenciellu, embarcámonos un pocu pente ablanos y dalgo de broza y tendremos que trepar dalgún murín tiesu calizu pa llibrar los ablanos, pero nel track empobínovos más hacia la manzorga al entamu la cresta, pa nun facer lo mesmu que nós.

Tramos de navegar evitando la broza con dalgún trepe calizu hasta'l crestón

Una vegada que tamos na cresta, vemos que podría upase con cierta facilidá dende'l pueblu de Boroñes a la otra vera'l filu, pero buenu, escaecemos un pocu dalguna escayada y entamamos con vistes hacia la Peña Mea y la Forcá otra cabalgada per una arista, anque nesti casu, la primer parte sedrá per un senderín colgáu bien guapu, que va dexándonos avanzar hasta entrar na cimera onde tendremos qu'usar les manes en dalgún puntu.

Avanzamos pela guapa cresta pasando pel picu La Repunta (841 m)

Los trepes van sucediéndose, toos cenciellos hasta dar preste al picu La Repunta (841 m), primer finxu del día, onde un par de compañeres piden echar un descansín onde echamos un tragu y aína retomamos l'arista hasta aportar a la fastera de la Forniella, onde alcontramos la canalización d'agua pente La Fontona nos Arruos y Xixón y tamién un puntu d'escape, que viendo'l nivel físicu de les compañeres, deciden tomar y baxar dende Fresnéu al Condao de vuelta.

Continuamos crestéu hasta alcontrar el canal d'agua dende los Arruos

Continuaremos entós, Marcos, Pepa y yo, que superamos el desvíu de la canalización pela mandrecha, pa retomar de nuevu l'arista, viendo en munchos tramos, lo llarguísimu de la crestería que tenemos per delantre. Siguiremos a un ritmu potente, siempre controlando la baxada de les compañeres, nel tramu con más ambiente de la cresta, ya que les cayíes hacia Fresnéu son bien potentes y dempués de la parte aérea anque cenciella, tendremos los pasos más prestosos de trepe n'ascensión al picu Cotón (1125 m).

Siguimos hacia'l picu Cotón (1125 m) con dalguna trepadina entretenía y con desventíos al occidente

Dicir qu'alcontrámonos nunos trepes, al nuesu mou de ver, cenciellos, delles chapes y una reunión a mou d'instalación p'asegurar, lo que paeciónos sorprendente, sicasí siguimos a lo nueso, trepando a les nueses velocidaes, entamando a tener una sensación ya perimportante de calor, poro intentamos apurar el pasu, ya cola Xamoca a la nuesa mandrecha bien cerquina y yendo tan centraos n'avanzar que casi pasómonos otru cumal bien guapu como ye la Peña Mediodía (1198 m), que cola bandera asturiana nun mos podíemos perder.

Casi nos despistamos d'encumar la Peña Mediudía (1198 m)

Raspiando los 1200 m, la Peña Mediudía, va dicinos a les clares que va quedándonos pocu dar preste a la crestería, asina que tornamos a garrar ritmu pero les pates van diciendo que tamos cansadinos y el calor va pasando factura, viendo que necesitamos dar un parón potente pa xintar y beber, anque nengún de los tres vamos mui sobraos d'agua nel intre, sobretou porque una de mis cantimplores salió volando nun trepe casi al entamu de la crestería.

Facemos los caberos metros de crestería hasta'l Picu La Triguera (1293 m)

Con pocu más, facemos el tramu final hasta'l picu La Triguera de 1293 m y malpenes sáquenmos una semeya una pareya de montañeros, echámonos hacia abaxo, en dieición Breza, ya que vemos nos mapes qu'esiste una fonte na Vega Llagos, anque nun somos a alcontrala, decidiendo parar a xintar cola calma baxo la solombra los árboles, bebiéndonos tol agua que teníemos, cola esperanza d'alcontrar agua nes cabañes de Callacente.

Averámonos hacia Tremes pa baxar per Callacente hasta la campa Fresnéu

Saldremos de la Vega Llagos hacia'l colláu Llagos onde garraremos pista, en descensu hacia Callacente, aportando a la primer cabaña, onde entrugamos si hai fonte, ufreciéndose amáblemente a carganos les cantimplores con agua fresco, que súponos a gloria, siguiendo alantre pela pista, saludando a dalgún propietariu más d'eses cabañes tan bien calteníes y ya facemos envuelta en baxada hacia la Campa Fresnéu.

Ascendemos hacia la Rebollá (974 m) al travíes d'un pindiu entepechu

Na Campa Fresnéu vamos tener un regalín pal cuerpu como ye un pindiu entepechu hacia'l monte La Robellá, pasando primeru pel picu la Carbona (968 m) y teniendo qu'entrá-y un pocu pel suroeste al vértice de la Robellá (974 m) ya qu'alcontramos mui tomada la entrada direuta. Nel intre, termino tolos vértices de Llaviana y tornamos un pelín solos nuesos pasos, pa continuar baxando a una pista que va dexanos nel colláu'l Cordal (817 m) onde vamos entamar a la fin la baxada fina.

Descendemos dende'l colláu del Cordal per pista hacia La Xerra y Boroñes

Nun hai muncho que comentar de la baxada ya que la primer parte sedrá toa per pista formigonada siempre averaos al ríu La Xerra, entreteniéndonos con dalguna zreizal a la que llegamos pañar dalgún frutu, anque la mayoría tan altísimos jeje. Continuaremos baxe abaxo, alloriando cola cantidá de frutales qu'hai nesti valle y aportaremos al pueblu La Xerra, onde escaeceremos la pista formigonada per carretera, que fadranos pasar per Boroñes primeru y dempués nel puntu final de la ruta nel cementeriu del Condao.

Dicir que fueron unos 4 kms de baxada nuna horina escasa, que completaron la mui encomendable ruta con un total de percorríu de 15,3 km, superando un desnivel de +/- 1075 m nun total de 7 hores de puru disfrute na xubida y de trámite na baxada, anque toca dicir que fuimos perentreníos nesti valle la Xerra, xintando dalgunos frutos que fuimos topando pel camín.

Camudando'l Camín nel cordal sur de Peñamayor