10 de Xunetu de 2026
Track: Dobarganes (Llébana) - Picu Jano
Pues llegó'l momentu de la Travesera Picos 2025 - 2026 y como los últimos años, preparamos una rutina pa la tarde del vienres, como pa poner los músculos a furrular de cara a la paliza de los díes siguientes y como non, si l'añu pasáu tuviemos que cancelar pola calufa infame que teníemos en Riañu, na Llébana andamos más menos asemeyaos, anque viendo que vamos dir munchu tiempu per viesca, decidimos siguir alantre.
Siguir alantre, significa aportar a Dobárganes, llueu de parar n'Ojedo a tomar un cafetín y al aparcar nel pueblu y salir a la cai a preparanos, casi morremos del calor. Preparamos mochila con agua y pocu más y al par del cartelu qu'indícanos la ruta, vamos entamar a caleyar, col suelu secu del camín desprendiendo un calor insoportable.
Menos mal, que según vamos xubiendo pente la viesca entama a tirar un pelín l'aire, pero cuando sales a un claro, los más de 30 graos nótensen y muncho. Nin siquiera pasar al llau del banzáu de la Tejera, refresca l'ambiente y anque tien a la so vera un castru, nun allargamos nin media la ruta, dándo-y la vuelta pa conocelo y continuamos el nuesu camín, siempre perbien marcáu con fitos de maera.
Ye una pena nun poder esfrutar d'eses pequeñes construcciones megalítiques, pero'l calor manda y el cuerpu pídenos xubir lo más apriesa posible pente la solombra del guapu carbayéu, Siguiremos entós hasta'l colláu Pandal que va brindanos vistes a tol macizu oriental, dende les cumeres de la redolada de H.uentedé hasta les más norteñes penriba de Bejes, atopando na parte más alta, una pista rodada que vien dende Dobárganes per otru valle.
Caleyaremos con cierta brisa pela parte alta, pudiendo esfrutar de menos sensación de calor y aportamos a los 1146 m del Picu Jano, monte ablucante por tar allugáu enmediu del macizu Oriental de Picos d'Europa y de la montaña Palentina, poro les vistes son inmeyorables a milenta cumales de tola redolada. Aparte d'entrenu, esta ascensión valiónos p'acolumbrar un pelín los percorríos que queremos intentar nos prósimos díes y el mirador nun puede ser meyor.
Llevamos una hora y cuartu de ruta y decidimos averanos hasta'l cumal norte del Jano, coles sos caráuterístiques peñes y una bona cayida hacia'l rigu Deva, entreteníendonos colo que paecen unes antigües mines, o al menos nun mos paez mui ñatural una evidente frecha vertical nel suelu.
Descenderemos dempués hacia'l Portillo d'Agrajal, onde tamién esisten restos megalíticos, demientres la cara norte del Curavacas nos saluda y ya coles ñubes amenazantes de torbón y dalguna tronada qu'otra, descenderemos hacia la vallina de Lacebo, pela que siguiremos hasta aportar a la llaguna d'Entrerrías, otru pequeñu requexu bien guapu d'esta ruta.
Dende la Llaguna malpenes quédanos un kilometrín de pista hasta Dobárganes de nuevu, onde tovía resiste una calufa estrema nos coches, qu'abrimos pa qu'aireen y quitamos les mui sudaes camisetes y playeros pa refrescar los pies con unes chancles y tirar hasta Potes a echar una cervecina bien fresca, antes de continuar hasta Brez onde teníemos los apartamentos rurales.
En resume, ruta curtia pero mui guapa de 2 hores y media de patéu, pa una tarde menos calurosa o una mañanina tranquila, que pol módicu preciu de superar un desnivel de +/- 560 m de desnivel acumuláu nun total de casi 9 km, tendremos les meyores vistes de tola redolada y fadremos un Monte Cimeru del Cordal Cantábricu.
No hay comentarios:
Publicar un comentario