22 d'Avientu de 2025
Track: El Beyu (Ponga) - Mura - Carriá - Poana - Trecho - Llarenes - L'Arenal
Continuamos coles rutes del GM Xuan de la Borrina, averándonos esta vegada hasta Ponga, onde preparamos una ruta pa volver al Picu Carriá, monte que ficiera va años dende la Vega de Cién y que ye ún de los Montes Cimeros Asturianos, que tou montañeru tien que tener na so llibreta, pola guapura del monte y poles increyibles vistes enmediu del parque de Ponga.
Como siempre, quedamos nel chigre la Huera pa tomar un cafetín, pillar unos pinchinos y de pasu felicitar les fiestes al chigreru, collaciu ya dende va munchos años de monte. Xuntaremos coches y tiramos pal desfiladeru los Beyos, saliéndonos enantes de la Ponte Bidosa, hacia'l pueblu ponguetu d'El Beyu.
Durante'l viaxe na furgo, ya soi acolumbrar cierta blancura nos montes de la que paso por Nava y cuando aporto a Cangues d'Onís, alcuéntrome con un día borrinosu, orpinando y cola llínea nival perbaxa, atopando los montes ñevaos a una cota mui baxa, muncho más de lo camentáu, asina que ya tengo na tiesta que va ser un día pelín complexu pa sacar la ruta alantre.
Ensin más, preparámonos y salimos d'El Beyu, col día amurniáu, pero al menos vamos pescanciando dalgún abanciu nel cielu, lo que dame un pelín d'esperanza. Saldremos peles caleyes d'El Beyu pasando pembaxo del cementeriu, garrando un antiggu camín que va dexanos nes cases de Canisquesu, que paez anguaño abandonáu dafechu.
Saldremos de Canisquesu y entraremos nun tarrén pelín abegosu, travesando munchos praos abancaos, hasta aportar a la parte baxa del valle Mura, quedándonos cola sensación de que perdimos en dalgún momentu dalgún camín más altu muncho más cómodo. De toes formes, vamos alcontrando senderinos onde bregamos un pelín col barru esistente, pa pocu dempués entamar a pisar ñeve, viendo tola canal del valle Mura.
Nel intre, el día paez qu'abre ya del tou y la visión ye ablucante, con tola ascensión que tenemos per delantre que paez pindia y dura, pero na realidá, atopamos siempre un senderín que va dir faciéndonos bien llevadera la xubida, pente la broza tumbada pela ñeve, pali pali, ganándo-y altor y dexando cualesquier tipu de vexetación baxo'l mantu blancu hasta a aportar a los 1044 metros del colláu Ortigoso, completando dalgo más de 500 metros de desnivel penriba de la última casa de Canisquesu.
N'Ortigoso aparte d'esfrutrar d'increyibles vistes de Los Beyos y la parte baxa del macizu occidental de Picos, tenemos per delantre una evidente canal hacia la que tendremos qu'empobinanos pa continuar hacia'l picu Roble, faciendo una ascensión pindia y bregona, ya que toca abrir buelga penriba de les plaques de ñeve y de les cotoyes, faciéndose bastante física, anque la recompensa en vistes hacia'l Pierzu cuando aportamos a la crestería, ye ablucante.
Encumaremos los 1315 m de la Peña Roble y tenemos una vertical baxada hacia la collada Roble, la cual acometemos con tendencia hacia'l sur, pa evitar dellos saltos más verticales, teniendo qu'ascender un pelín a la collada, onde nos xuntamos tol grupu y a la fin, entraremos n'arista Este del Picu Carriá, pela que tendremos que xubir unos 150 metros de desnivel.
Caún al so ritmu, diremos esfrutando munchísimu de les vistes nel ascensu, pero non tanto del frío nos pies, ya que dengún de nós veníemos preparaos pa tanta ñeve y a estos altores les botes de media montaña, nun aguanten la humedá y el fríu diba faciéndonoslo pasar un pelín mal, poro cuando algamamos los 1428 m del Picu Carriá, nun tamos pa tar muncho tiempu nel cumal y llueu de picar frutos secos echámonos abaxo pela cara norte d'esti increyible monte.
La primer parte alcontramos la ñeve pelín más dura y baxamos clavando talón mui rapidín pero según vamos atopando más vexetación, pasaremo a ñeve polvo sin trasformar que nos dificultá l'apertura de buelga y apórtanos más friu si cabe nos pies, dexando de sentir los deos, demientres descendemos a la gueta del míticu pasu pel Canalón de Boa hacia'l valle Poana.
El descensu va faciéndose bastante rápido, con dalguna culada por resbariones na ñeve y un pasu travesando una viesca d'ablanos que nos proporciona una fria ducha, hasta qu'a a la fín aportamos a la forcadina onde alcontramos el nomáu Canalón de Boa, puntu clave nel descensu p'acceder al valle Poana y que si nun lo alcontramos en condiciones decentes, fadríanos tener que descender muncho más pela faldera de Carriá y tener que remontar casi tol valle de Poana.
Por suerte atopamos la ñeve blando pudiendo facer buelga entre toos y descendiendo el pindiu canalón ensin problemes, faciendo tamién los pasos aereos verticales del sedu a continuación, saliendo al valle en travesía con ésitu, garrando ya la parte central del valle y remontando pali pali los 100 metros de desnivel que tuviemos que perder, ya que Carriá nun ufrez dengún pasu más altu a la collada Trechu, ya que la faza occidental ye vertical dafechu.
Xintaremos ensin sentir los deos de los pies, al solín na collada, parando non más de 5 minutos y cola mesma entamamos descensu con unes ganes terribles de salir de la ñeve, garrando un senderín na parte alta que va faciendo envueltes pasando al llau d'un bon bebederu, continuando sienda abaxo hasta adientranos no que queda de la mayada Valliquín, pa siguir viesca abaxo, demientres calecemos pies pel valle Yarenes.
Cada vegada diremos per meyor camín hasta aportar a la Fuente'l Güeyu, cueva onde tómase l'agua pa les cases de L'Arenal y el Beyu, garrando a partir d'equí un guapu camín, pelín abandonáu, que diremos esfrutando hasta arribar a la parte baxa del valle Yarenes, onde vemos les cases de L'Arenal y el camín que debemos tomar pa continuar hacia'l Beyu.
Pembaxo les cases garraremos esti camín armáu, que va percorriendo tol valle del rigu Santa Gustia, teniendo la visión de delles canales hacia'l Picu Carriá, destacando la cueva Panagre, increyible pol so tamañu y que nun futuru, tengo que dir conocer. Ensin más, esfrutaremos d'un camín cómodu y preciosu que va facenos calecer los pies, pasando primeru peles cabañes de Bores, pa finar n'El Beyu, onde terminamos esta guapa circular al picu Carriá.
En resume, ruta perfeuta y mui encomendable, p'ascender un de los montes más guapos d'Asturies conociendo dos valles preciosos como ye'l de Mura y Yarenes, nun total de 7 hores qu'ensin ñeve sedrá como mínimu una hora menos, con un desnivel acumuláu de +/- 1165 con un percorríu de 10.2 km.
No hay comentarios:
Publicar un comentario