11 de Xineru de 2026
Nueva ruta del GM Xuan de la Borrina que siguimos como siempre, col envís de facer coses distintes en tolos llugares que visitamos. Esta vegada tornamos al macizu de Penubina, escapando de los altos cumales, a la gueta de canales prestoses y cotes más baxes pero con esi aire a gran actividá, que tamién, por otra parte, ufreznos la meteoroloxía y el mantu ñevosu.
Pa ello, como siempre quedamos en Mieres pa facer xuntanza y tomar un cafetín y continuamos hacia "Les Ubiñes", pa quedanos esta vegada nel pueblu L.lenizu de Rospaso, pasando enantes per Teyeo, onde casi paramos a echar una güeyada a les canales de la Tesa, onde ficiéramos un rutón pel monte Tixirúa, va pocu más d'un añu.
Aparcaremos en Rospaso y preparamos tolos preseos posibles, ya que nun sabemos la ñeve que tendremos na parte alta nin el so estáu, asina que toca cargar con crampones y piolé por si acaso, anque duldamos muncho de la so usabilidá. Daremos los primeros pasos pel pueblu y ceo salimos per un camín, penriba les cases que va dir llevándonos pel Fuexu hacia la base del espolón rocosu que baxa de los picos del Fraile y más en concretu de la Pena Las Cabras.
La primera idega yera ascender pel Val.le Cordero, pero dende la furgo ya viera la vistosa canal a la manzorga la Pena Las Cabras y casi ensin querer metimonos a ella, perdiendo ya les referencies que teníemos preparaes, anque como siempre, tiramos con xeitu p'arriba pel Cotáu y entramos con tola gana hacia'l Val.lín de las Fayas.
Como non, el tarrén nun defrauda a los amantes de les canales pindies, alcontrando'l senderu xusto pente la yerba llarga, escoyendo nel nuesu casu salir pel mandrecha d'un espolonín enmediu la canal, col picante de nun saber si tendríemos salida, pero dacuando, el nuesu istintu furrula y continuamos pela guapísima vallina, perpasando pembaxo les vieyes fayes, nun llugar que paez escaecíu nel tiempu.
Non sin esfuerzu, aportamos al Quentu, final del Val.lín de las Fayas, dexando a la nuesa mandrecha'l Picu'l Fraile y tendremos un tramu de descansu pelas Tixeras, qu'esfrutaremos enforma de los senderos, empatando cola parte baxa del Val.le Fuentes, que va empobinanos a la so parte alta, onde tendremos un caberu emburrión, hacia la Col.laína Fuentes, sofriendo en dellos tramos cola ñeve costra.
El día nun mos ufrez grandes vistes y sí, munchu fríu y un vientu gafientu, pero los güeyos vanse al cordal de la Val.lota cola Mesa enmediu cuando miramos p'atrás y alantre, a la fín, somos a pescanciar tol valle del Meicín, con una ñube enriba qu'amuesa a les clares qu'acertamos cola ruta, ensin metenos en cotes más altes de les Ubiñes.
Dexaremos les non vistes y dende la col.laína Fuentes, vamos ascender a la Pena'l Castiel.lu per onde meyor vamos viendo, ya que vamos ensin referencies nin track, alcontrando un terracéu herbosu cenciellu, pel que movémonos con facilidá, hasta aportar a la parte alta, onde'l Castiel.lu tienmos una sorpresa enforma d'arista con un tramín espuestu, sobromanera con dalgo de ñeve y roca moyada pel filo.
Encumamos los 1643 m de la Pena'l Castiel.lu con una sensación de gran actividá, sumando les dos canales feches y el guapu percorríu hasta esti cumal, sicasí, nun s'aguanta de fríu nel cumal y decidimos entainar la baxada hacia'l Quentu'l Visu, pelo que sería la "ruta normal" pela so faza norte, teniendo que baxar sollertes a dengún resbarión, ya qu'esta fastera ye perpindia y más cola ñeve y yerba moyao.
Aportaremos al Quentu'l Visu llibrando la baxada bien y pararemos al abellugu'l vientu pa xintar dalguna barrina enerxética, ensin poder parar muncho pol fríu, asina que continuamos ruta hacia los puertos de la Cruz, pasando pela braña Foxón, embaxo la imponente faza sur de la peña Foxón, empobinándonos hacia una llomba hacia l'oriente, malnomada Carba Fusnéu, que nun ye otru monte que'l Picu Las Coronas (1604 m), el cuál encumamos sofriendo un vientu terrible.
Otru cumal que nun esfrutamos muncho, escapando apriesa, dexando atrás, les vistes hacia Siegalabá y Tapinón y tamién a la Carba Valsecu, enfotándonos en baxar y colar del vientu insofrible, baxando hacia Vegafuentes, xubiendo un pelín al Quentu Ordiales y parando na Yana Ordiales, onde planiamos ascensión a la Pena La Portiel.la, decidiendo Vane dir descendiendo ya que llevaba trisca abonda enriba.
D'esti xeitu, salimos Rubén, Pepa y yo, hacia la Portiel.la, entrando por una canalina herbosa pa continuar ya per una llarga arista na que'l vientu azota con fuercia, pasándonos hacia una vallina interna en dalgún puntu, pa tornar na parte final a l'arista, pela que navegamos entre bloques calizos, aportando a un cumal increyíblemente bonito.
Nel cumal nun yéremos a parar del vientu, asina qu'una vegada más quedamos ensin esfrutar de les vistes, ya qu'esti monte domina tol valle'l Güerna, pero ye que somos acolumbrar tola cuenca'l Caudal y hasta la costa central. Con pocu más, escapamos y volvemos a esfrutar d'esta crestería tan entrentenida, tornando a la Yana Ordiales, onde atopamos una vallina que va facenos descender hasta'l mayéu Ordiales onde xuntámonos con Vane y paramos unos minutinos a xintar.
Llueu de la mini xinta, vamos descender travesando un par de praos, con portielles abiertes, siempre cola vista puesta nuna pista na mitá de los mayaos y pela mió parte, colos increyibles parés de la peña Ordiales, siguiendo camín pela pista, hasta una curva evidente que llevaríanos hacia'l pueblu La Cruz, pudiendo continuar per carretera ya hasta Rospaso de nuevo.
Nós, vimos nos mapas un senderu que nos evitaría pisar carretera, poro na curva final hacia La Cruz, tiramos a la mandrecha n'ascensu ya cabecera la riega la Val.linona, alcontrámonos con una sorpresa bien prestosa, como ye'l Caiduriu, una estrechura entre peñes, pela que cai un tabayón mui guapu, que nos da l'agasayu final a la ruta.
Anque como non, por buscar senderos envede carretera, tocónos bregar un pelín na cabera parte, equivocándonos en siguir el senderu baxo les peñes, pasáu el Caiduriu, que tendría de dexanos nel Fuexu, per onde entamamos la ruta, baxando nós per un camín pelín tomáu hasta una esaniciada cabaña, onde ya tomamos senderu y camín, hasta la carretera, quedándonos malpenes mediu kilómetru hasta Rospaso.
Como siempre, rutón que preparamos d'una manera y terminamos por facer tolo que nos pidía'l cuerpu, saliéndonos una circular bien guapa conociendo dos peñes increyibles como'l Castiel.lu y la Portiel.la, asina como una subida dura y guapa pelas Fayas y Fuentes, pa descender más calmáu, completando unos 12 km de percorríu, con un desnivel acumuláu de +/-1025 m, nun total de 6 hores y 45 min.
No hay comentarios:
Publicar un comentario