Salas (Salas) - Nonaya - Sierra de Boudenaya

25 de Xineru de 2026 

Track: Salas (Salas) - Nonaya - Cordal de Bodenaya

Finde repunantísimu de meteo, na que tenemos una ventanina na fastera central y como non, vamos aprovechala ensin mayores espectatives que salir a dar un patéu, asina que decidimos tirar hasta'l conceyu de Salas pa ver si podemos conocer dalgún monte tachable, como ye'l picu Rebollín nel cordal de Bodenaya.

Aportamos a Salas, llueu d'almorzar en Curniana, pa xuntar coches cola xente d'Avilés, preparándonos a la salida del pueblu con mil capes de ropa na mochila, polo que pudiéramos alcontrar durante la ruta. Dexamos el coche enfrente del últimu albergue pelegrín de Salas, modernu polo qu'agüeyamos, dándonos a entender que Salas llévase bona contidá de caminantes del camín primitivu.

Partimos de la capital de conceyu Salas (254 m)

Nós, que nun somos d'estes hestoreis, vamos a lo nueso, pero allegrámonos qu'esti tipu de turismu senderista tenga puxu en llugares menos montañeros astures, sicasí saldremos tamién siguiendo les marques del camín y sobretou de la ruta hasta'l tabayón de Nonaya, que ya conociera fugazmente, cuando corriera el trail del Visu.

 

Facemos la guapina ruta hacia'l tabayón de Nonaya

Ensin mayores problemes que disfrutar del marcáu y bien señalizáu camín, diremos caleciendo pates al empar del rigu Nonaya, parando a echar un vistazu a les distintes costrucciones mineres, pontes o molinos que vamos alcontrando hasta aportar a la ponte'l Carcabón onde nos desviamos a facer una visitina al cayederu de Nonaya nel que sacamos les semeyes de rigor.

 

Visitamos el saltu del Nonaya nel nuesu camín

Llueu de la visita obligada tornamos so los nuesos pasos, pa cruciar esta vegada penriba la ponte'l Carcabón, garrando camín n'envueltes que fadranos xubir hacia'l Llanón, onde va tocanos sofrir un pelín menos d'un kilómetru de carretera nacional, faciéndonos camentar, por qué nun se adecúa nestos tramos a la vera la carretera un senderu abellugáu pa los caminantes, si tanta afluencia tién esta actividá.

 

Siguimos camín primitvu alantre hacia L'Altu la Espina

Abandonaremos la carretera na desaniciada casa Servando, continuando siguiendo les marques del camín primitivu, pasando pel campu las Formas, pa continuar entrando en Porciles col envís de garrar direición hacia L'Altu La Espina, desviándonos enantes de Boudenaya, hacia la sierra homónima, a la qu'entraremos pelas Penas de Boudenaya, al llau del centru de control del parque eólicu.

 

Facemos de la Sierra Boudenaya nel picu Rebollín (822 m)

Dende equí, namái quédanos percorrer per camín asfaltáu y baxo los amedranantes molinos de vientu, hasta la parte más alta de la sierra, cotada pel picu Rebollín de 822 m, al qu'aportamos baxo'l temporal tanto de vientu como de lluvia, poro, sacamos semeya y escorremos hacia la proa de la sierra de Boudenaya, col envís d'abelluganos del vientu fríu.

 

Descendemos del picu Rebollín, saliendo hacia'l norte de la sierra de Boudenaya

Daremos vista al repetidor na faza norte de la sierra, pero nun mos averamos saliéndonos a la mandrecha hacia unes peñes pa garrar senderín penmediu d'una viesca de pinos y ocalitos, teniendo que bregar un pocu hasta dar un camín, qu'alcontremos por desgracia tomáu ya de cotoyes y escayos baxos. Como suel, pasar nesti tipu de monte, los antiguos caminos suelen perdese, abriéndose nuevos pa sacar maera o como nesti casu, sustituyéndose poles pistes de los parques eólicos, asina que ye perdifícil trazar rutes al traviés de los mapes.

 

Salimos hacia la campa la Llanca y d'ehí baxamos hacia'l pueblu de Poles

Sicasí, llueu de pinchanos un ratín salimos ya a bon camín que vien dende la fastera central de la sierra Boudenaya, garrando al pocu tramu asfatláu hacia la campa La Llanca y baxando por asfaltu hacia'l pueblu de Poles, al que-y entramos cruciando la riega la Fuente, saliendo dempués del pueblu pela SL-1, cruciando penriba l'autopista, pa entrar a Salas, como siempre liándonla y entrando per un túnel baxo la nacional, pero bueno, había que da-y un toque divertíu al final de la ruta.

 

Entramos a Salas per un túnel pa caleyar pel centru históricu de la capital

D'esti xeitu entramos a Salas, percorriendo les cais del centru históricu, nel que ta la xente, pesie al día, tomando'l vermú a la espera d'entrar a xintar en cualesquiera de los chigres y restauranes del pueblu. Nós, diremos hasta los coches pa mudanos de ropa y arrimanos tamién a tomar el vermú ya que malpenes yera la una y media de la tarde.

 

En resume, ruta curtia gracies a los ritmos llevaos pelos integrantes, que ficimos los 17,5 km del percorríu en 4 hores xustes superando un desnivel acumuláu de +/- 700 m con un día ventosu y fríu, nel que como non, tamién tocónos pillar cachu en forma de lluvia, quedándonos a gustu cola ruta, ya que nun taba'l día pa munches más hestories.

Camudando'l Camín yendo hacia la lluz