8 de Febreru de 2026
Track: Santa Bárbola (Samartín del Rei Aurelio) - L'Arquera - La Colladiella - Tresconceyos - La Vara
Tornamos al monte col GM Xuan de la Borrina, nun añu nel que pel momentu nun somos a tachar rutes de calendariu, por mor de la meteo y de la calidá de les rutes propuestes, poro tengo qu'andar restolando pente los miós llistaos p'algamar dalgo curiosino a facer, dependiendo de les ventanes de meteo o de la fastera na que llibremos.
Estes coses suelen armes de doble filu, porque nun siempre suelen ser atrautives pal grupu, anque a mín présteme conocer tolos conceyos y montes astures, asina va quince díes salíemos a patiar per Salas, nun día fríu y gafu, siendo esta vegada'l conceyu de Samartín del Rei Aurelio, el nuesu destín pa percorrer los sos altos, dando preste a munchos nos cordales de la Espina, San Mamés y la Vara.
Almorzaremos en Sama y continuaremos en coche hasta Sotrondio pa desvianos hacia'l valle Santa Bárbola pel que conduciremos hasta atopar a la vera'l rigu un llugar afayaizu p'aparcar los coches. Preparámonos y salimos caleyando hacia la ilesia, continuando per dalgún atayu hasta la carretera que llevaranos hasta les cases del Cantu Les Mates.
Percorreremos peles caleyes del pueblín a la gueta d'una salida hacia'l monte, alcontrándola penriba del Riocerezal, saliéndonos a la mandrecha hacia unos mayaos con cabañes p'alcontrar xusto lo que buscábemos, un guapu camín que va dir llevándonos penmediu'l monte hacia la parte alta del cordal de la Espina.
Percorreremos encantaos el camín, del que nun teníemos referencia, ya que sinon diba tocar siguir carretera hasta la proa NE del cordal de la Espina, dando a unos mayaos previos a la Campa Cimera, llugar nel qu'aparte d'atopar cazaores, garraremos ya l'entamu de la nuesa llarguísima cabalgada de cumales y recuperaremos la pista onde ya hai munches referencies de rutes, sobretou de corredores de monte.
Apuraremos el pasu na Campa Cimera, saliéndonos de la distancia de seguridá colos cazaores, qu'algún tiru pegaron al pocu de pasar y empobinámonos hacia'l nuesu primer cumal como ye la Peñona o el Picón de 859 m, nel qu'aparte de ganar vistes, el día diznos qu'acertamos dafechu dexando la ruta pal domingu, ya que les ñubes van dexando pasu a un solín qu'a ratos caliente enforma, anque'l vientu fainos caltener los cortavientos a mano.
Encumaremos la Peñona y baxamos hacia la campa L'Escubiu, llueu d'una pequeña envuelta a la manzorga pa evitar el cortáu, col envís de continuar hacia'l picu L'Artusu (889 m) que nuna cómoda baxada va dexanos en posición d'ascender al primer vértice del día, como ye'l picu L'Arquera de 885 m, con guapes vistes de tola campa L'Arquera, llugar bien guapu con chigre y un caballu de fierru d'escultura.
Siguiremos caleyando pente les cabañes de la Polaúra cola vista puesta nel Altu La Colladiella, siempre per cómodu camín, que dirá averándonos al siguiente cordal, el de San Mamés, pasando enantes peles campes de la Mozquita, la Seca y Ceceal, p'ascender pel barrizal hasta la nuesa segunda cota con vértice, el Cantu Muñón (950 m), cumal que ya ficiera nuna ruta per tierres llangreanes, mui asemeyada en cuanto a percorríu de cordales en ferradura.
Dende'l Cantu Muñón, echamos una güeyada hacia Urbiés, onde óyense les voces de la carrera que pasó minutos enantes per esti mesmu llugar y continuamos en baxada hacia la L'Altu La Colladiella, onde facemos la visitina de rigor al monumentu mineru y garraremos ya cordal de San Mamés alantre, siempre per pista cómoda hasta la campa Cimera, onde algamamos vistes ablucantes de la Peña Mea y tamién un guapu bancu pa parar a xintar, que diba siendo hora.
Con 4 hores de camín nel cuerpu, a un ritmu bien potente, necesitábemos un descansín, asina que xintamos en 15 minutinos y enantes d'enfriar de más, tornamos al camín, ascendiendo al picu Tres Conceyos de 1096 m, puntu de más altor de la ruta y techu del conceyu Samartín que ya ficiera va dellos años, dende la Güeria d'Urbiés con una ñevada bien potente.
Tendremos que desfacer camín hasta la Campa Cimera, en descensu ya que nun vemos traza sienda pa siguir cordal alantre, garrando una cómoda pista que dirá serpentiando pente los distintos cumales, unes vegaes hacia l'oriente y otres hacia l'occidente, dexando pa prau les cotes hasta la campa Tretu, onde garremos un preciosu senderu con vistes hacia Llaviana que dirá averándonos hacia'l cordal de la Vara.
Vamos falando de cuanto bien, faen munches de les carreres pel monte n'Asturies, que dexen percorríos marcaos d'entrenos y recuperen antiguos senderos, que permiten tamién a los montañeros esfrutar d'un caleyar amañosu. Nós, vamos encantaos con esti senderu pel cordal de San Mamés, que con precioses vistes déxanos embaxo'l picu La Vara (950 m) el cual encumamos, dando por fináu los nuesos esfuerzos en cuanto a xubir montes.
Con tol pescáu vendíu, baxamos a la campa la Tazá, onde atopamos un monumentu a los Senderos del Carbón, sentándonos una vegada más a esfrutar de les vistes del valle'l Nalón y continuamos ya per pista, valle abaxo, en varies envueltes hasta sacarnos al altor de los Pedrazos, onde tocará garrar carretera hacia'l pueblu de la Espesura, nun total de 3.3 km hasta'l finar de la ruta.
Nun sedrán d'esos kilómetros de carretera cansinos, ya que vamos en descensu pasando per dellos barrios, primeru la Espesura, llueu El Bericiusu per últimu Les Cases de Baxo, va facer la cabera curva de carretera con vistes a la mina del valle Riucerezal, enantes d'arribar a Santa Bárbola de nuevu, completando una circular pelos Senderos del Carbón increyible.
En resume, ruta llarga de 23.4 km na que completamos tres cordales en tierres del Carbón, con un desnivel acumuláu de +/- 1325 m nun total de 6 hores y 45 minutos, a unos ritmos mui potentes, nos qu'esfrutamos de pistes y senderos perbien calteníos, lo que ye d'agradecer pa facer estes actividaes de llarga distancia.
No hay comentarios:
Publicar un comentario