22 d'Ochobre de 2022
Track: Les Mestres (Llaviana) - Raigusu - Colladina - Corbellusu - Sogrande - Fomermeya
Sorprendéntemente, l'entamu de temporada nel GM Xuan de la Borrina, ta siendo un ésitu y na segunda ruta del grupu, axuntábemosnos un bon garrapiellu de collacios, con xente nuevo del entornu de Mario y xente que l'añu pasáu poca presencia pudo tener, aparte de la minipresencia de Laia, colos sos pas, Haritz y Jenny.
Con esti ambiente y un día raruno no meteorolóxico, vamos averanos hasta'l conceyu de Llaviana, onde cuantayá que nun facíemos monte y la idega nuesa, yera percorrer, como fai dellos años, les foces del rigu Raigusu, pero cola idega de facer una circular xustu pela fastera contraria a la d'aquella ruta, na qu'ascendiéramos ente otros montes, a la Penamea.
Axuntarémonos toos nel entamu de la ruta de les foces del Raigusu, en Les Mestres, ye dicir, na amestaura de los rigos Raigusu y Fomermeya, onde hai sitín p'aparcar coches y col güeyu puestu nel cielu empuercáu de ñubes y con un vientu molestu, entamaremos a caleyar pela cómoda pista que tien d'empobinanos valle alantre.
Caleyaremos con calma, charrando y poniéndonos al día, ya que nel grupu hai xente que nun se vé dende va tiempu, pasando pela Llosa los Pozos, dexando a la nuesa mandrecha'l Valle'l Pedrosu, onde baxa la pista que vien de los Tornos, pa xustu dempués, cruciar la foz del Raigusu, pente les peñes de Fanu y el picu Les Aguiles.
A partir d'equí, el camín entama a picar con más ganes p'arriba, al empar, que la mió vista, desvíase hacia les falderes de la Peña Mea, onde descienden dos vallines perinteresantes, la de la Bayuca y la del Gatu, que confluyen nes foces de Cobellayu, puntu nel que ya les envueltes nes cases del Raigusu, van llevanos al final de ruta de parte del grupu, nos Collaos, onde caltiénse delles guapes cabañes y una pequeña área recreativa.
Despedirémonos de Haritz, Jenny, Elena y Laia, que diben picar dalgo y baxar de nuevu, xustu a tiempu, ya que de secute, nun sé si'l vientu o que degorriu, traenos un frente d'agua dende l'occidente, que va acompañanos durante tola ascensión dende los Collaos, hasta'l picu La Colladina, puntu más altu de la nuesa ruta colos sos 1486 m.
Pente ventolaes perfuertes, somos a facer la semeya de cume y ensin vistes hacia la Cruz de los Ríos, sólo somos a alcordanos daquella aventura tan guapa pela so redolada, col picu Les Aberrugues y aquella baxada pel ríu Cabritu, sacándonos una sorrisa y decidiendo escapar del furacán baxando apriesa hacia la collada Corbellosu.
Pararemos un segundu na collada Corbellosu, camentando si paga la pena l'ascensión o non, animándonos tan sólo tres compañeros, demientres el restu baxaba hasta la mayada de los Llanos a xintar. A simple vista, el Corbellosu paez una ascensión abegosa y asina lu recordaba cuando lo ficimos con una ñevadona va dellos años, "en seco", una filera de fitos va llevanos en varies envueltes hacia'l cumal ensin mayores problemes.
El vientu fízonos escapar, ya que nun yeramos nin a caltenenos en pie, asina que per segunda vegada esti picu coyano tan agreste, nun mos dexó tar nel cumal tranquilos, teniendo que baxar de siguíu hacia la collada y continuando camín hasta les cabañes de los Llanos, onde pudimos xintar daqué, abellugaos contra los parés de les cabañes.
Magar del descansu, baxaremos pel monte les Ailes, col envís de conocer la Foz de Sogrande y el posterior camín, que tien que llevanos a conocer tol valle de Fomermeya. Pa ello, la meyor y más llimpia opción ye averase un pocu al centru la vallina pela que baxaremos alcontrando una guapa vega, enantes d'entrar na foz propiamente dicha, la cual sorprenderá pola so belleza, con llugares con munchu encantu.
Quiciábes nun ye la meyor dómina l'añu pa esfrutar d'esti llugar, ya que con más agua tien que ser más guapu entá, pero sorprende'l requexu nel que tamos metíos, con esi tastu a foces perdíes en conceyos de Ponga, Redes o Piloña, nesti casu tamos en Llaviana y lloñe del mal día que tamos sofriendo, la ruta circular ye de gran valir montañeru, como va amosanos el restu'l camín del valle Fomermeya.
Saldremos de la Foz de Sogrande con dalgún resquiebru pente les peñes, pa salir pela mandrecha'l rigu, con cierta tendencia a ascender, siguiendo a posteriori cintes blanques nos árboles qu'ensin dubia van dexanos nuna mayadina (La Braña) bien guapa, onde aparte d'alcontrar dellos caballos, sedrá onde garraremos el camín que pudimos ver dende los Collaos, que ya ensin perda denguna, va llevanos valle alantre, conociendo dalgún mayaín como la Gabilancera, onde axúntense'l rigu Cañaines y Fomermeya.
Col día poniéndose más repunante si cabe, ensin dexanos esfrutar como diba prestar de les vistes y del propiu camín, siguimos alantre, baxo les falderes de montes tan guapos como'l Cogullu y el Guanalón, hasta aportar al valle del ríu Cabáu, onde'l camín tresfórmase nuna pista formigonada n'ascensu, que llevarános penriba la xabaz Foz de Cobellanes, pa siguir ensin mayores problemes hasta'l guapu pueblu de Fomermeya.
Según voi averándome a Fomermeya, sigo con atención el siguiente monte dempués del Guanalón, alcordándome que quier soname'l crestéu calizu penriba Fomermeya que nun ye otru que la Peña Llorío, de la que tuviéramos que baxanos, por mor de lo abegoso y la falta de lluz pa siguir l'aventura, con tantu tarrén calizu y cotoyil.
En Formermeya, garraremos carretera, demientres alloriamos con delles cases bien remocicaes y en menos d'un kilómetru taremos de vuelta nos coches, cambiándonos de ropa como meyor podemos, baxo un orbayu continuu pelín desesperante ya, dempués d'un día de meteo mui repunante.
En resume, ruta que nun pudimos esfrutar a tope por mor de la meteo, pero que bien paga la pena, con cumales, valles y foces bien guapos nun percorríu de 20 km, con +/-1300 m de desnivel nun total de 8 hores clavaes.
No hay comentarios:
Publicar un comentario